કાઠમંડુ : નેપાળમાં અચાનક આવેલા પૂરે ભારે તબાહી સર્જી છે. આ કુદરતી આફત વચ્ચે મૃતદેહ સાથે અમાનવીય વર્તન કરતો એક વીડિયો સામાજિક માધ્યમો પર વાયરલ થતાં લોકોમાં ભારે આક્રોશ ફેલાયો છે.વીડિયોમાં કાદવ અને પૂરનાં પાણી વચ્ચે ફસાયેલા મહિલાના મૃતદેહ પાસે બે પુરુષો જોવા મળે છે.તેઓ મૃતદેહને પોતાની તરફ ખેંચ્યા બાદ તેના કાનમાંથી બુટ્ટી કાઢતા હોવાનું દેખાય છે.
મૃતદેહને ખેંચી કાનમાંથી બુટ્ટી કાઢ્યાનો દાવો
વાયરલ વીડિયોમાં એક પુરુષ લાકડાના ટુકડાની મદદથી મૃતદેહને પોતાની તરફ ખેંચતો જોવા મળે છે.ત્યારબાદ બીજો પુરુષ મહિલાના વાળ પકડીને મૃતદેહને નજીક લાવે છે અને તેના કાનમાંથી બુટ્ટી કાઢતો દેખાય છે.વીડિયોમાં આસપાસ કેટલાક લોકો આ ઘટના જોતા તેમજ મોબાઇલ ફોનથી તેનું ચિત્રણ કરતા પણ જોવા મળે છે.બુટ્ટી કાઢ્યા બાદ બંને પુરુષો ત્યાંથી દૂર જતા હોવાનું વીડિયોમાં દેખાય છે.સામાજિક માધ્યમ પર કરવામાં આવેલા દાવા મુજબ મહિલાએ સોનાની બુટ્ટી પહેરી હતી.
વીડિયો વાયરલ થતાં લોકોમાં ભારે આક્રોશ
વીડિયો સામે આવ્યા બાદ સામાજિક માધ્યમો પર લોકોએ ઘટનાને લઈને ભારે રોષ વ્યક્ત કર્યો છે.અનેક લોકોએ મૃતદેહ સાથે આ પ્રકારનું વર્તન માનવતાની વિરુદ્ધ હોવાનું જણાવ્યું છે.
નેપાળમાં પૂરથી ભારે તબાહી
નેપાળમાં આવેલા અચાનક પૂર અને ભારે વરસાદને કારણે અનેક વિસ્તારોમાં ગંભીર સ્થિતિ સર્જાઈ છે. ઉપલબ્ધ અહેવાલો અનુસાર મોટી સંખ્યામાં લોકોનાં મૃત્યુ થયા છે અને અનેક લોકો હજુ ગુમ છે.અસરગ્રસ્ત વિસ્તારોમાં બચાવ અને રાહત કામગીરી હાથ ધરવામાં આવી રહી છે.નેપાળ પ્રવાસન બોર્ડની માહિતી અનુસાર વિવિધ દેશોના નાગરિકો પણ ગુમ થયાની જાણ થઈ છે.તેમાં ભારતીય નાગરિકોની સંખ્યા નોંધપાત્ર હોવાનું અહેવાલમાં જણાવાયું છે.આ સમગ્ર પરિસ્થિતિ વચ્ચે વાયરલ થયેલો મૃતદેહનો વીડિયો કુદરતી આફત દરમિયાન માનવતા અને મૃતકો પ્રત્યેના સન્માનને લઈને ગંભીર પ્રશ્નો ઊભા કરી રહ્યો છે.
