લખનઉમાં કોંગ્રેસના પદગ્રહણ સમારંભમાં હોબાળો, કાર્યકરો વચ્ચે ચંપલોથી મારામારી

• આરાધના મિશ્રા અને ઇમરાન મસુદના પદગ્રહણ દરમિયાન બે જૂથ સામસામે આવ્યાનો દાવો; અજય રાય સાથે ગેરવર્તણૂક થયાની પણ ચર્ચા

લખનઉ : ઉત્તર પ્રદેશની રાજધાની લખનઉમાં કોંગ્રેસના રાજ્ય કાર્યાલય ખાતે નવા પદાધિકારીઓના પદગ્રહણ સમારંભ દરમિયાન કાર્યકરો વચ્ચે ઉગ્ર બોલાચાલી અને મારામારી થયાની ઘટના સામે આવી છે.અહેવાલ અનુસાર, સમારંભ દરમિયાન બે જૂથના સમર્થકો સામસામે આવી ગયા હતા.આ દરમિયાન ચંપલ અને બૂટ ઉછળ્યા,ગાળાગાળી થઈ અને ધક્કામુક્કી પણ થઈ હતી.આશરે ૧૦ મિનિટ સુધી હોબાળો ચાલ્યો હોવાનો દાવો કરવામાં આવ્યો છે.કોંગ્રેસે ઉત્તર પ્રદેશમાં આગામી ૨૦૨૭ની વિધાનસભા ચૂંટણીને ધ્યાનમાં રાખીને સંગઠનમાં ફેરફાર કર્યા છે.આરાધના મિશ્રા, જેઓ મોના તરીકે પણ ઓળખાય છે તેમને પ્રદેશ પ્રમુખની જવાબદારી સોંપવામાં આવી છે,જ્યારે ઇમરાન મસુદને કાર્યકારી પ્રમુખ બનાવવામાં આવ્યા છે.નવા પદાધિકારીઓના પદગ્રહણ કાર્યક્રમ દરમિયાન જ આ વિવાદ સર્જાયો હોવાનું જણાવવામાં આવે છે.

સૂત્રોચ્ચાર બાદ બંને જૂથો વચ્ચે તણાવ વધ્યો

મળતી માહિતી મુજબ, સમારંભ દરમિયાન પૂર્વ પ્રદેશ પ્રમુખ અજય રાયના સમર્થકોએ સૂત્રોચ્ચાર કર્યા હતા.આ સૂત્રોચ્ચાર સામે આરાધના મિશ્રાના સમર્થકોએ નારાજગી વ્યક્ત કરી હતી.ત્યારબાદ બંને પક્ષના સમર્થકો વચ્ચે બોલાચાલી શરૂ થઈ અને મામલો ધક્કામુક્કી તથા મારામારી સુધી પહોંચ્યો હોવાનો દાવો છે.આરાધના મિશ્રા અને અજય રાય વચ્ચે પણ શાબ્દિક ટિપ્પણી થઈ હોવાનો ઉલ્લેખ છે.

અજય રાયની ગેરહાજરી અંગે ઇમરાન મસુદનું નિવેદન

નવા પદાધિકારીઓના પદગ્રહણ પ્રસંગે યોજાયેલી પત્રકાર પરિષદમાં પૂર્વ પ્રદેશ પ્રમુખ અજય રાય હાજર રહ્યા ન હતા.તેમની ગેરહાજરી અંગે કાર્યકારી પ્રમુખ ઇમરાન મસુદને પૂછવામાં આવતાં તેમણે જણાવ્યું હતું કે પત્રકાર પરિષદમાં પૂર્વ પ્રમુખને સામેલ કરવાની પરંપરા નથી.પક્ષના કાર્યાલયમાં તેમની પાસેથી કાર્યભાર લઈ લેવામાં આવ્યો હોવાનું પણ તેમણે કહ્યું હતું.બીજી તરફ મસુદે વિપક્ષી ‘ઇન્ડિયા’ ગઠબંધનની એકતા પર ભાર મૂક્યો હતો.તેમણે જણાવ્યું હતું કે ગઠબંધન મજબૂતીથી ચૂંટણી લડશે.સંગઠનમાં થયેલા ફેરફારો બાદ કોંગ્રેસ સામે રાજ્યમાં પક્ષના વિવિધ જૂથો વચ્ચે સંકલન જાળવવાનો પડકાર પણ રહેશે.