‘રામાયણ’ ફિલ્મના નિર્માતાઓએ 25 ઓક્ટોબરે ફિલ્મનું બીજું ગીત ‘મંગલ રંગ’ રિલીઝ કર્યું છે.એ.આર. રહેમાનના સંગીતથી તૈયાર થયેલા આ ગીતને અરિજિત સિંહ અને શ્રેયા ઘોષાલે અવાજ આપ્યો છે.ભગવાન શ્રીરામ અને માતા સીતાના પ્રેમ, તેમના પવિત્ર મિલન તથા સાથે વિતાવેલી સફરને ગીતમાં રજૂ કરવામાં આવી છે.ગીત રિલીઝ થતાં જ સોશિયલ મીડિયા પર તેના સંગીતને લઈને ચર્ચા શરૂ થઈ ગઈ છે.કેટલાક દર્શકોએ ગીતને પસંદ કર્યું છે, જ્યારે અન્ય લોકોએ તેની ધૂન અને સંગીતની શૈલી સામે વાંધો ઉઠાવ્યો છે.ખાસ કરીને ગીતમાં કવાલી અને સૂફી સંગીત જેવો અંદાજ હોવાની ટિપ્પણીઓ સાથે ફિલ્મની ધાર્મિક અને સાંસ્કૃતિક પૃષ્ઠભૂમિને અનુરૂપ સંગીત હોવું જોઈએ તેવી માગણી કરવામાં આવી રહી છે.
સોશિયલ મીડિયા પ્લેટફોર્મ ‘એક્સ’ પર અનેક યુઝર્સે એ. આર. રહેમાનના સંગીતની ટીકા કરી છે.એક યુઝરે ટિપ્પણી કરી કે રહેમાને ‘કુન ફયા કુન’ ગીતની સંગીતશૈલીને ‘મંગલ રંગ’માં અપનાવીને તેને રામાયણનું સંગીત બનાવી દીધું છે.આ ટિપ્પણીમાં સંગીતકારની રચનાત્મક પસંદગી સામે નારાજગી વ્યક્ત કરવામાં આવી હતી.અન્ય એક યુઝરે વાલ્મીકિ રામાયણ જેવી મહાકાવ્ય પર આધારિત ફિલ્મમાં સૂફી કવાલી જેવી ધૂનનો ઉપયોગ કરવા સામે સવાલ ઉઠાવ્યો હતો.યુઝરે આ અભિગમને સાંસ્કૃતિક સમજણ અને સંશોધનના અભાવ સાથે જોડતાં કહ્યું કે મોટા બજેટની ફિલ્મોમાં વારંવાર જૂની સંગીતશૈલી અપનાવવાને બદલે વિષયની પરંપરા અને ભાવનાને ધ્યાનમાં રાખવી જોઈએ.પવિત્ર મહાકાવ્યની રજૂઆતને સામાન્ય રોમેન્ટિક ફિલ્મની જેમ ન જોવી જોઈએ તેવી પણ ટિપ્પણી કરવામાં આવી હતી.
ગીત સામે વધતી નારાજગી વચ્ચે સોશિયલ મીડિયા પર તેને ફિલ્મમાંથી હટાવવાની માગ પણ ચર્ચાનો વિષય બની છે.ટીકા કરી રહેલા કેટલાક યુઝર્સનું કહેવું છે કે રામાયણ જેવા આસ્થાસભર મહાકાવ્ય સાથે જોડાયેલા ગીતમાં ભારતીય ધાર્મિક પરંપરા,ભક્તિભાવ અને સાંસ્કૃતિક ઓળખને પ્રાધાન્ય મળવું જોઈએ.તેમના મતે ગીતની સંગીતશૈલી એવી હોવી જોઈએ કે તે શ્રીરામ અને માતા સીતાના પ્રસંગની ગરિમા તથા ભાવનાત્મક ઊંડાણને અનુરૂપ લાગે.કેટલાક યુઝર્સે માત્ર ગીત હટાવવાની જ નહીં,પરંતુ ફિલ્મના બહિષ્કારની પણ માગ ઉઠાવી છે.સોશિયલ મીડિયા પર ફિલ્મના નિર્માતાઓને ગીત અંગે પુનર્વિચાર કરવા અને જરૂર પડે તો તેને નવી સંગીતરચના સાથે ફરી રજૂ કરવાની અપીલ કરવામાં આવી રહી છે.વિરોધ કરનારાઓનું માનવું છે કે ધાર્મિક મહાકાવ્ય પર ફિલ્મ બનાવતી વખતે સર્જકોની જવાબદારી માત્ર ભવ્ય દૃશ્યો અને મોટા બજેટ સુધી સીમિત ન રહેવી જોઈએ,પાત્રો, પ્રસંગો અને સાંસ્કૃતિક સંદર્ભોની રજૂઆતમાં પણ વિશેષ સંવેદનશીલતા રાખવી જોઈએ.અન્ય એક યુઝરે ‘રામાયણ’માં કવાલી જેવી ધૂન હોવા બદલ નિરાશા વ્યક્ત કરી હતી અને એ.આર. રહેમાનની સંગીતશૈલીની ટીકા કરી હતી.આ પ્રતિક્રિયાઓને કારણે ‘મંગલ રંગ’નું સંગીત ચર્ચામાં આવ્યું છે.ગીતને લઈને ઊભી થયેલી ચર્ચામાં એક તરફ સંગીતની નવીન રજૂઆતનો મુદ્દો છે,તો બીજી તરફ રામાયણ જેવા ધાર્મિક મહાકાવ્ય માટે સંગીતની પસંદગી કેવી હોવી જોઈએ તે અંગે દર્શકોના અલગ-અલગ અભિપ્રાયો સામે આવ્યા છે.હવે નિર્માતાઓ ગીત સામે ઊઠેલી ટીકા અને તેને બદલવા માટે થઈ રહેલી માગને કેવી રીતે પ્રતિસાદ આપે છે તેના પર દર્શકોની નજર રહેશે.
