શહેરમાં ડમ્પર રાજ યથાવત! સુરતના વેસુમાં ડમ્પરની ટક્કરે એક બહેનનું મોત, બીજીની હાલત ગંભીર

સુરતના વેસુ વિસ્તારમાં વીઆઈપી રોડ પર શનિવારે સવારે થયેલા ગંભીર માર્ગ અકસ્માતમાં 22 વર્ષીય યુવતીનું મોત નીપજ્યું છે, જ્યારે તેની નાની બહેન જીવનમરણ વચ્ચે ઝોલાં ખાઈ રહી છે.બંને બહેનો મોપેડ પર ટ્યુશન ક્લાસ જતી હતી ત્યારે પૂરઝડપે આવેલા ડમ્પરે પાછળથી ટક્કર મારતાં આ દુર્ઘટના સર્જાઈ હતી.અકસ્માત બાદ ડમ્પરચાલક વાહન ઘટનાસ્થળે મૂકીને ફરાર થઈ ગયો હતો.

મળતી વિગતો પ્રમાણે, નેહા પ્રસાદ અને તેની નાની બહેન નિકી પ્રસાદ શનિવારે સવારે મોપેડ લઈને ટ્યુશન જવા નીકળી હતી.બંને વેસુના વીઆઈપી રોડ પરથી પસાર થઈ રહી હતી ત્યારે પાછળથી આવી રહેલા ડમ્પરે તેમના મોપેડને જોરદાર ટક્કર મારી હતી.ટક્કર એટલી ગંભીર હતી કે બંને બહેનો મોપેડ પરથી ફંગોળાઈને રસ્તા પર પટકાઈ હતી.અકસ્માતને પગલે રસ્તા પર અફરાતફરી મચી ગઈ હતી.ઘટના નજરે જોનારા લોકો અને સ્થાનિક રાહદારીઓ તાત્કાલિક મદદ માટે દોડી આવ્યા હતા.બંને બહેનોને ગંભીર ઈજાઓ પહોંચી હોવાથી તાત્કાલિક 108 એમ્બ્યુલન્સની મદદથી હોસ્પિટલ પહોંચાડવાની વ્યવસ્થા કરવામાં આવી હતી.નેહાને ગંભીર ઈજાઓ થતાં તેનું મોત નીપજ્યું હતું.હોસ્પિટલમાં તબીબોએ તેને મૃત જાહેર કરી હતી.નેહાના મોતથી પરિવાર પર દુઃખનો પહાડ તૂટી પડ્યો છે.

અકસ્મતમાં નેહાની નાની બહેન નિકી પણ ગંભીર રીતે ઈજાગ્રસ્ત થઈ છે.તેની હાલતને ધ્યાનમાં રાખીને ખાનગી હોસ્પિટલના સઘન સારવાર વિભાગમાં દાખલ કરવામાં આવી છે.તબીબી ટીમ તેની સારવાર કરી રહી છે.એક જ પરિવારની બે દીકરીઓ સાથે બનેલી આ ઘટનાથી પરિવારજનો અને પરિચિતોમાં શોકની લાગણી ફેલાઈ છે.અકસ્મત સર્જાયા બાદ ડમ્પરચાલક સ્થાનિક લોકો એકઠા થાય તે પહેલાં જ પોતાનું વાહન રસ્તા પર મૂકીને ત્યાંથી ભાગી છૂટ્યો હતો.ઘટનાની જાણ થતાં અલથાણ પોલીસ મથકની ટીમ સ્થળ પર પહોંચી હતી.પોલીસે અકસ્માતમાં સંડોવાયેલો ડમ્પર કબજે લીધો હતો અને રસ્તા પરની અવરજવર ફરી શરૂ કરાવી હતી.

અલથાણ પોલીસે ફરાર ડમ્પરચાલક સામે ગુનો નોંધીને તેની શોધખોળ સહિતની આગળની તપાસ હાથ ધરી છે.અકસ્માત કઈ રીતે સર્જાયો અને ડમ્પરચાલકની બેદરકારીની ભૂમિકા શું હતી તે સહિતના મુદ્દાઓ તપાસના ભાગરૂપે આવરી લેવામાં આવશે.વેસુના વીઆઈપી રોડ જેવા વ્યસ્ત માર્ગ પર બનેલી આ ઘટનાએ ફરી એકવાર ભારે વાહનોની અવરજવર અને માર્ગ સલામતીનો પ્રશ્ન ઊભો કર્યો છે.ટ્યુશન માટે ઘરેથી નીકળેલી બે બહેનોમાંથી એકે જીવ ગુમાવ્યો છે જ્યારે બીજી હોસ્પિટલમાં ગંભીર હાલતમાં સારવાર લઈ રહી છે.પરિવાર માટે આ અકસ્માત ક્યારેય ન ભૂલી શકાય તેવી દુઃખદ ઘટના બની છે.