કોચી/તિરુવનંતપુરમ, ૨૭ ઓગસ્ટ ૨૦૨૬ : કેરળના પૂર્વ મુખ્યમંત્રી પિનરાઈ વિજયનના પરિવાર સાથે જોડાયેલા સીએમઆરએલ એક્સાલોજિક નાણાકીય વ્યવહારના કેસમાં તપાસ વધુ ઊંડી બની રહી છે.એન્ફોર્સમેન્ટ ડિરેક્ટોરેટ દ્વારા મે મહિનામાં પિનરાઈ વિજયનના તિરુવનંતપુરમ સ્થિત નિવાસસ્થાન સહિત અનેક સ્થળોએ તપાસ કર્યા બાદ ઓગસ્ટમાં પણ કેસ સાથે સંકળાયેલા લોકો અને સ્થળો પર કાર્યવાહી કરવામાં આવી છે.તાજેતરની તપાસમાં વિજયનની પુત્રી ટી. વીણા સાથે જોડાયેલા નાણાકીય વ્યવહારો અને દુબઈ સુધી પહોંચતી કથિત નાણાંની હેરફેર અંગે ઈડી દ્વારા નવા દાવા કરવામાં આવ્યા છે. તેમના નિવાસસ્થાન સહિત અનેક સ્થળોએ મુખ્ય તપાસ કાર્યવાહી ૨૭ મે ૨૦૨૬ના રોજ થઈ હતી.ત્યાર બાદ ૧૮ ઓગસ્ટે ઈડીએ કોઝિકોડમાં સીએમઆરએલ કેસ સાથે જોડાયેલા અનેક સ્થળોએ ફરી તપાસ હાથ ધરી હતી.
સીએમઆરએલ અને એક્સાલોજિક વચ્ચેના વ્યવહારો તપાસના કેન્દ્રમાં
આ સમગ્ર મામલો કોચિન મિનરલ્સ એન્ડ રૂટાઇલ લિમિટેડ અને વીણા વિજયનની કંપની એક્સાલોજિક સોલ્યુશન્સ વચ્ચેના નાણાકીય વ્યવહારો સાથે જોડાયેલો છે.ગંભીર છેતરપિંડી તપાસ કાર્યાલયની તપાસમાં સીએમઆરએલ દ્વારા લાંબા સમયગાળા દરમિયાન કથિત રીતે રૂ.૧૮૨ કરોડના ખોટા રોકડ ખર્ચ દર્શાવવામાં આવ્યા હોવાનો આરોપ મૂકાયો હતો.આ નાણાંનો ઉપયોગ વિવિધ લોકોને કથિત રીતે ચૂકવણી કરવા માટે થયો હોવાની તપાસમાં વાત સામે આવી હતી. ઈડીના જણાવ્યા અનુસાર, એક્સાલોજિકને સીએમઆરએલ તરફથી આશરે રૂ.૨.૭૮ કરોડ મળ્યા હતા.તપાસ એજન્સીનો આરોપ છે કે આ રકમ વાર્ષિક જાળવણી સેવા માટે ચૂકવવામાં આવી હતી,પરંતુ કંપની દ્વારા વાસ્તવિક સેવા આપવામાં આવી હતી કે નહીં તે અંગે તપાસ ચાલી રહી છે.
મે મહિનાની તપાસમાં શું મળ્યું?
૨૭ મેના રોજ ઈડીએ કેરળના વિવિધ સ્થળોએ એકસાથે તપાસ હાથ ધરી હતી.તેમાં પિનરાઈ વિજયનનું તિરુવનંતપુરમ નિવાસસ્થાન તથા પરિવાર અને કેસ સાથે સંકળાયેલા અન્ય લોકોના સ્થળોનો સમાવેશ થતો હતો. તપાસ દરમિયાન વીણા વિજયન સાથે જોડાયેલા દસ્તાવેજો અને ડિજિટલ સાધનો જપ્ત કરવામાં આવ્યા હતા.ઈડીના જણાવ્યા પ્રમાણે, આ તપાસમાંથી મળેલી હસ્તલિખિત નોંધોમાં વિવિધ નાણાકીય વ્યવહારો,વ્યક્તિઓનાં નામ અને રકમોની વિગતો મળી હતી. એજન્સીએ દાવો કર્યો છે કે આ નોંધોમાં દુબઈમાં નાણાં મોકલવામાં આવ્યા હોવાની વિગતો પણ હતી.
દુબઈ સુધી પહોંચતા નાણાં અંગે ઈડીનો દાવો
ઓગસ્ટમાં ઈડીએ તપાસ આગળ વધારતાં જણાવ્યું હતું કે વીણા વિજયન સાથે જોડાયેલા દસ્તાવેજોમાં આશરે ૩.૪૯ લાખ સંયુક્ત આરબ અમીરાત દિરહામ, એટલે કે આશરે રૂ.૮૫ લાખ દુબઈ મોકલવામાં આવ્યા હોવાની વિગતો મળી છે.આ ઉપરાંત એજન્સીએ કથિત હવાલા વ્યવહારોની સંભાવના અંગે પણ તપાસ શરૂ કરી છે.ઈડીએ જપ્ત કરાયેલા ડિજિટલ સાધનોમાંથી અન્ય વ્યક્તિના નામે નોંધાયેલા સિમકાર્ડની તસવીર મળી હોવાનો દાવો કર્યો છે. આ સિમકાર્ડનો ઉપયોગ ઈન્ટરનેટ આધારિત સંપર્ક માટે થયો હોવાની પણ એજન્સીની તપાસમાં વાત સામે આવી છે. આ દાવાઓના આધારે વિદેશી વિનિમય વ્યવસ્થાપન કાયદા હેઠળ કાર્યવાહી લાગુ પડે છે કે નહીં તે અંગે કાનૂની અભિપ્રાય લેવામાં આવી રહ્યો હોવાના અહેવાલો છે.
૧૮ ઓગસ્ટે ફરી તપાસ, કોઝિકોડમાં અનેક સ્થળો નિશાન પર
કેસમાં ૧૮ ઓગસ્ટે ઈડીએ કોઝિકોડમાં અનેક સ્થળોએ ત્રીજા તબક્કાની તપાસ હાથ ધરી હતી.અહેવાલો અનુસાર આ સ્થળો વીણા વિજયન અને તેમના પતિ પી. એ. મોહમ્મદ રિયાસ સાથે કથિત રીતે સંકળાયેલા લોકો સાથે સંબંધિત હતા.અગાઉની તપાસમાંથી મળેલી માહિતીના આધારે વધુ લોકો પાસેથી માહિતી મેળવવાનો પ્રયાસ કરવામાં આવ્યો હોવાનું અહેવાલોમાં જણાવાયું છે. આ તપાસ દર્શાવે છે કે ઈડીનું ધ્યાન હવે માત્ર સીએમઆરએલ અને એક્સાલોજિક વચ્ચેના વ્યવહાર સુધી મર્યાદિત નથી રહ્યું,પરંતુ આ નાણાં ક્યાંથી આવ્યા, કોને ચૂકવાયા અને તેમની આગળ કેવી રીતે હેરફેર થઈ તેની પણ તપાસ થઈ રહી છે.
વીણા વિજયનની ફરી પૂછપરછની શક્યતા
ઓગસ્ટમાં વીણા વિજયનની ઈડી દ્વારા લાંબી પૂછપરછ પણ કરવામાં આવી હતી.એક અહેવાલ અનુસાર, તેઓ લગભગ નવ કલાકની પૂછપરછ બાદ ઈડી કચેરીમાંથી બહાર આવ્યા હતા અને ફરી પૂછપરછ માટે બોલાવવામાં આવી શકે છે.આથી કેસમાં આગામી તબક્કે વધુ દસ્તાવેજો,નાણાકીય ખાતાઓ અને ડિજિટલ પુરાવાના આધારે પૂછપરછ આગળ વધવાની શક્યતા છે.
પિનરાઈ વિજયને આરોપો ફગાવ્યા
બીજી તરફ પિનરાઈ વિજયને ઈડીના હવાલા અને નાણાકીય વ્યવહાર સંબંધિત દાવાઓને નકારી કાઢ્યા છે.તેમણે પોતાની પુત્રી વીણાનો બચાવ કરતાં તપાસ અંગે સવાલો ઉઠાવ્યા હતા અને જણાવ્યું હતું કે તેમની પુત્રી વિરુદ્ધના મુદ્દાઓને તેના પરિવાર સાથેના સંબંધને કારણે વધુ મહત્વ આપવામાં આવી રહ્યું છે. આથી એક તરફ ઈડી તપાસમાં નવા નાણાકીય પુરાવા મળ્યાનો દાવો કરી રહી છે, જ્યારે બીજી તરફ વિજયન પરિવાર તપાસના રાજકીય પાસાં અંગે પ્રશ્નો ઉઠાવી રહ્યો છે.
રાજકીય વિવાદ પણ વકર્યો
કેસને કારણે કેરળના રાજકારણમાં પણ રાજકીય ટકરાવ વધ્યો છે.વિપક્ષના નેતાઓએ ઈડીના તાજેતરના દાવાઓના આધારે પિનરાઈ વિજયન અને તેમની પુત્રી સામે સવાલો ઉઠાવ્યા છે.બીજી તરફ વિજયને તપાસને લઈને રાજકીય પ્રેરણાના આક્ષેપો કર્યા છે. હા
હવે તપાસ કઈ દિશામાં?
ઈડી હવે સીએમઆરએલમાંથી એક્સાલોજિક સુધી પહોંચેલી રકમ, ત્યાર બાદના નાણાકીય વ્યવહારો, દુબઈમાં થયેલા કથિત હસ્તાંતરણ અને સંભવિત હવાલા વ્યવહારોની કડી તપાસી રહી હોવાનું અહેવાલોમાં સામે આવ્યું છે.આવનારા દિવસોમાં વધુ પૂછપરછ,દસ્તાવેજોની ચકાસણી અથવા નવી કાર્યવાહી થાય તો કેસની દિશા વધુ સ્પષ્ટ થઈ શકે છે.
