વૉશિંગ્ટનઃ ઈરાનના સર્વોચ્ચ નેતા આયાતુલ્લાહ અલી ખામેનીને અત્યંત ગુપ્ત અને અજ્ઞાત સ્થળે સુરક્ષિત રાખવામાં આવ્યા હોવાના ચોંકાવનારા અહેવાલ સામે આવ્યા છે.અમેરિકી સૂત્રોના દાવા મુજબ ખામેની હાલમાં એવા ભૂગર્ભ બંકરમાં છે,જેના સ્થાન વિશે ઈરાનના ટોચના અધિકારીઓને પણ કોઈ માહિતી નથી.
અમેરિકાની અગ્રણી સમાચાર સંસ્થાના અહેવાલ મુજબ ખામેની સુધી બહારની દુનિયાની માહિતી સીધી પહોંચાડવામાં આવતી નથી.ખાસ કુરિયર ચેઇન મારફતે તેમને સંદેશા મોકલવામાં આવે છે અને તેઓ પણ પોતાના આદેશો એ જ ગુપ્ત વ્યવસ્થા દ્વારા બહાર પહોંચાડે છે.
ખામેની સાથે સીધો સંપર્ક પણ અશક્ય!
સૂત્રોના જણાવ્યા અનુસાર ઈરાન સરકાર અને સેનાના વરિષ્ઠ અધિકારીઓ પણ ખામેની સાથે સીધી વાતચીત કરી શકતા દરેક માહિતી અને આદેશો માત્ર વિશ્વસનીય કુરિયરોની સાંકળ દ્વારા જ પહોંચાડવામાં આવી રહ્યા છે.આ અસામાન્ય સુરક્ષા વ્યવસ્થા ઈરાન-અમેરિકા વચ્ચે ચાલી રહેલી વાટાઘાટોમાં સૌથી મોટો અવરોધ બની રહી હોવાનું માનવામાં આવે છે.
ટોચના નેતાઓ પણ બંકરોમાં કેદ જેવી સ્થિતિમાં
અહેવાલોમાં એવો પણ દાવો કરવામાં આવ્યો છે કે ઈરાનના અનેક વરિષ્ઠ નેતાઓ અને સૈન્ય અધિકારીઓ પણ છેલ્લા કેટલાય દિવસોથી ભૂગર્ભ બંકરોમાં જ રહે છે.સુરક્ષાના કારણોસર તેઓ બહાર નીકળતા નથી અને એકબીજા સાથેની વાતચીત પણ મર્યાદિત રાખવામાં આવી રહી છે.કેટલાક અધિકારીઓએ તો દિવસો સુધી સૂર્યપ્રકાશ પણ જોયો નથી એવી ચર્ચા છે.
ઈરાનની સેનાઓ અલગ-અલગ રીતે કામ કરતી હોવાની આશંકા
નિરીક્ષકોનું માનવું છે કે આવી પરિસ્થિતિમાં ઈરાનની જળ, થળ અને વાયુસેના અલગ-અલગ રીતે નિર્ણય લઈ રહી હોવાની શક્યતા નકારી શકાય નહીં.કેન્દ્રિય સંકલન નબળું પડતાં અમેરિકા અને ઈઝરાયલ સાથે કોઈ મોટી સમજૂતી થવાની સંભાવનાઓ વધુ મુશ્કેલ બની રહી છે.
વ્હાઇટ હાઉસે મૌન સાધ્યું
આ સમગ્ર અહેવાલ અંગે અમેરિકાના વ્હાઇટ હાઉસ તરફથી વધુ કોઈ સત્તાવાર માહિતી આપવામાં આવી નથી.પ્રવક્તાએ માત્ર એટલું જ કહ્યું કે સુરક્ષા સંબંધિત બાબતો પર ટિપ્પણી કરવી યોગ્ય નથી.મધ્યપૂર્વમાં વધી રહેલા તણાવ વચ્ચે ખામેનીના ગુપ્ત સ્થાને રહેવાના અહેવાલોએ વૈશ્વિક રાજકીય વર્તુળોમાં ભારે ચર્ચા જગાવી છે.
