અમેરિકાના ઇલિનોઈસ રાજ્યના ઓરોરા વિસ્તારમાં નવરાત્રિ દરમિયાન હિન્દુ ધાર્મિક સ્થળને નિશાન બનાવવાની કથિત યોજનાનો પર્દાફાશ થયો છે.આ મામલે 19 વર્ષીય એલેક્ઝેન્ડ્રોસ પેપોરાકિસની પોલીસે ધરપકડ કરી છે.તપાસ દરમિયાન તેના ઘરેથી રાઇફલ ભરેલી મેગેઝિન,મોટી સંખ્યામાં કારતૂસ અને અન્ય વ્યૂહાત્મક સાધનો મળી આવ્યાં હોવાનું અહેવાલમાં જણાવાયું છે.આ ઘટનાએ અમેરિકામાં રહેતા હિન્દુ સમુદાયની સુરક્ષાને લઈને ચિંતા ઊભી કરી છે.
પોલીસના જણાવ્યા અનુસાર, આરોપી સાથે જોડાયેલા એક દસ્તાવેજમાં શ્વેત વર્ચસ્વવાદી વિચારધારાનો ઉલ્લેખ હતો.તેમાં દક્ષિણ એશિયાઈ સમુદાય અને ભારતીય મૂળના લોકો સામે હિંસા આચરવાની વાતો હોવાનો દાવો કરવામાં આવ્યો છે.તપાસ એજન્સીઓને આશંકા છે કે આરોપી મોટા પાયે ગોળીબાર કરીને અનેક લોકોને નિશાન બનાવવાની તૈયારીમાં હતો.આ કાવતરાની જાણ એક જાગૃત નાગરિકે પોલીસને કરી હતી.માઉન્ટ પ્રોસ્પેક્ટ પોલીસ વિભાગને મળેલી માહિતી મુજબ, સંબંધિત વ્યક્તિને આરોપી તરફથી કેટલાક ચિંતાજનક સંદેશા અને એક દસ્તાવેજ મળ્યાં હતાં.તેમાં કથિત હુમલાની યોજના તથા રાઇફલ અને શરીરનું રક્ષણ કરતા સાધનોની તસવીરો સામેલ હતી.આ માહિતીના આધારે તપાસ શરૂ કરવામાં આવી હતી.તપાસ દરમિયાન પોલીસને શંકા ગઈ કે આરોપી રવિવારે હુમલો કરવાની યોજના બનાવી રહ્યો હતો.પોલીસે 11 ઑક્ટોબરે તેની ધરપકડ કરી હતી. તેના નિવાસસ્થાને તપાસ કરતાં રાઇફલ અનેક ભરેલી મેગેઝિન, સેંકડો કારતૂસ અને અન્ય સાધનો મળી આવ્યાં હતાં.એક વિશેષ પ્રકારના રક્ષણાત્મક વસ્ત્ર પર શ્વેત વર્ચસ્વવાદી ચરમપંથી વિચારધારા સાથે સંકળાયેલા નિશાન પણ હોવાની વિગતો સામે આવી છે.
ઘટનાની ગંભીરતાને ધ્યાનમાં રાખીને પોલીસે ઓરોરા વિસ્તારનાં હિન્દુ ધાર્મિક સ્થળોનો સંપર્ક કરીને સંભવિત જોખમ અંગે જાણ કરી હતી.નવરાત્રિ દરમિયાન મંદિરોમાં મોટી સંખ્યામાં શ્રદ્ધાળુઓ એકત્ર થતા હોવાથી આવી ધમકી સુરક્ષા એજન્સીઓ માટે વિશેષ ચિંતાનો વિષય બની હતી.આ કેસની તપાસમાં અમેરિકાની સંઘીય તપાસ સંસ્થા એફબીઆઈ પણ જોડાઈ છે.હિન્દુ અમેરિકન ફાઉન્ડેશને કાયદા અમલીકરણ કરતી એજન્સીઓની ત્વરિત કાર્યવાહીનું સ્વાગત કર્યું હોવાનું અહેવાલમાં જણાવાયું છે.આરોપીને કોર્ટમાં રજૂ કર્યા બાદ તેને કસ્ટડીમાં રાખવાનો આદેશ આપવામાં આવ્યો હતો.આગામી 30 ઑક્ટોબરે તેને ફરી કોર્ટમાં રજૂ કરવામાં આવનાર હોવાનું અહેવાલમાં જણાવાયું છે.આ ઘટનાએ ફરી એકવાર સ્પષ્ટ કર્યું છે કે ધાર્મિક ઓળખના આધારે કોઈ સમુદાયને નિશાન બનાવવાના પ્રયાસો સામે સમયસર મળતી માહિતી અને પોલીસની ઝડપી કાર્યવાહી અનેક નિર્દોષ લોકોના જીવ બચાવવામાં નિર્ણાયક બની શકે છે.અમેરિકામાં વસતા હિન્દુઓ સહિત તમામ ધાર્મિક સમુદાયોની સલામતી અને ધાર્મિક સ્વતંત્રતાનું રક્ષણ કરવું જરૂરી છે.
