સુરતમાં યોજાયેલા એક કાર્યક્રમ દરમિયાન મુખ્યમંત્રી ભૂપેન્દ્ર પટેલ, કેન્દ્રીય જળશક્તિ મંત્રી સી.આર. પાટીલ અને કૃષિમંત્રી જીતુ વાઘાણી વચ્ચે પણ આ મુદ્દે ચર્ચા થઈ હતી.આ બેઠક બાદ દિલ્હીમાં ચારેય રાજ્યોના મુખ્યમંત્રીઓની બેઠક યોજવાનો નિર્ણય સામે આવ્યો છે.નર્મદાના પાણીના જથ્થા અને તેના ઉપયોગ અંગે રાજ્યો વચ્ચે સંકલન સાધીને ગુજરાતની જરૂરિયાતને પહોંચી વળવાનો પ્રયાસ કરવામાં આવશે.કેન્દ્રીય મંત્રી સી.આર. પાટીલે સુરતના કાર્યક્રમમાં પાણીની માગ અંગે વાત કરતાં રમૂજી અંદાજમાં કહ્યું હતું કે, સુરતમાં આવીને ગુજરાતને પાણી માટે દબાણ કરવામાં આવે છે, જાણે પોતાના જ ઘરમાં આવીને દાદાગીરી થતી હોય.તેમણે જણાવ્યું હતું કે મધ્યપ્રદેશના મુખ્યમંત્રી સાથે પણ આ મુદ્દે વાતચીત થઈ છે અને ચારેય રાજ્યોના મુખ્યમંત્રીઓ દિલ્હીમાં મળવાના છે.પાટીલે વધુમાં જણાવ્યું હતું કે પાણીની જરૂરિયાત પૂરી કરવા માટે ગુજરાત તરફથી પાણીના બદલામાં નાણાં અથવા નર્મદા જળવિદ્યુતમાંથી મળતી વીજળી આપવાની તૈયારી દર્શાવવામાં આવી છે.મધ્યપ્રદેશના મુખ્યમંત્રીએ પણ આ દિશામાં આગળ વધવા સંમતિ આપી હોવાનું તેમણે કહ્યું હતું.આ પ્રસ્તાવથી ગુજરાતને વધારાનું પાણી મળી શકે તેવી વ્યવસ્થા અંગે ચર્ચા થવાની શક્યતા છે.
પાણીની સમસ્યા સાથે ગુજરાતમાં વીજળીની માગ પણ વધવાની છે.શિયાળાની શરૂઆતમાં જ ગરમીનો અનુભવ થતાં વીજ વપરાશ વધવાની સંભાવના છે.રાજ્યમાં વીજળીની અછત ઊભી ન થાય તે માટે કેન્દ્ર સરકાર પાસેથી 1,000 મેગાવોટ વીજળી મેળવવાની માગ કરવામાં આવી છે.વડાપ્રધાન નરેન્દ્ર મોદી સાથેની મુલાકાત દરમિયાન પણ ગુજરાતની પાણી અને વીજળીની જરૂરિયાત અંગે ચર્ચા થઈ હતી.હવે કેન્દ્ર સરકાર આ વીજળી કેવી રીતે ઉપલબ્ધ કરાવશે તે અંગે પણ વ્યવસ્થા નક્કી થવાની છે.આગામી દિવસોમાં ગુજરાત માટે પીવાના પાણીની ઉપલબ્ધતા,ખેડૂતોને રવિ પાક માટે સિંચાઈનું પાણી,સૌરાષ્ટ્રના જળાશયોમાં પાણી પહોંચાડવું અને વીજળીની વધતી માગ પૂરી કરવી મુખ્ય પ્રાથમિકતાઓ રહેશે.દિલ્હીની બેઠકમાં નર્મદાના પાણીના વિતરણ અંગે શું નિર્ણય લેવાય છે તેના પર રાજ્યના ખેડૂતો અને નાગરિકોની નજર રહેશે.
