- ગોવા મેડિકલ કૉલેજના શબપરીક્ષણ અહેવાલમાં કુદરતી મૃત્યુની પુષ્ટિ; ૮ ઑક્ટોબરે સારવાર દરમિયાન ૪૫ મિનિટ સુધી બચાવવાના પ્રયાસો કરાયા હતા
પણજી : પીઢ અભિનેતા નાના પાટેકરના અચાનક નિધન પાછળનું કારણ સ્પષ્ટ થયું છે. ગોવા મેડિકલ કૉલેજ અને હૉસ્પિટલના વરિષ્ઠ તબીબે રવિવારે પુષ્ટિ કરી હતી કે શબપરીક્ષણ અહેવાલ મુજબ, હૃદયની મુખ્ય ધમનીમાં લોહીનો ગઠ્ઠો જામવાથી લોહીનો પ્રવાહ અવરોધાયો હતો અને તેના કારણે તેમને હૃદયરોગનો જીવલેણ હુમલો આવ્યો હતો.તબીબી અહેવાલમાં તેમના મૃત્યુને કુદરતી ગણાવવામાં આવ્યું છે.નાના પાટેકરનું ૮ ઑક્ટોબર, ૨૦૨૬ના રોજ વહેલી સવારે ગોવામાં આવેલા તેમના નિવાસસ્થાને તબિયત અચાનક બગડતાં નિધન થયું હતું.તેઓ ૭૫ વર્ષના હતા.
૪૫ મિનિટ સુધી બચાવવાના પ્રયાસો
નાના પાટેકર પણજી નજીક ડોના પૌલા વિસ્તારમાં રહેતા હતા.વહેલી સવારે તેમની તબિયત લથડતાં તેમના સંભાળ રાખનાર વ્યક્તિએ મદદ માટે હૉસ્પિટલનો સંપર્ક કર્યો હતો.ત્યારબાદ તેમને હૉસ્પિટલ લઈ જવા માટે ઍમ્બ્યુલન્સ મોકલવામાં આવી હતી.હૉસ્પિટલમાં તબીબોએ તેમને બચાવવા માટે આશરે ૪૫ મિનિટ સુધી હૃદય અને શ્વાસની પ્રક્રિયા ફરી શરૂ કરવાના પ્રયાસો કર્યા હતા.જોકે, તમામ પ્રયાસો છતાં તેમને બચાવી શકાયા નહોતા.સવારે લગભગ ૫.૧૦ વાગ્યે તેમને મૃત જાહેર કરવામાં આવ્યા હતા.
શબ પરીક્ષણમાં શું બહાર આવ્યું?
ગોવા મેડિકલ કૉલેજ અને હૉસ્પિટલમાં કરવામાં આવેલા શબપરીક્ષણમાં હૃદયની મુખ્ય ધમનીમાં લોહીનો ગઠ્ઠો બનવાને કારણે હૃદયના મોટા ભાગ સુધી લોહી પહોંચતું અટક્યું હોવાનું સામે આવ્યું હતું.આ સ્થિતિને કારણે હૃદયના સ્નાયુઓને ગંભીર નુકસાન પહોંચ્યું અને હૃદયરોગનો હુમલો આવ્યો હતો.નાના પાટેકરના મૃત્યુ બાદ ગોવા પોલીસે શરૂઆતમાં અસ્વાભાવિક મૃત્યુની નોંધ કરીને તપાસ શરૂ કરી હતી.અચાનક થયેલા મૃત્યુનું ચોક્કસ કારણ જાણવા માટે શબપરીક્ષણ સહિતની જરૂરી પ્રક્રિયા હાથ ધરવામાં આવી હતી.હવે તબીબી અહેવાલમાં મૃત્યુનું કારણ કુદરતી હોવાનું સ્પષ્ટ થયું છે.
પાંચ દાયકાની કારકિર્દીથી દર્શકોના દિલમાં સ્થાન
નાના પાટેકરે હિન્દી અને મરાઠી સિનેમામાં પોતાની આગવી અભિનયશૈલીથી વિશિષ્ટ સ્થાન મેળવ્યું હતું.ગંભીર ભૂમિકાઓથી લઈને પ્રભાવશાળી સંવાદો ધરાવતા પાત્રો સુધી,તેમણે અનેક યાદગાર અભિનય આપ્યા હતા. ‘ક્રાંતિવીર’, ‘પરિંદા’ અને ‘ખામોશી: ધ મ્યુઝિકલ’ જેવી ફિલ્મોમાંના તેમના અભિનયને વિશેષ ઓળખ મળી હતી.સિનેમામાં યોગદાન બદલ તેમને વર્ષ ૨૦૧૩માં પદ્મશ્રીથી સન્માનિત કરવામાં આવ્યા હતા.અભિનય ઉપરાંત તેઓ સામાજિક કાર્યોમાં પણ સક્રિય રહ્યા હતા.તેમના નિધનથી ભારતીય ફિલ્મજગતે એક અનુભવી અને વિશિષ્ટ અભિનેતા ગુમાવ્યો છે.
