ઉડતા પંજાબ! એન્ટી ડ્રગ ડ્રાઈવ ચલાવતા કાર્યકર્તા પરમિન્દર જોટાની ગોળી મારીને હત્યા

• માનસામાં મેડિકલ સ્ટોર પાસે ગોળીબારની ઘટના; નશીલા પદાર્થોના ગેરકાયદે વેચાણ સામે ચલાવતા હતા અભિયાન, હત્યાથી સ્થાનિકોમાં રોષ

માનસા, 13 ઑક્ટોબર : પંજાબના માનસા જિલ્લામાં નશીલા પદાર્થોના ગેરકાયદે વેચાણ સામે અભિયાન ચલાવવા માટે જાણીતા સામાજિક કાર્યકર્તા પરમિન્દર સિંહ જોથાની મંગળવારે સવારે ગોળી મારીને હત્યા કરવામાં આવી હતી.આ હુમલામાં તેમની સાથે રહેલા ત્રણ યુવાનો પણ ગંભીર રીતે ઘાયલ થયા છે. ઘટનાને પગલે વિસ્તારમાં તણાવનો માહોલ સર્જાયો છે અને પોલીસ દ્વારા તપાસ શરૂ કરવામાં આવી છે.પ્રાપ્ત અહેવાલો અનુસાર, પરમિન્દર સિંહ જોથા પોતાની ટીમ સાથે માનસા વિસ્તારમાં એક મેડિકલ સ્ટોર પાસે પહોંચ્યા હતા.આ દરમિયાન થયેલા ગોળીબારમાં તેમને અનેક ગોળીઓ વાગતાં ગંભીર ઈજાઓ થઈ હતી.તેમને તાત્કાલિક માનસા સિવિલ હોસ્પિટલ લઈ જવામાં આવ્યા હતા, જ્યાં તબીબોએ તેમને મૃત જાહેર કર્યા હતા.હુમલામાં કુલવિન્દર સિંહ,ગોવિંદ સિંહ અને બલતેજ સિંહ નામના ત્રણ યુવાનો પણ ઘાયલ થયા હતા.તેમને સારવાર માટે હોસ્પિટલમાં દાખલ કરવામાં આવ્યા છે.પરમિન્દર સિંહ જોથા પંજાબમાં નશાના વધતા દુષ્પ્રભાવ સામે સક્રિય રીતે અવાજ ઉઠાવતા હતા.ખાસ કરીને દવાઓની દુકાનો મારફતે કથિત રીતે વેચાતા પ્રતિબંધિત માદક પદાર્થો અને ‘ચિટ્ટા’ તરીકે ઓળખાતા હેરોઈન સામે તેઓ અભિયાન ચલાવતા હતા.તેઓ પોતાની ટીમ સાથે વિવિધ સ્થળોએ જઈને ગેરકાયદે વેચાણના આક્ષેપો સંબંધિત ઘટનાઓનું ચિત્રણ કરતા અને તેને સામાજિક માધ્યમો પર પ્રસારિત કરતા હતા.ઘટનાના દિવસે પણ તેઓ મેડિકલ સ્ટોર પાસે પોતાની ટીમ સાથે હાજર હતા અને સમગ્ર ઘટનાનું જીવંત પ્રસારણ થઈ રહ્યું હોવાના અહેવાલો છે.કેટલાક અહેવાલમાં મેડિકલ સ્ટોરના સંચાલક પર ગોળીબાર કરવાનો આરોપ મૂકવામાં આવ્યો છે.જોકે, હુમલા પાછળનું ચોક્કસ કારણ અને આરોપોની સત્યતા તપાસ બાદ જ સ્પષ્ટ થશે.

પોલીસ તપાસ તેજ, વિસ્તારમાં સુરક્ષા વધારાઈ

ઘટનાની જાણ થતાં જ પોલીસ અધિકારીઓ અને કર્મચારીઓ ઘટનાસ્થળે પહોંચ્યા હતા. પોલીસે આસપાસના વિસ્તારની તપાસ શરૂ કરી છે.હુમલામાં સંડોવાયેલા લોકોની ઓળખ કરવા અને તેમની હિલચાલનો પત્તો મેળવવા માટે સીસીટીવી દૃશ્યોની તપાસ કરવામાં આવી રહી છે. આરોપીઓને પકડવા માટે નાકાબંધી સહિતનાં પગલાં લેવામાં આવ્યાં હોવાના અહેવાલો છે.પોલીસ હત્યા પાછળના સંભવિત કારણો અને ઘટનાક્રમની વિવિધ દિશામાં તપાસ કરી રહી છે.નશા વિરોધી અભિયાન સાથે જોડાયેલા કાર્યકર્તાની હત્યાના સમાચાર ફેલાતાં માનસા અને આસપાસના વિસ્તારોમાં રોષ જોવા મળ્યો હતો.જોથાની પ્રવૃત્તિઓને કારણે તેઓ સ્થાનિક સ્તરે ઓળખ ધરાવતા હતા અને નશાની સમસ્યા સામે કામ કરતા લોકો સાથે જોડાયેલા હતા.હવે આ કેસમાં હુમલાખોરોની ઓળખ,હત્યા પાછળનું કારણ અને ઘાયલ યુવાનોની સ્થિતિ તપાસના મુખ્ય મુદ્દા છે.ઘટનાને પગલે વિસ્તારમાં કાયદો અને વ્યવસ્થા જળવાઈ રહે તે માટે પોલીસ બંદોબસ્ત વધારવામાં આવ્યો છે.