નોટિસમાં જણાવ્યા મુજબ, 16 ઑક્ટોબરના રોજ સ્વસ્તિક જાડેજાને ફાળવવામાં આવેલી બોલેરો કાર થલતેજ ફાયર સ્ટેશન પર ઉપલબ્ધ હતી.આ કારમાં જીપીએસની વ્યવસ્થા હોવા છતાં તેઓ સ્ટેશન ફાયર ઓફિસરને ફાળવવામાં આવેલી ફર્સ્ટ રિસ્પોન્સ વ્હીકલ લઈને ગયા હોવાનો આક્ષેપ છે.આ માટે પૂર્વમંજૂરી લેવામાં આવી નહોતી અને પાલડી કંટ્રોલ રૂમ અથવા રોજકામમાં જરૂરી નોંધ પણ કરવામાં આવી નહોતી એવો નોટિસમાં ઉલ્લેખ છે.નોટિસ પ્રમાણે, સંબંધિત વાહન આશરે 13 કલાક બાદ 17 ઑક્ટોબરની વહેલી સવારે 4:18 વાગ્યે ફાયર સ્ટેશન પર પરત લાવવામાં આવ્યું હતું.ત્યારબાદ સવારે 4:25 વાગ્યે વાહન અંગેની નોંધ કરવામાં આવી હોવાનો પણ ઉલ્લેખ છે.વાહનના ઉપયોગ અને નોંધણીમાં થયેલી આ પ્રક્રિયા અંગે ઇન્ચાર્જ CFOએ જવાબ માગ્યો હતો.આ દરમિયાન તેમની સાથે થયેલી બોલાચાલીનો મુદ્દો પણ નોટિસમાં સામેલ કરવામાં આવ્યો છે.વિભાગીય નોટિસમાં ગુજરાત સિવિલ સર્વિસિસ કન્ડક્ટ રૂલ્સ, 1971ના નિયમ 3 તથા સંબંધિત કાયદાકીય જોગવાઈઓના ભંગનો આક્ષેપ કરવામાં આવ્યો છે.આ વિવાદ વચ્ચે સ્વસ્તિક જાડેજાએ પણ ઇન્ચાર્જ CFO જયેશ ખડિયા સામે ચાર પાનાંનો પત્ર લખીને ACB તપાસની માગણી કરી છે.આમ, એક તરફ જાડેજા સામે સરકારી વાહનના ઉપયોગ અને ગેરશિસ્ત અંગે કાર્યવાહી શરૂ થઈ છે, તો બીજી તરફ તેમણે પોતાના જ વિભાગના ઉચ્ચ અધિકારી સામે તપાસની માગણી કરતાં મામલો વહીવટી વિવાદથી આગળ વધ્યો છે.
ફાયર વિભાગમાં હાલ નિયમિત CFO મિથુન મિસ્ત્રી તબિયતના કારણે રજા પર હોવાથી જયેશ ખડિયા ઇન્ચાર્જ તરીકે જવાબદારી સંભાળી રહ્યા છે.આ પરિસ્થિતિમાં બંને અધિકારીઓ વચ્ચેના વિવાદે વિભાગની આંતરિક કામગીરી અને વહીવટી વ્યવસ્થા અંગે પણ ચર્ચા જગાવી છે.ગરબા પાસના મુદ્દે આયોજકોની ફરિયાદથી શરૂ થયેલો આ વિવાદ હવે સરકારી વાહનોના ઉપયોગ,ફરજ દરમિયાનની જવાબદારી,વિભાગીય શિસ્ત અને ભ્રષ્ટાચાર વિરોધી તપાસની માગ સુધી પહોંચ્યો છે.હવે DFO સ્વસ્તિક જાડેજા નોટિસના જવાબમાં શું રજૂ કરે છે અને તેમની ACB તપાસની માગ અંગે આગળ શું કાર્યવાહી થાય છે તેના પર સૌની નજર રહેશે.
