દુબઈથી ડિપોર્ટ થયા બાદ વિરેન્દ્રસિંહ બૈસોયાને ભારત લાવવામાં આવ્યો છે.તપાસ એજન્સીઓના જણાવ્યા મુજબ, તેનું નામ મોટા આંતરરાષ્ટ્રીય ડ્રગ્સ નેટવર્ક સાથે જોડાયેલું છે.બૈસોયા સામે રેડ કોર્નર નોટિસ જારી કરવામાં આવી હોવાનું જણાવાયું છે અને હવે ભારત પહોંચ્યા બાદ તપાસ એજન્સીઓ તેની પાસેથી ડ્રગ્સના ઉત્પાદન,સપ્લાય અને વિદેશમાં મોકલાતી કન્સાઇનમેન્ટ અંગે મહત્વની વિગતો મેળવવાનો પ્રયાસ કરશે.આ કેસનું એક મહત્વનું કનેક્શન ફેબ્રુઆરી 2024માં સામે આવેલા મેફેડ્રોનના મોટા જથ્થાની જપ્તી સાથે જોડાય છે.તે સમયે પુણે પોલીસની કાર્યવાહી દરમિયાન પુણે અને દિલ્હીમાં મળીને આશરે 1700 કિલો મેફેડ્રોન જપ્ત કરવામાં આવ્યું હતું.પોલીસના જણાવ્યા પ્રમાણે તેની અંદાજિત કિંમત ₹3,000 કરોડથી ₹3,500 કરોડ વચ્ચે હતી.
દિલ્હીમાં 970 કિલો મેફેડ્રોન મળ્યું હતું
ફેબ્રુઆરી 2024ની કાર્યવાહી દરમિયાન દિલ્હીમાં લગભગ 970 કિલો મેફેડ્રોન જપ્ત કરવામાં આવ્યું હતું.પુણે પોલીસના જણાવ્યા મુજબ, આ ડ્રગ્સ નેટવર્કની તપાસ દરમિયાન તેની આંતરરાષ્ટ્રીય સપ્લાય ચેઇન વિશે પણ માહિતી સામે આવી હતી.પોલીસ તપાસમાં એવો ખુલાસો થયો હતો કે ડ્રગ્સના કેટલાક જથ્થાને દિલ્હી સ્થિત કુરિયર કંપની મારફતે લંડન મોકલવામાં આવતો હતો. કન્સાઇનમેન્ટને તૈયાર ખાદ્યપદાર્થોના પેકેટમાં છુપાવીને વિદેશ મોકલવામાં આવતું હોવાની માહિતી પણ પોલીસ તપાસમાં સામે આવી હતી.
પુણેની કેમિકલ ફેક્ટરીથી દિલ્હીની સપ્લાય ચેઇન સુધી
આ કેસની તપાસ માત્ર દિલ્હીમાં જ સીમિત નહોતી.પુણેના કુર્કુંભ MIDC વિસ્તારમાં આવેલી એક મેન્યુફેક્ચરિંગ યુનિટમાંથી પણ મોટી માત્રામાં મેફેડ્રોન મળી આવ્યું હતું.પોલીસના જણાવ્યા મુજબ, આ જ યુનિટમાંથી તૈયાર થતો ડ્રગ્સનો જથ્થો આગળ દિલ્હી સહિત અન્ય સ્થળોએ મોકલાતો હતો.પુણે પોલીસની કાર્યવાહી દરમિયાન વિવિધ સ્થળોએ દરોડા પાડવામાં આવ્યા હતા અને ઉત્પાદન તથા વિતરણ સાથે જોડાયેલા અનેક લોકોની ધરપકડ કરવામાં આવી હતી. તપાસનો મુખ્ય હેતુ માત્ર જપ્ત થયેલા ડ્રગ્સ સુધી સીમિત રાખવાને બદલે સમગ્ર સપ્લાય ચેઇન સુધી પહોંચવાનો હતો.
હવે બૈસોયાની પૂછપરછથી શું બહાર આવી શકે?
વિરેન્દ્રસિંહ બૈસોયાને ભારત લાવવામાં આવ્યા બાદ તપાસ એજન્સીઓ તેની કથિત ભૂમિકા અંગે વિગતવાર પૂછપરછ કરી શકે છે.ખાસ કરીને ડ્રગ્સની સપ્લાય,નાણાકીય વ્યવહારો,વિદેશી કનેક્શન અને અન્ય સંભવિત આરોપીઓ સાથેના સંબંધોની તપાસ મહત્વપૂર્ણ બની શકે છે.
લંડન કનેક્શનથી આંતરરાષ્ટ્રીય નેટવર્કની આશંકા
2024ના કેસમાં પોલીસ તપાસમાં લંડન સુધી પહોંચતી ડ્રગ્સ સપ્લાયની કડી સામે આવી હતી. દિલ્હીની કુરિયર કંપનીનો ઉપયોગ કરીને તૈયાર ખાદ્યપદાર્થોના પેકેટમાં મેફેડ્રોન છુપાવીને કન્સાઇનમેન્ટ મોકલવામાં આવતી હોવાની માહિતી પોલીસ દ્વારા આપવામાં આવી હતી.આ કારણે તપાસમાં માત્ર ડ્રગ્સ બનાવનારા લોકો જ નહીં, પરંતુ તેને એક શહેરમાંથી બીજા શહેરમાં પહોંચાડનાર, વિદેશમાં મોકલનાર અને આ સમગ્ર ગેરકાયદેસર વ્યવહારમાં નાણાકીય રીતે જોડાયેલા લોકો સુધી પહોંચવાનો પ્રયાસ કરવામાં આવ્યો હતો.
સંદીપ ધુનીયા સહિતના કનેક્શનની પણ તપાસ
આ સમગ્ર ડ્રગ્સ કેસની અગાઉની તપાસમાં સંદીપ ધુનિયાનું નામ પણ મુખ્ય આરોપીઓમાં સામે આવ્યું હતું. 2024ના અહેવાલોમાં તેને આ નેટવર્કના મુખ્ય શંકાસ્પદોમાંનો એક ગણાવવામાં આવ્યો હતો અને તે સમયે તે પોલીસની પકડથી બહાર હતો.હવે બૈસોયાને ભારત લાવવામાં આવતા તપાસ એજન્સીઓ તેની પાસેથી આ નેટવર્ક સાથે સંકળાયેલા અન્ય લોકો,વિદેશી સંપર્કો અને નાણાકીય વ્યવહારો અંગે માહિતી મેળવવાનો પ્રયાસ કરી શકે છે.
બૈસોયા સામેની કાર્યવાહી કેમ મહત્વપૂર્ણ છે?
આ કેસની સૌથી મોટી બાબત માત્ર મેફેડ્રોનની જપ્તી નથી. 2024ની તપાસમાં પોલીસને ઉત્પાદન સ્થળથી લઈને દિલ્હી અને ત્યાંથી આંતરરાષ્ટ્રીય ગંતવ્ય સુધી પહોંચતી સપ્લાય ચેઇનના સંકેતો મળ્યા હતા.હવે વિરેન્દ્રસિંહ બૈસોયા ભારતની તપાસ એજન્સીઓની કસ્ટડીમાં આવ્યા બાદ આ નેટવર્કમાં તેની કથિત ભૂમિકા કેટલી મહત્વની હતી અને તેની પાછળ અન્ય કોણ-કોણ લોકો સંકળાયેલા હતા તે અંગે વધુ વિગતો બહાર આવવાની શક્યતા છે.
