– ઈન્જેકશનના અભાવે કોરોનાના દર્દીઓ મરી રહ્યાં છે ત્યારે તેની અછત નિવારવા રાષ્ટ્રીય ભ્રષ્ટાચાર નીરોધક અને અત્યાચાર વિરોધી ટાઈગર્સ સંસ્થા દ્વારા જિલ્લા કલેકટર કચેરી પર દેખાવો, આરોગ્યમંત્રીના નામે આવેદનપત્ર આપ્યું, સાંસદ પાટીલ દ્વારા રજૂઆતના પગલે સુરત-નવસારી વચ્ચે માંડ 50 ઈન્જેકશન ફાળવવામાં આવ્યા.
સુરત : કોરાનાના દર્દીઓની સારવારમાં અસરકારક નીવડતા Tocilizumab and Rhemdesivir નામના ઈન્જેકશનની અછતના પગલે દર્દીઓના મોત થઈ રહ્યાં છે, એટલું જ નહિં સગાવ્હાલાના હાથમાં નાણાં હોવા છતાં આ ઈન્જેકશનના અભાવે દર્દીઓને બચાવી શકાતા નથી ત્યારે સુરતમાંથી ચૂંટાઈને ગુજરાતના આરોગ્ય મંત્રી બનેલા કુમાર કાનાણી સામે હવે મોરચો ખુલ્યો છે.આજરોજ બુધવાર તા. 8મીના રોજ રાષ્ટ્રીય ભ્રષ્ટાચાર નિરોધક અને અત્યાચાર વિરોધી ટાઈગર્સ સંસ્થા દ્વારા જિલ્લા કલેકટર કચેરી ખાતે ઈન્જેકશનની અછતના મામલે દેખાવો કરવામાં આવ્યા હતા તથા તેઓએ જિલ્લા કલેકટરના માધ્યમથી આરોગ્યમંત્રીને આવેદનપત્ર આપીને તત્કાળ આ ઈન્જેકશનની અછત નિવારવા માંગણી કરી હતી.જોકે આ સ્થિતિમાં સાંસદ સી.આર. પાટીલ દ્વારા રાજ્ય સરકારને રજૂઆત કરાતા સરકારે છેવટે સુરત અને નવસારી વચ્ચે 50 ઈન્જેકશનનો સ્ટોક ફાળવ્યો છે અને બીજા 50 આવતીકાલે ફાળવશે.જોકે આ સ્ટોક ક્યારે અને કયા દર્દીના સગાને મળ્યો હશે તે કહેવું મુશ્કેલ છે.
હાલ કોરોનાના દર્દીઓ માટે તેઓના પરિવારજનોને આ ઈન્જેકશન સહેલાઈથી મળતાં નથી. છેલ્લા એક અઠવાડિયાથી શહેરમાં આ સ્થિતિ છે અને જે સરકારી મેડિકલ સ્ટોર્સ પાસે કે ખાનગી હોસ્પિટલ પાસે આ ઈન્જેકશન છે તેઓ મનફાવે તે રીતે ભાવ વસુલી રહ્યાં છે.આ સ્થિતિમાં રાષ્ટ્રીય ભ્રષ્ટાચાર નિરોધક સંસ્થા આગળ આવી છે અને તેઓએ આવેદનપત્ર આપી જણાવ્યું છે કે ટોસીલિઝુમેબ નામના ઈન્જેકશનની હાલ અંત્યત જરૂરિયાત વર્તાઈ રહી છે અને તે બજારમાં સહેલાઈથી મળતાં નથી. કોરોનાના દર્દીને શ્વાસ લેવામાં વધારે તકલીફ થતી હોય તેવા દર્દીઓને ગુજરાત સરકારના આરોગ્ય વિભાગ દ્વારા આ ઈન્જકેશન આપવાની શરૂઆત કરવામાં આવી છે જેથી દર્દીઓને બચાવવાની ટકાવારી વધી છે.પરંતુ મોટાભાગના ડોકટરો દર્દીઓના સગાને આ ઈન્જકેશન લખીને આપે છે પણ ક્યાંય ઉપલબ્ધ જ નથી.જેના કારણે મેડિકલની દુકાનો પર ભારે અફરાતફરી મચી રહી છે.કોઈ પણ મેડિકલ સ્ટોર્સમાં આ ઈન્જેકશન ઉપલબ્ધ નથી માત્ર સ્મીમેર અને સિવિલ હોસ્પિટલમાં જ મળે છે પરંતુ જ્યાંથી ત્યાં મનફાવે તેવા ભાવ વસુલવામાં આવી રહ્યાં છે.તેના વિતરણની યોગ્ય વ્યવસ્થા સરકાર દ્વારા ગોઠવવામાં આવે તેવી ઉગ્ર માંગણી ટાઈગર ફોર્સ દ્વારા કરવામાં આવી છે.
