ગાંધીનગર તા.11 : ગુજરાતમાં કેટલાંક વખતથી કોરોના નબળો પડયો હોવાથી માસ્કનું ચેકીંગ હળવુ બનાવી દેવામાં આવ્યું છે.છતા રાજય સરકારે ગત વર્ષે એપ્રિલથી સપ્ટેમ્બરના છ માસના ગાળામાં જ માસ્ક પહેરવાનાં નિયમનો ભંગ કરનારા લોકો પાસેથી 168 કરોડનો તોતીંગ દંડ વસુલ્યો હતો.રાજય વિધાનસભામાં એક પ્રશ્નના લેખીત જવાબમાં ગૃહ વિભાગનો હવાલો સંભાળતા મુખ્યમંત્રી વિજય રૂપાણીએ જણાવ્યું હતું કે એપ્રિલથી સપ્ટેમ્બર દરમ્યાન 16,78,922 લોકોપાસેથી માસ્કના દંડ પેટે 168 કરોડ ઉઘરાવવામાં આવ્યા હતા.માસ્ક ન પહેરવા બદલ દંડની રકમ શરૂઆતમાં 200 હતી તો પછી વધારીને 500 અને ત્યારબાદ 1000 કરવામાં આવી હતી.
રાજય સરકારે ઓકટોબર પછી વસુલેલા માસ્કના દંડના આંકડા આવ્યા ન હતા છતાં સરેરાશ મહીને 28 કરોડનો દંડ નાખવામાં આવે તો એપ્રિલ 2020 થી ફેબ્રુઆરી 2021 ના ગાળાની દંડની કુલ રકમ 308 કરોડ જેવી થઈ શકે.ગુજરાત કે દેશમાંથી કોરોના હજુ ગયો નથી ફરી ઉથલો મારવા લાગ્યો છે ત્યારે સ્થાનિક સ્વરાજયની ચૂંટણી વખતે સરકારે કાયદાનો અમલ હળવો કરી નાખ્યો હતો. કેટલાંક વખતથી ચેકીંગ પણ ધીમુ છે.હાઈકોર્ટે પણ ચૂંટણી રેલી-કાર્યક્રમોમાં કોરોના ગાઈડલાઈનનું પાલન ન કરવા બદલ નારાજગી ચિંતા દર્શાવી હતી.
