પલસાણા : સુરત જિલ્લાના પલસાણા તાલુકાનાં બલેશ્વર ગામની સીમમાં ને.હા.નં-48 ઉપરથી વિદેશી દારૂ ભરેલ ટેમ્પો ઝડપાયો.ટેમ્પામાં સોફા અને ફર્નિચરની આડમાં લઈ જવાતો વિદેશી દારૂનો જથ્થો એલસીબી પોલીસે ઝડપી પાડ્યો હતો.અને કુલ 4.03 લાખનો મુદ્દામાલ કબ્જે કરી ચાલકને વોંટેડ જાહેર કર્યો હતો.
પ્રાપ્ત માહિતી અનુસાર સુરત જિલ્લા એલસીબી પોલીસની ટીમ પલસાણા વિસ્તારમાં પેટ્રોલીંગમાં હતી.તે દરમ્યાન એ.એસ.આઈ કિરણ સોમાભાઇ તથા પો.કો જગદીશભાઈ આબાજીભાઈ નાઓને સંયુક્ત રીતે બાતમી મળી હતી જેથી તેમણે બલેશ્વર ગામની સીમમાં ને.હા-48 ઉપર વોચ ગોઠવી હતી તે દરમ્યાન બાતમી મુજબનો ટેમ્પો નંબર જીજે-15-વી-2765 આવતા તેને અટકાવવાની કોશિશ કરી હતી ત્યારે ચાલક ટેમ્પો પૂરઝડપે હંકારી ભાગવા લાગ્યો હતો.પોલીસે તેનો પીછો કરતાં ચાલક સહયોગ હોટલ નજીક ટેમ્પો મૂકી ભાગી છૂટ્યો હતો.ઘટના સ્થળે પહોંચેલ પોલીસે ટેમ્પામાં તપાસ કરતાં ટેમ્પામાં સોફાસેટ અને ફર્નિચર જોવા મળ્યા હતા.એલસીબી પોલીસે જેની તપાસ કરતાં સોફામાં બનાવેલ ચોરખાનામાંથી વિદેશી દારૂની નાની મોટી કુલ 1499 બોટલ કિંમત રૂ. 1,73,575 તથા ટેમ્પો મળી કુલ 4,03,575 નો મુદ્દામાલ કબ્જે કરી ચાલકને વોંટેડ જાહેર કરી ગુનો નોંધી આગળની કાર્યવાહી હાથ ધરી છે.
