પલસાણા : પલસાણા તાલુકાના ચલથાણ ગામ ખાતે સમોસા બનાવતા શ્રમજીવીની દીકરીના લગ્ન હતા અને મકાનમાં ગેસનો બાટલો લીક થતા ભયંકર આગ લાગી હતી આગમાં કોઈ જાનહાનિ થવા પામી ન હતી પરંતુ સંપૂર્ણ મકાન સહીત દીકરીનો તમામ કરિયાવર અને બચાવેલા રોકડા રૂપિયા પણ આગમાં બળીને ખાખ થઇ ગયા હતા.
પલસાણા તાલુકાના ચલથાણ ગામ ખાતે આવેલ યોગેશ્વર નગરમાં પરપ્રાંતીય પરિવાર સમોસા ઘરે બનાવીને ચલથાણ સહીત અન્ય ગામમાં વહેંચીને પોતાનું ગુજરાન ચલાવે છે.તેઓ રાબેતા મુજબના સમયમાં પોતાના મકાનની અંદર સમોસા બનાવતા હતા તે દરમિયાન ગેસનો બાટલો બદલતી વખતે ગેસનો બાટલો લીક થતા આગ લાગી હતી જેથી સમગ્ર પરિવાર મકાન બહાર નીકળીને સોસાયટીમાં રહેતા અન્ય લોકોને બોલાવ્યા હતા પરંતુ ત્યાં સુધી આગે ભયંકર સ્વરૂપ પકડ્યું હતું અને સ્થાનિક લોકોએ આગ પર કાબુ મેળવવાનો પ્રયાસ કર્યો હતો પરંતુ મકાનમાં અન્ય બે ગેસના બાટલા હોવાના ભયથી સ્થાનિક લોકો મકાન નજીક જઈ શક્યા ન હતા જેથી કરીને જાગૃત નાગરિકે પોલીસને જાણ કરી હતી જેથી ગેસના બાટલા અંદર હોવાથી પોલીસે તત્કાલ કડોદરા ફાયર વિભાગને ઘટનાની જાણ કરી હતી ઘટનાની જાણ ફાયર વિભાગને થતા ફાયર વિભાગ ઘટના સ્થળે તત્કાળ દોડી આવ્યું હતું અને સૌ પ્રથમ પાણીનો મારો કરીને અંદર રહેલા બે ગેસના બાટલાનો રેસ્ક્યુ કર્યો હતો અને આગ પર ભારે જહેમત બાદ કાબુ મેળવ્યો હતો તો બીજી તરફ જે મકાનમાં આગ લાગી હતી તે પરિવાર વર્ષોથી પરિશ્રમ કરીને ગુજરાન ચલાવતા આવ્યા છે ત્યારે તેઓના મકાનમાં રહેલો તમામ ઘર વખરી સહિતનો અન્ય સામાન આગમાં બળીને ખાખ થઇ ગયો હતો તો બીજી તરફ સદનશીબે કોઈને જાનહાનિ થવા પામી ન હતી
રોકડા રૂપિયા અને દીકરીનો કરિયાવર પિતાના નજરની સામે જ આગમાં બળીને ખાખ
તો બીજી તરફ જાણવા મળ્યું હતું કે ઘટનામાં ભોગ બનનાર પરિવારની દીકરીના બે દિવસમાં લગ્ન પ્રસંગ યોજાવાનો હતો અને તેઓ આવતી કાલે પોતાના વતન તરફ પોતાની દીકરીના લગ્નનો પ્રસંગ ઉજવવા માટે જવાના હતા અને આજરોજ આ ઘટના બનતા દીકરીના લગ્ન માટે બચાવેલા રોકડા રૂપિયા અને દીકરીનો કરિયાવર પિતાના નજરની સામે જ આગમાં બળીને ખાખ થઇ ગયો હતો જે જોતા જ પિતા ડૂસકે ને ડૂસકે રડી પડ્યા હતા કે પોતાની વ્હાલ સોઈ દીકરી માટે લાવેલ તમામ સમાન આગમાં ભસ્મ ભૂત થઈ ગયો
