ગાઝા : ઈઝરાયેલ અને પેલેસ્ટાઈનના સમર્થક ઉગ્રવાદી સંગઠન હમાસ વચ્ચે ભારે લોહિયાળ જંગ જામ્યો છે.ઈઝરાયેલની એરસ્ટ્રાઈકમાં અત્યાર સુધીમાં ૧૩૦ પેલેસ્ટાઈની નાગરિકોનાં મોત થઈ ચૂક્યા છે.અસંખ્ય કમાન્ડર્સ ઠાર થઈ ચૂક્યા હોવાનો દાવો ઈઝરાયેલની આર્મીએ કર્યો હતો.
ઈજિપ્ત અને અમેરિકાના રાજદૂતોએ યુદ્ધવિરામ માટે બંને પક્ષે વાતચીત કરી હતી.ખાસ તો ઈજિપ્તના પ્રતિનિધિઓએ પહેલાં હમાસ સાથે વાત કરી હતી અને પછી ઈજિપ્ત સાથે પણ એ મુદ્દે વાત કરી હતી.એક દિવસના યુદ્ધવિરામનો પ્રસ્તાવ બંને પક્ષે મૂકવામાં આવ્યો હતો,પરંતુ ઈઝરાયેલે એ પ્રસ્તાવ નકારી દીધો હતો અને અસંખ્ય એરસ્ટ્રાઈક ચાલુ રાખી હતી.
ઈઝરાયેલે યુક્તિપૂર્વક હમાસના કમાન્ડર્સને ટનલમાં ગોઠવીને તેને ખાતમો બોલાવી દીધો હતો.ઈઝરાયેલે મીડિયામાં એવો પ્રચાર કરાવ્યો હતો કે ઈઝરાયેલના સૈનિકો જમીન માર્ગે હમાસ સામે જંગ લડશે.એ પછી ઈઝરાયેલના સૈનિકોને અધવચ્ચે જ ખતમ કરી દેવા હમાસના સૈનિકો જમીનની નીચે બનાવેલી ટનલમાં ગોઠવાઈ ગયા હતા.એ પછી ઈઝરાયેલે એરસ્ટ્રાઈક કરીને અસંખ્ય બોમ્બ નીચે પાડયા હતા.જેમાં હમાસના સૈનિકોનો કચ્ચરઘાણ નીકળી ગયો હતો.ઈઝરાયેલે દાવો કર્યો હતો કે અસંખ્ય કમાન્ડર્સ માર્યા ગયા છે.પરંતુ હમાસે માત્ર ૨૦ કમાન્ડર્સના મોત થયાનું જણાવ્યું હતું.
ઈઝરાયેલની એરસ્ટ્રાઈકમાં અત્યાર સુધીમાં ૧૩૦ કરતાં વધુ લોકો માર્યા ગયા છે.જેમાં ૩૧ બાળકો અને ૨૦ મહિલાઓનો સમાવેશ થાય છે.ગાઝા પટ્ટી નજીક રહેતાં લોકોએ સ્થળાંતર શરૃ કર્યું હતું.અત્યાર સુધીમાં ૯૫૦ લોકો ગંભીર રીતે ઘાયલ થઈ ચૂક્યા છે. હમાસના રોકેટ હુમલામાં અત્યાર સુધીમાં ૯ ઈઝરાયેલી નાગરિકોનાં મોત થયા છે.બીજી તરફ ઈઝરાયેલમાં પેલેસ્ટાઈનનું સમર્થન કરતાં મુસ્લિમ નાગરિકો પર સુરક્ષાદળોએ ગોળીઓ વરસાવી હતી. જેમાં ૧૧ નાગરિકોનાં મોત થયા હતા.
બંને તરફથી અત્યાર સુધીમાં પાંચ હજાર કરતાં વધુ રોકેટો સામ-સામા છૂટયા હોવાનો અંદાજ છે.ઈઝરાયેલી લશ્કરે કહ્યું હતું કે હમાસે ૨૩૦૦ રોકેટ ઈઝરાયેલ તરફ ફેંક્યા છે. એમાંથી ઘણાં ખરા તો હવામાં જ ઉડાવી દેવાયા હતા
