લઠ્ઠાકાંડ બાદ રાજકારણ તેજ : આપનાં રાષ્ટ્રીય નેતાએ રાજ્યનાં ગૃહમંત્રીનું રાજીનામું માંગ્યું

– ભાજપને સરકાર ચલાવતા આવડતી નથી,લોકોની સુરક્ષા જાળવતા આવડતી નથી : ઈસુદાન ગઢવી
– ભાજપના શાસનમાં દર વર્ષે લઠ્ઠાકાંડની ઘટના સામે આવે છે અને લોકોના મોત થાય છે : ઈસુદાન ગઢવી

આમ આદમી પાર્ટીના નેશનલ જોઈંટ જનરલ સેક્રેટરી ઇસુદાન ગઢવીએ એક મહત્વપૂર્ણ બાબતે વિડિયોના માધ્યમથી પ્રતિક્રિયા આપતા કહ્યું કે, ગુજરાત માં ખુબ જ દુઃખદ ઘટના ઘટી છે.લઠ્ઠાકાંડના કારણે 25 થી વધુ લોકોના મૃત્યુ થયા છે.અને હજી 20 જેટલા લોકો ગંભીર હાલતમાં હોસ્પિટલમાં છે.જે ગામોમાં આ ઘટના બની છે, તે ગામના લેટર પેડ પર મહિનાઓ પહેલા લખીને આપ્યું હતું કે, અહીંયા ખુબ દારૂ વેચાય છે.લઠ્ઠાકાંડ થવાની શક્યતાઓ છે, ખુબ ઝગડાઓ થાય છે,છતાંય સરકાર તરફથી તેના વિરુદ્ધ કોઈ પગલાં ભરવામાં આવ્યા નથી.આ ઘટના ગુજરાતમાં પહેલીવાર ઘટી નથી.જ્યારથી ગુજરાતમાં ભાજપ નું શાસન આવ્યું છે,ત્યારથી દર વર્ષે લઠ્ઠાકાંડ ની ઘટના સામે આવે છે અને લોકોના મોત થાય છે.

આજે ગુજરાતમાં 25થી વધુ લોકો મૃત્યુ પામ્યા છે.આ ઘટનાની જાણ થતા ખુબ જ દુઃખ થયું છે.આ ઘટના માં સંપૂર્ણ બેદરકારી ભાજપ સરકાર ની છે.આ ઘટના પરથી ખબર પડે છે કે, ભાજપને સરકાર ચલાવતા આવડતી નથી, લોકોની સુરક્ષા જાળવતા આવડતી નથી.ઈસુદાન ગઢવી એ કહ્યું કે, હું ગુજરાતની સલામતી માટે ગુજરાતની જનતા અને આમ આદમી પાર્ટી વતી ગુજરાતના મુખ્યમંત્રી અને ગુજરાતના ગૃહમંત્રીનું નૈતિકતા ધોરણે રાજીનામું માંગુ છું.આ સાથે દિલ્હીનાં મુખ્યમંત્રી અરવિંદ કેજરીવાલે ટ્વીટ કરીને લઠ્ઠાકાંડમાં મૃત્યુ પામેલાને શ્રદ્ધાજંલિ આપી હતી અને આજે ભાવનગરમાં હોસ્પિટલમાં સારવાર લઇ રહેલા દર્દીઓની મુલાકાતે જવાનું જણાવ્યું હતુ.