ઘરે બનાવેલા માસ્ક પહેરો, ખાસ કરીને બહાર નીકળતા સમયે માસ્ક પહેરવુ જરુરી
સ્વાસ્થ કર્મી, કોરોના દર્દી કે તેમના સંપર્કમાં આવતા લોકોએ ઘરે બનાવેલા માસ્કનો ઉપયોગ ન કરવો
એજન્સી, નવી દિલ્હી
વિતેલા દિવસોમાં કોરોના વાયરસના કેસોમાં થયેલા વધારાને ધ્યાનમાં રાખીને દેશના સ્વાસ્થ વિભાગે મોં પર માસ્ક પહેરીને એટલે કે ચહેરો ઢાંકીને બહાર નીકળવાની એડવાયઝરી જાહેર કરી છે. સ્વાસ્થ વિભાગના સંયુક્ત સચિવ લવ અગ્રવાલે શનિવારે પત્રકાર પરિષદ યોજીને આ જાણકારી આપી હતી.
અગ્રવાલે જણાવ્યુ કે, દેશમાં એક દિવસમાં 601 નવા કેસ સામે આવ્યા છે. જેની સાથે કુલ કેસોની સંખ્યા વધીને 2902 થઇ છે, આ કેસો પૈકી 30 ટકા કેસો તબલીગી જમાતના સભ્યો છે. દેશમાં કુલ 68 લોકો કોરોના ચેપથી જીવ ગુમાવી ચૂક્યા છે. તેમણે WHOના રિપોર્ટનો હવાલો આપતા કહ્યુ કે એક દિવસમાં 4000થી વધારે લોકોની મોત થઇ રહી છે આથી, સરકાર તરફથી અપાયેલા નિર્દેશોનું પાલન કરો.
સરકારે કોરોના વાયરસના કેસોમાં અચાનક આવેલો વધારો જોતા શનિવારે એક એડવાયઝરી જાહેર કરતા કોરોનાના ફેલાવાને રોકવા માટે લોકોને ઘરે બનાવેલા માસ્ક પહેરવા અપીલ કરી છે. ખાસ કરીને તેઓ જ્યારે ઘરથી બહાર નીકળતા હોય ત્યારે માસ્ક પહેરવો અનિવાર્ય છે. સરકાર મુજબ ઘરે બનાવેલા માસ્કના ઉપયોગથી મોટા પ્રમાણમાં લોકોને કોરોના વાયરસના ચેપથી બચાવી શકાશે. સરકાર મુજબ ઘણા દેશોએ ઘરે બનાવેલા માસ્કનો ઉપયોગ વધારે ફાયદાકારક હોવાનો દાવો પણ કર્યો છે.સરકારે એડવાયઝરીમાં સલાહ પણ આપી હતી કે, કોરોનાથી ચેપગ્રસ્ત ન હોય એવા અથવા જે લોકોને શ્વાસ લેવામાં તકલીફ નથી તેવા જ લોકો ઘરે બનાવેલા માસ્કનો ઉપયોગ કરે.
ભારત સરકારે તેની અડવાયઝરીમાં ખાસ પ્રકારની માહિતી આપતા જણાવ્યુ કે, ઘરે બનેલા માસ્કથી ચોક્કસપણે મદદ મળશે, પરંતુ તેનો ઉપયોગ સ્વાસ્થ કર્મીઓ અને દર્દીઓ કે તેમના સંપર્કમાં આવતા લોકો માટે યોગ્ય નથી. આ પ્રકારના લોકો માટે ખાસ પ્રકારનના માસ્ક પહેરવા જણાવ્યુ હતું.
સ્વાસ્થ વિભાગે જણાવ્યુ કે કોરોના વાયરસ સામેની જંગમાં સરકાર અને દેશ એક અંશે સફળ થયા છે, પરંતુ એક નાની ભૂલ પરિસ્થિતિઓને બગાડી શકે છે. દેશના 17 રાજ્યોમાં તબલીગી જમાતથી સંકળાયેલા લોકોમાંથી 1023માં કોરોનાથી ચેપગ્રસ્ત હોવાનુ પૂરવાર થયુ છે. કુલ કેસોમાંથી 30 ટકા કેસો તબલીગી જમાતથી સંકળાયેલ છે.
