ઈટાલી બાદ સ્પેનમાં આ વાયરસથી સૌથી વધારે લોકોના મોત નિપજ્યા છે
એજન્સી, મેડ્રિડ
સ્પેનમાં છેલ્લા 24 કલાકમાં કોરોના વાયરસના સંક્રમણના કારણે 900થી વધારે લોકોના મોત નિપજ્યા છે. દેશમાં આવું સતત બીજી વખત થયું છે જ્યારે સંક્રમણના કારણે એક જ દિવસમાં 900થી વધારે લોકોના મોત નિપજ્યા હોય. સરકાર તરફથી શુક્રવારના રોજ જાહેર કરાયેલા આંકડાઓ અનુસાર ઈટાલી બાદ સ્પેનમાં આ વાયરસથી સૌથી વધારે લોકોના મોત નિપજ્યા છે. સ્પેનમાં છેલ્લા 24 કલાકમાં 932 લોકોએ કોરોના વાયરસના કારણે અંતિમ શ્વાસ ભર્યા છે.
દેશમા અત્યાર સુધીમાં આ સંક્રમણના કારણે 10,935 લોકો મોતને ભેટી ચૂક્યા છે તેમજ 1,176,710 લોકો જીવલેણ કોરોના વાયરસની લપેટમાં આવી ગયા છે. જોકે, સ્વાસ્થ્ય મંત્રાલયના આંકડાઓ પરથી એ વાતની પુષ્ટિ થાય છે કે નવા કેસ અને મૃતકોની સંખ્યામાં વૃદ્ધિ થવાના પ્રમાણમાં સતત ઘટાડો નોંધાયો છે.
ગયા અઠવાડિયાના મધ્યમાં સંક્રમણ દર 20 ટકા અને ગુરૂવારના રોજ 7.9 ટકા વધી ગયો હતો જ્યારે નવા આંકડાઓ અનુસાર તેમાં 6.8 ટકાનો વધારો નોંધાયો છે. આ ઉપરાંત દરરોજ કોરોનાના કારણે મૃત્યુ પામનાર લોકોની સંખ્યામાં થઈ રહેલા વધારાના દરમાં પણ ઘટાડો નોંધાયો છે. શુક્રવારના રોજ મૃતકની સંખ્યામાં 9.3 ટકાના દરથી વૃદ્ધિ થઈ હતી જ્યારે ગુરૂવારના રોજ આ દર 10.5 ટકા અને 25 માર્ચના રોજ આ દર 27 ટકા હતો.
