કેરળના એર્નાકુલમ જિલ્લામાં કોચી આંતરરાષ્ટ્રીય હવાઈમથક નજીક સર્જાયેલા ગંભીર માર્ગ અકસ્માતમાં બે યુવતીઓ સહિત ત્રણ લોકોનાં મોત થયાં છે.રવિવારે વહેલી સવારે પૂરઝડપે આવી રહેલી મિની કૂપર કારે સ્કૂટરને પાછળથી ટક્કર મારતાં આ દુર્ઘટના સર્જાઈ હતી.પોલીસે કાર ચલાવી રહેલા 19 વર્ષીય સુહેલ સજીવની ધરપકડ કરીને વધુ તપાસ હાથ ધરી છે.
અકસ્માત બાદના કથિત નિવેદનથી રોષ
અહેવાલ અનુસાર, અકસ્માત બાદ સ્થાનિક લોકોએ કારચાલકને ઘેરી લીધો હતો.આ દરમિયાન તેણે કથિત રીતે પપ્પા બધું સંભાળી લેશે એવું નિવેદન આપ્યું હતું.આ શબ્દોને પગલે લોકોમાં રોષ ફેલાયો હતો.
ચા પીને પરત ફરતાં ત્રણ મિત્રો અકસ્માતનો ભોગ બન્યા
પ્રાથમિક વિગતો મુજબ, અકસ્માત રવિવારે વહેલી સવારે આશરે બે વાગ્યે નેદુમ્બાસેરી વિસ્તારમાં થયો હતો. સ્કૂટર પર સવાર ત્રણ મિત્રો નજીકની દુકાનેથી ચા પીને ઘરે પરત ફરી રહ્યા હતા.એ દરમિયાન પાછળથી આવેલી મિની કૂપરે તેમના સ્કૂટરને જોરદાર ટક્કર મારી હતી.આ અકસ્માતમાં દેવિકા (વાયનાડ), ગોપિકા (પલક્કડ) અને ઇઝાઝ (કર્ણાટક)નાં મોત થયાં હોવાનું અહેવાલમાં જણાવાયું છે.ત્રણેય ત્રિક્કાકરા વિસ્તારમાં નોકરી કરતા હતા.ગંભીર રીતે ઘાયલ થયેલા ત્રણેયને સારવાર માટે હોસ્પિટલ લઈ જવાયા હતા,પરંતુ તેમને બચાવી શકાયા નહોતા.
દારૂના સેવનની આશંકા, તબીબી અહેવાલની રાહ
અકસ્માાત બાદ કારચાલકે દારૂ પીધો હોવાની આશંકા વ્યક્ત કરવામાં આવી છે.અહેવાલ મુજબ, તેણે બીયર પીધું હોવાની વાત કહી હતી.જોકે, એર્નાકુલમના પોલીસ અધિક્ષક કે.એસ. સુદર્શનના જણાવ્યા અનુસાર, નશાના સેવનની પુષ્ટિ માટે કારચાલકના લોહીના નમૂના લેવામાં આવ્યા હતા અને અહેવાલની રાહ જોવાઈ રહી હતી.પોલીસે કારની તપાસ માટે ફોરેન્સિક પ્રક્રિયા પણ હાથ ધરી છે.અકસ્માતના ચોક્કસ કારણો અને કારની ઝડપ સહિતના પાસાંની તપાસ કરવામાં આવી રહી છે.આરોપી પાસે માન્ય વાહનચાલન પરવાનો હોવાનું પણ અહેવાલમાં જણાવાયું છે.
હોસ્પિટલમાં આરોપી પર હુમલાનો પ્રયાસ
અકસમાત બાદ તબીબી તપાસ માટે આરોપીને હોસ્પિટલ લઈ જવામાં આવ્યો ત્યારે મૃતકોના કેટલાક પરિચિતો સાથે તેની બોલાચાલી થઈ હતી.ત્યારબાદ તેના પર હુમલો કરવાનો પ્રયાસ થયો હોવાનું અહેવાલમાં જણાવાયું છે.પોલીસે દરમિયાનગીરી કરીને પરિસ્થિતિ કાબૂમાં લીધી હતી અને હુમલાના આરોપમાં એક વ્યક્તિને કસ્ટડીમાં લીધો હતો.પોલીસ હવે તબીબી અને ફોરેન્સિક અહેવાલના આધારે આગળની કાયદેસરની કાર્યવાહી કરશે.આ દુર્ઘટના ફરી એકવાર માર્ગ સલામતી,જવાબદાર વાહનચાલન અને નશાની સ્થિતિમાં વાહન ચલાવવાના જોખમો અંગે ગંભીર સવાલો ઊભા કરે છે.
