ઓટાવા : કેનેડા અને અમેરિકામાં ભારતીય મૂળના વેપારીઓને નિશાન બનાવી કરોડોની ખંડણી વસૂલતી કુખ્યાત ‘ફોર બ્રધર્સ ગેંગ’ સામે કેનેડાની પોલીસે અત્યાર સુધીની સૌથી મોટી કાર્યવાહી હાથ ધરી છે.પોલીસે આંતરરાષ્ટ્રીય ગુનાખોર જાળ સાથે જોડાયેલા 17 આરોપીઓને ઝડપી પાડ્યા છે,જ્યારે તેમની સામે કુલ 106 ગુનાઓ નોંધવામાં આવ્યા છે.
તપાસ એજન્સીઓના જણાવ્યા મુજબ ‘ફોર બ્રધર્સ ગેંગ’ વેપારીઓમાં ખોફ ફેલાવવા અંધાધૂંધ ગોળીબાર,આગચંપી અને જીવલેણ હુમલાઓ કરતી હતી. ખાસ કરીને ભારતીય અને દક્ષિણ એશિયાઈ વેપારીઓને ડરાવીને મોટી રકમની ખંડણી ઉઘરાવવાનું મોટું જાળ ચલાવવામાં આવતું હતું.
ટોરોન્ટોની પીલ રિજિયન પોલીસ દ્વારા જાહેર કરાયેલી માહિતી અનુસાર, ગેંગે કેનેડાના બ્રામ્પટન,મિસિસાગા,કેલેડોન અને બ્રિટિશ કોલંબિયા સહિત અનેક વિસ્તારોમાં આતંક મચાવ્યો હતો.એટલું જ નહીં, અમેરિકાના કેલિફોર્નિયા રાજ્યમાં પણ ભારતીય વેપારીઓને ધમકીઓ આપવામાં આવી હતી.
પોલીસ તપાસમાં બહાર આવ્યું છે કે ગેંગ કુલ 24 હિંસક ઘટનાઓમાં સામેલ હતી,જેમાંથી 14 હુમલાઓ સીધા ‘ફોર બ્રધર્સ ગેંગ’ દ્વારા કરવામાં આવ્યા હતા. વેપારીઓમાં દહેશત ફેલાવવા અલગ-અલગ સ્થળોએ 324 ગોળીઓ ચલાવવામાં આવી હતી.ખંડણી આપવાનો ઇનકાર કરનાર વેપારીઓ,ભોજનાલય સંચાલકો અને વાહન પરિવહન વ્યવસાય સાથે જોડાયેલા લોકો પર જીવલેણ હુમલાઓ કરવામાં આવ્યા હતા.ઓન્ટારિયોના કેલેડોન વિસ્તારમાં એક મકાન પર ગોળીબાર અને આગચંપી કર્યા બાદ થોડા જ સમયમાં બ્રામ્પટનમાં આવેલી કંપનીને પણ નિશાન બનાવવામાં આવી હતી.
અહેવાલો મુજબ ઝડપાયેલા 17 આરોપીઓમાંથી એકપણ કેનેડાનો નાગરિક નથી.કેનેડા સરકાર હાલમાં પોતાની ધરતી પર સક્રિય આંતરરાષ્ટ્રીય ગુનાખોર ગઠબંધનો સામે કડક કાર્યવાહી ચલાવી રહી છે.તપાસમાં વધુ એક ચોંકાવનારો ખુલાસો થયો છે કે આ ગેંગ નકલી શિક્ષણ સંસ્થાઓ અને ઇમિગ્રેશન સલાહકારોના માધ્યમથી કેનેડા પહોંચતા આર્થિક રીતે નબળા વિદ્યાર્થીઓને ફસાવી પોતાની ગુનાખોર ટોળકીમાં સામેલ કરતી હતી.
ભારતીય સમુદાયને નિશાન બનાવતી આ ‘ફોર બ્રધર્સ ગેંગ’ સામેની કાર્યવાહી બાદ કેનેડામાં વસતા ભારતીય વેપારીઓએ રાહતનો શ્વાસ લીધો છે.
