ગુજરાતમાં આરોપીઓને જાહેરમાં માર મારવા, તેમનું સરઘસ કાઢવા અને પોલીસ કસ્ટડીમાં કથિત અત્યાચાર ગુજારવાના મુદ્દે ગુજરાત હાઈકોર્ટમાં અવમાનનાની અરજી દાખલ કરવામાં આવી છે.આ કેસમાં 16થી 17 વર્ષના એક સગીરને દારૂ સંબંધિત મામલે પકડીને ત્રણ દિવસ સુધી ગેરકાયદે કસ્ટડીમાં રાખવામાં આવ્યો હોવાનો અને તેની સાથે અમાનુષી વર્તન કરાયું હોવાનો આક્ષેપ કરવામાં આવ્યો છે.અરજીમાં દલીલ કરવામાં આવી છે કે પોલીસને કાયદાનું પાલન કરાવવાની સત્તા છે, પરંતુ વર્દી પહેરવાથી તે કાયદાથી ઉપર બની જતી નથી.અરજદાર પક્ષે કોર્ટ સમક્ષ રજૂઆત કરી હતી કે ગત 21 જૂને દારૂ સંબંધિત કેસમાં સગીરને અટકાયતમાં લેવામાં આવ્યો હતો.તેના પિતાએ આક્ષેપ કર્યો છે કે પોલીસ કસ્ટડી દરમિયાન તેમના પુત્ર પર અત્યાચાર ગુજારવામાં આવ્યો હતો અને તેના શરીરના વિવિધ ભાગો પર ઈજાનાં નિશાન જોવા મળ્યાં હતાં.સગીરને ત્રણ દિવસ સુધી ગેરકાયદે કસ્ટડીમાં રાખવામાં આવ્યો હોવાનો પણ અરજીમાં દાવો કરવામાં આવ્યો છે.બાદમાં તેને કોર્ટમાં રજૂ કરવામાં આવતાં જામીન આપવામાં આવ્યા હતા.
અરજદાર પક્ષે વધુમાં દલીલ કરી હતી કે સગીરને વારંવાર અટકાયતમાં રાખવામાં આવ્યો હતો અને જાહેરમાં તેનું સરઘસ પણ કાઢવામાં આવ્યું હતું.આ પ્રકારનું વર્તન આરોપીઓના અધિકારો અને કાયદાકીય પ્રક્રિયાના પાલન અંગે ગંભીર સવાલો ઊભા કરે છે.અરજીમાં સુપ્રીમ કોર્ટની માર્ગદર્શિકાનો ઉલ્લેખ કરીને પોલીસની આવી કાર્યવાહી સામે વાંધો ઉઠાવવામાં આવ્યો છે.અરજીમાં પોલીસની કામગીરી અંગે સવાલ ઉઠાવતાં જણાવાયું છે કે જાહેરમાં કોઈ વ્યક્તિને માર મારવો કે તેનું અપમાનજનક રીતે સરઘસ કાઢવું એ કાયદાના શાસન અને માનવ અધિકારોની ભાવનાથી વિરુદ્ધ છે.પોલીસ અધિકારીઓએ પણ કાયદાની મર્યાદામાં રહીને કામગીરી કરવાની હોય છે.માત્ર માફી માગવાથી આવા બનાવો અટકશે કે કેમ તે અંગે પણ અરજદાર પક્ષે સવાલ કર્યો હતો.
સુનાવણી દરમિયાન હાઈકોર્ટે પોલીસ પાસેથી સગીરની ધરપકડ અને કસ્ટડી સંબંધિત વિગતો માગી હતી.તેની ધરપકડ કયા સમયે કરવામાં આવી, તેને કેટલા સમય સુધી કસ્ટડીમાં રાખવામાં આવ્યો અને ત્યારબાદ ક્યારે મુક્ત કરવામાં આવ્યો અથવા કોર્ટ સમક્ષ રજૂ કરવામાં આવ્યો તેની સંપૂર્ણ સમયરેખા રજૂ કરવા પોલીસ તંત્રને નિર્દેશ આપવામાં આવ્યો છે.પોલીસ તરફથી કોર્ટમાં માફી માગવામાં આવી હોવાનું પણ રજૂઆતમાં જણાવાયું છે.પોલીસ પક્ષે એવો બચાવ કર્યો હતો કે સગીરને જામીન મળી ગયા હોવાથી તેને માર મારવામાં આવ્યો હોવાનો પ્રશ્ન ઊભો થતો નથી.જોકે, કસ્ટડી દરમિયાન શું બન્યું અને અટકાયત કાયદેસર હતી કે નહીં તે નક્કી કરવા માટે સમગ્ર ઘટનાક્રમની વિગતો મહત્ત્વપૂર્ણ બની છે.આ મામલે હાઈકોર્ટે પોલીસ પાસેથી શરૂઆતથી અંત સુધીની તમામ વિગતો માગી છે.કેસની વધુ સુનાવણી ગુરુવારે હાથ ધરાવાની છે.આ કાર્યવાહી દરમિયાન પોલીસની કામગીરી,સગીરની અટકાયતનો સમયગાળો અને જાહેરમાં સરઘસ કાઢવાના આક્ષેપ અંગે રજૂ થનારી વિગતો મહત્ત્વપૂર્ણ રહેશે.
