સુરતઃ કોરોના વાયરસને કારણે જેટલું લોકોના ધંધાને અસર પડી છે તેટલું જ ઘણાઓએ તેનો ફાયદો ઉઠાવવાનો ભરપૂર પ્રયાસ કર્યો. ખુદ તેમાં બાબા રામદેવે પણ પોતાની દવા કોરોના પર સોટકા અસરકારક હોવાના દાવા સાથે તામજામ કરી મુક્યો હતો.આવી જ રીતે મજબુરીનો ફાયદો ઉઠાવવાનું એક સુરતમાં મહિલા ફાર્મા કંપનીની માલીક દ્વારા કૃત્ય કરાયું હોવાનું સામે આવ્યું છે. સુરતમાં ડો. એચ જી કોશિયાએ કહ્યું કે,સુરતમાં દવાનું બિલ વગર વેચાણ,ગેરકાયદેસર રીતે ભાવ લઈને નફો રડવો તે અંગે ફુડ એન્ડ ડ્રગ્સ વિભાગ દ્વારા તેનો પર્દાફાશ કરાયો છે.
વિભાગને માહિતી મળી હતી કે મેસર્સ સાર્થક ફાર્માના માલીક ઉમા સાકેત કેજરીવાલ Actemra 400 mg નામની દવાનું વેચાણ ડૉક્ટરના પ્રિસ્ક્રિપ્શન ઉપર વગર બીલએ અને છૂટક દવાના લાયસન્સ વગર મૂળ કિંમત કરતાં વધુ ભાવે વેચે છે.તે કિંમતમાં 57 હજાર જેટલો જંગી વધારો કરીને વેચી રહ્યા હોવાની માહિતી મળતાં ત્યાં રેડ કરવામાં આવી અને 2 Actemra 400 mg જપ્ત કરવામાં આવી.આ દવાની વેચાણ કિંમત 40545 પ્રતિ નંગ છે.
ઉમા કેજરીવાલ સાથે પુછપરછ દરમિયાન સામે આવ્યું કે,આ દવા તેણે મે. ન્યૂ શાંતી મેડિસીન્સ,અડાજણ ખાતેના માલીક મહેન્દ્ર શાહ પાસેથી બિલ વગર રૂપિયા 50,000 આપીને લીધી હતી. મિતુલ મહેન્દ્ર શાહે પાછી આ દવા અમદાવાદની કેબીવી ફાર્મા એજન્સી અસારવા અમદાવાદના અમિત મંછારામ નામના વ્યક્તિ પાસેથી ખરીદી હતી અને તેના તેણે 45000 પ્રતિ નંગ લીધી હતી.તેણે આ રૂપિયા અમદાવાદ સિવિલ હોસ્પિટલમાં નોકરી કરતાં ઘનશ્યામ વ્યાસના એકાઉન્ટમાં રૂપિયા જમા કરાવીને લીધી હતી.
અમદાવાદનો અમિત મંછારામ અગાઉ એમઆર તરીકે નોકરી કરતો હતો. તે દવાની ખરીદી દર્દીઓના ખોટા પ્રિસ્ક્રિપ્શન બનાવીને કરતો હતો અને ઘણીવાર એક જ પ્રિસ્ક્રીપ્શનનો ફરી ફરી ઉપયોગ કરતો હતો. કોરોનાની સારવાર માટે વપરાતી દવાઓની કાળા બજારી ન થાય તે માટે સરકાર અને સરકારી તંત્ર સતત પ્રયત્નોમાં રહે છે છતાં આવા કૌભાંડીઓ કોઈનો કોઈ રસ્તો કાઢે છે.જોકે તંત્રએ હવે કડકાઈ ભર્યા પગલા લેવાનું શરૂ કર્યું છે.
આવા શખ્સો સામે આવશ્યક ચીજવસ્તુઓની કલમો અંતર્ગત ઐષદ ભાવ નિયમન આદેશ 2013 અને 1940 અંતર્ગત ઔષધ અને સૌદર્ય પ્રસાધન ધારા અંતર્ગત તપાસ કરવામાં આવશે. ડો. એચ જી કોશિયાએ એવું પણ કહ્યું કે,આ પ્રકારની પ્રવૃત્તિઓ કરનારાઓ સામે કડક કાર્યવાહી કરવામાં આવશે.જો કસુરવાર સાબિત થયા તો તેવા લોકોની સામે તંત્ર જરા પણ કાચુ કાપશે નહીં.
રાજ્યમાં કોરોના વાયરસના કેસમાં સતત વધારો થઇ રહ્યો છે. રાજ્યનો આરોગ્ય વિભાગ કોરોનાને કાબુમાં લેવા માટે યુદ્ધના ધોરણે કામગીરી કરી રહ્યો છે.કોરોનાની મહામારી વચ્ચે દવા, માસ્ક અને સેનિટાઇઝરનું ઉંચી કિંમતે બ્લેકમાં વેચાણ થતું હોવાના કિસ્સાઓ સામે આવ્યા છે.ત્યારે હવે કોરોનાની સારવાર માટે ઉપયોગમાં લેવાતા ટોસીલીઝૂમેબ ઇન્જેક્શનનું બ્લેકમાં વેચાણ કરવાના કૌભાંડનો પર્દાફાશ ફૂડ એન્ડ ડ્રગ વિભાગ દ્વારા કરવામાં આવ્યો છે. આ કૌભાંડ સુરતમાંથી પકડાયું છે.ફૂડ એન્ડ ડ્રગ વિભાગના અધિકારીઓને તપાસ દરમિયાન જાણવા મળ્યું હતું કે, ટોસીલીઝૂમેબ ઇન્જેક્શનની કિંમત 40,000 આસપાસ છે અને આ ઇન્જેક્શનને 57,000થી લઇને 1 લાખ રૂપિયા સુધીમાં વેંચવામાં આવતું હતું.
રિપોર્ટ અનુસાર કોરોનાના દર્દીઓને ટોસીલીઝૂમેબ ઇન્જેક્શન આપવાની મંજૂરી રાજ્ય સરકાર દ્વારા 5 મેના રોજ આપવામાં આવી હતી. રાજ્ય સરકારની પાસે 5,000 ટોસીલીઝૂમેબ ઇન્જેક્શન હતા અને હાલ આ સ્ટોક ખૂટવાના આરે છે. ત્યારે સુરતમાં વધારે કિંમતમાં ટોસીલીઝૂમેબ ઇન્જેક્શનના વેંચાણનું કૌભાંફ ચાલતું હોવાની માહિતી રાજ્યના ફૂડ એન્ડ ડ્રગ વિભાગના અધિકારીઓને મળી હતી. જેથી સમગ્ર મામલે ફૂડ એન્ડ ડ્રગ વિભાગના અધિકારીઓ દ્વારા તપાસનો ધમધમાટ શરૂ કરવામાં આવ્યો હતો. તપાસમાં જાણવા મળ્યું હતું કે,સુરતની સાર્થક ફાર્મા નામની એક હોલસેલ એજન્સી દ્વારા 40,000માં આવતું ટોસીલીઝૂમેબ ઇન્જેક્શન 57,000થી લઇને 1 લાખ રૂપિયાના વેંચવામાં આવી રહ્યું છે અને આ ઇન્જેક્શનનું બીલ પણ આપવામાં આવતું નથી.ફૂડ એન્ડ ડ્રગ વિભાગના અધિકારીઓ દ્વારા એક નકલી વેપારી ઉભો કરીને ઇન્જેક્શનની ખરીદી કરવામાં આવી હતી અને ત્યારબાદ ઇન્જેક્શનની કાળાબજારીના કૌભાંડનો પર્દાફાશ થયો હતો.
