ગુજરાત સરકારને એવી દરખાસ્ત મળી છે કે પ્રાઇવેટ પ્લેયર્સ ગુજરાતના 1640 કિલોમીટરના દરિયા કિનારે અને બારમાસી પાણી રહેતું હોય તેવી નદીમાં ફ્લોટીંગ રેસ્ટોરન્ટ શરૂ કરી શકશે.પ્રાથમિક ધોરણે અમદાવાદના ગાંધીઆશ્રમ પાસે ગાંધીયન સ્ટાઇલની રેસ્ટોરન્ટ માટે પરવાનગી આપવાનું સરકાર વિચારી રહી છે.એ સાથે સૌરાષ્ટ્રના દરિયા કિનારે આવેલા પ્રવાસન સ્થળોએ ફ્લોટીંગ રેસ્ટોરન્ટનું પ્લાનિંગ છે જેમાં માંડવીનો દરિયાકિનારો અને કેવડીયા પ્રથમ પસંદગી છે.
રાજ્યના પ્રવાસન વિભાગના અધિકારીએ કહ્યું હતું કે વિશ્વના પ્રવાસન નકશા ઉપર જોઇએ તો ફ્લોટીંગ રેસ્ટોરન્ટ પ્રવાસીઓને આકર્ષવાનો એક નવો કન્સેપ્ટ છે.જો કે રેસ્ટોરન્ટની વાત આવે એટલે ગંદકી થાય તે સ્વાભાવિક છે.રેસ્ટોરન્ટના મેનેજમેન્ટ તરફથી પાણીમાં કોઇ ગંદકી ન થાય તે બાબતે શું કરી શકાય તે અંગે હાલ વિચારણા ચાલી રહી છે. 31મી ઓક્ટોબરથી વડાપ્રધાન નરેન્દ્ર મોદી અમદાવાદના રિવરફ્રન્ટ પર થી સી પ્લેન મારફતે ઉડાન ભરીને સ્ટેચ્યુ ઓફ યુનિટી જવાના છે ત્યારે તેઓ ગુજરાતમાં ભારતનો પહેલો સી પ્લેનનો પ્રોજેક્ટ શરૂ કરી રહ્યાં છે.આ સંજોગોમાં ફ્લોટીંગ રેસ્ટોરન્ટ પ્રવાસનનું કેન્દ્ર બની શકે છે.
ગુજરાત સરકાર પ્રવાસનને ઉત્તેજન આપવા માગે છે.દરિયા કિનારા સાથે રિવર સાઇડ રેસ્ટોરન્ટ તેમજ પ્રખ્યાત તળાવમાં ફ્લોટીંગ રેસ્ટોરન્ટ ઉભી કરવાનું નક્કી કરવામાં આવી રહ્યું છે.આ પ્રોજેક્ટને નવી ટુરિઝમ પોલિસીનો લાભ આપવાની પણ સક્રિય વિચારણા હાથ ધરવામાં આવી છે. ગુજરાતના મોટા શહેરોમાં આવેલા પબ્લિક લેકમાં પણ આ કન્સેપ્ટમાં કેવી રીતે આગળ વધી શકાય તે અંગે વિવિધ વિભાગો અને જે તે સ્વૈચ્છિક સંસ્થાઓને રિપોર્ટ કરવા કહેવામાં આવ્યું છે.
અમારી દરખાસ્ત સરકારની વિચારણામાં હોવાનું જણાવી અધિકારીએ કહ્યું હતું કે ગુજરાતની નદીઓ અને કેનાલોમાં જેમ વોટર ટ્રાન્સપોર્ટની સુવિધા વિકસાવવાનું પ્લાનિંગ થઇ રહ્યું છે તેમ ફ્લોટીંગ રેસ્ટોરન્ટ પણ કરી શકાય છે.થીમ બેઝ ફ્લોટીંગ રેસ્ટોરન્ટ કરવા માટે ખાનગી કંપનીઓ અને ડેવલપર્સને આમંત્રણ આપવામાં આવનાર છે.ખાસ કરીને સ્ટેટ્યુ ઓફ યુનિટીના સ્થળે પણ ફ્લોટીંગ રેસ્ટોરન્ટ માટે વિભાગે વિચારણા શરૂ કરી છે.
ગુજરાતમાં ચોમાસા પછી વોટરબોડી કે જ્યાં પાણીનો સંગ્રહ શક્ય છે ત્યાં વોટર ટુરિઝમ કરવા માટે વિભાગે તૈયારી બતાવી છે.રાજ્યમાં સાબરમતી,તાપી,નર્મદા, મહિસાગર જેવી નદીઓમાં ફ્લોટીંગ રેસ્ટોરન્ટ શરૂ કરી શકાય તેમ છે.રાજ્યના આઠ જેટલા બીચમાં પણ વોટર સ્પોર્ટ્સ તેમજ ફ્લોટીંગ રેસ્ટોરન્ટ શરૂ કરી શકાય તેમ છે.સરકારે પહેલી ફ્લોટીંગ રેસ્ટોરન્ટ કચ્છના માંડવીના દરિયાકિનારે સ્થાપવા માટે પ્રાઇવેટ પ્લેયરોને આમંત્રણ આપ્યું છે.
