વાપી : વાપીના રાતા ગામની ઝાડીમાંથી 13 દિવસ અગાઉ મહિલાની લાશ મળી આવી હતી.પોલીસે તેની ઓળખ કરી ગળું દબાવીને હત્યા કરનારા આરોપીની ધરપકડ કરી છે.આરોપી મૃતક મહિલાનો નજીકનો સંબંધી હતો.ત્રણ સંતાનની માતા અને આરોપી વચ્ચે પ્રેમસંબંધ હોય મહિલા અન્ય વ્યક્તિ સાથે ફોન પર વાત કરતી હોવાની શંકાને લઇ એકાંતમાં બોલાવી તેનું ગળુ દબાવી હત્યા કર્યા હોવાની આરોપીએ કબૂલાત કરી છે.બંને છીરીના વડિયાવાડ સ્થિત એક ચાલીના અલગ અલગ રૂમમાં ભાડેથી રહેતા હતા.
વાપીના રાતા ગામ ભારતનગરની સીમમાં ક્રિકેટ ગ્રાઉન્ડની બાજુમાં પાણીની ટાંકીથી 100 મીટર દૂર ખુલ્લી ઝાડીમાંથી એક મહિલાની લાશ 6 ફેબ્રુઆરીએ મળી આવતા ડુંગરા પોલીસે લાશને કબજે લઇ તેના વાલીવારસની શોધખોળ હાથ ધરી હતી. જોકે પેનલ પીએમ રિપોર્ટમાં તેનું ગળું દબાવી હત્યા કર્યા હોવાનું બહાર આવતા પોલીસે તે દિશામાં તપાસ શરૂ કરી હતી.આ કેસમાં એસપી ડો.રાજદીપસિંહ ઝાલાની સુચના અને ડીવાયએસપી વી.એમ.જાડેજાના માર્ગદર્શન મુજબ એલસીબી,એસઓજી અને ડુંગરા પોલીસના અધિકારીઓએ અલગ અલગ ટીમો બનાવી ગુનાવાળી જગ્યા તથા આજુબાજુના સીસીટીવી ફૂટેજની બારીકાયથી તપાસ કરી તે વિસ્તારના તમામ ચાલી માલિકો અને તેમાં રહેતા માણસોની પૂછપરછ હાથ ધરી હતી.
વાપીનાડુંગરા પોલીસ મથકના પીએસઆઇ જે.વી.ચાવડા,એલસીબી પીએસઆઇ સી.એચ.પનારા,કે.એમ.બેરીયા તથા પીએસઆઇ જે.એન.ગોસ્વામીને અંગત અને વિશ્વાસુ બાતમીદારો મારફતે જાણવા મળેલ કે,મૃતક મહિલાનું ખૂન તેની સાથે લગ્નેતર પ્રેમ સંબંધ ધરાવતા વિનોદ મંડલએ કરેલ છે.જેથી હ્યુમન ઇન્ટેલીજન્સ તથા ટેક્નીકલ સર્વેલન્સના આધારે આરોપી વિનોદ નાગેશ્વર મંડલ (કુર્મી) ઉ.વ.30 રહે.છીરી વડિયાવાડ વિનોદભાઇની ચાલીમાં મુળ ગામ એક્ચારી પોસ્ટ રસલપૂર થાના ખરહલા જી.ભાગલપુર બિહારને પકડી પાડી પૂછપરછ કરતા તેણે જણાવેલ કે, મૃતક નીતુદેવી સાથે તે પ્રેમસંબંધમાં હતો. અને આ મહિલા કોઇ અન્ય ઇસમ સાથે મોબાઇલમાં વાત કરતી હોવાની શંકા જતા આરોપીએ તેને રાતા ભારતનગર ક્રિકેટ ગ્રાઉન્ડમાં રાત્રે મળવા માટે બોલાવી ઝગડો કરી તેનું ગળુ દબાવી હત્યા કરીને લાશની ઓળખ ન થાય તેમ વિચારી તેના ફોન અને પર્સ સાથે લઇ ફરાર થઇ ગયો હતો.આરોપી વિનોદ નીતુને મોતને ઘાટ ઉતાર્યા બાદ પરત ઘરે આવી ગયો હતો. કોઇને શંકા ન જાય તે માટે રાબેતા મુજબ આરતી કંપનીમાં નોકરીએ જતો અને ઘરે હત્યાથી અજાણ બનીને રહેતો હતો.
ડુંગરા પોલીસ દ્વારા મૃતકની ઓળખ કરવા યુપી અને બિહારના એડીજીપીથી લઇ પોલીસ મથકના કુલ 1500 વોટ્સએપ નંબરો પર મહિલાનું વર્ણન અને ફોટો દર્શાવતા પોસ્ટર મોકલાયા હતા. તેમજ યુપી બિહારથી આવતી જતી ટ્રેનોના કંપાર્ટમેન્ટમાં પોસ્ટર લગાવતા આ કામગીરી તેની ઓળખ માટે મહત્વપુર્ણ સાબિત થઇ હતી.પ્રેમિકાને ગ્રાઉન્ડ પર બોલાવી ગળુ દબાવીને હત્યા કર્યા બાદ આરોપી લાશને 100 મીટર ખભે ઉચકી ગટર પાસે ઝાડીમાં ફેંકી ગયો હતો.મૃતક અન્ય સાથે આડાસંબંધ રાખતી હોય તેની જાણ પતિને થતા ઘણીવાર તેને સમજાવવા બાદ પણ ન સુધરતા તે સંતાનોને સાથે લઇ પત્નીને વાપીમાં છોડીને વતન બિહાર જતો રહ્યો હતો.આરોપી વિનોદ મંડલ અને નીતુ બિહારના એક જ ગામના અને કૌટુંબિક સંબંધી હતા.વોટ્સએપ પર મૃતકનો ફોટો શેર કરતા 16 તારીખે બિહારના ભાગલપુરથી ડુંગરા પોલીસને ફોન આવ્યો હતો કે,લોકલ પોલીસના માધ્યમથી ફોટો જોતા તે બહેન નીતુનો ફોટો હોવાનું જણાવ્યું હતું.તેણે ડુંગરા પીએસઆઇ જે.વી.ચાવડાને મૃતકનું વાપીનું સરનામું બતાવતા તેની ઓળખ થઇ હતી.
