નવી િદલ્હી : ભારતમાં છેલ્લા એક સપ્તાહથી દરરોજ કોરોનાના એક લાખથી વધુ નવા કેસ સામે આવી રહ્યા છે,તો છેલ્લા ત્રણ દિવસોથી આ સંખ્યા દોઢ લાખથી વધુની રહી છે.મહામારીની બેલગામ રફતારનો અંદાજ તેના પરથી લગાવી શકાય તેમ છે કે માત્ર 7 દિવસોમાં જ વિક્રમી 10 લાખથી વધુ કોવિડ-19ના નવા દર્દીઓ નોંધાયા છે,જે અત્યાર સુધીની સૌથી ઝડપી ગતિ છે. ભારતમાં 5મી એપ્રિલ, 2021ના રોજ પ્રથમવાર એક લાખથી વધુ કોરોનાના કેસ આવ્યા હતા,આ સમયે સૌથી વધુ કેસનો ગત વિક્રમ પણ તૂટ્યો હતો.કારણ 17મી સપ્ટેમ્બર, 2020ના રોજ 97,894 કેસ નોંધાયા હતા.જ્યારે તા.7મીથી 13મી એપ્રિલ દરમિયાન 10 લાખ 03 હજાર 324 દર્દીઓ નોંધાઈ ચૂક્યા છે.
તજજ્ઞોને આશંકા છે કે ગત એક સપ્તાહમાં જે રીતે કોરોનાના નવા કેસોમાં 5થી 10 ટકાનો ઉતાર-ચઢાવ જોવા મળ્યો છે,તેનાથી આગામી સપ્તાહએ આ સંખ્યા બે લાખને પણ આંબી શકે છે.ત્યારે સવાલ એ થાય કે ભારત હવે અમેરિકાને પણ પાછળ રાખશે. સેન્ટર ફોર ડિસીઝ કન્ટ્રોલ એન્ડ પ્રિવેન્શનના મુજબ અમેરિકામાં 16મી ડિસેમ્બર, 2020ના રોજ એક દિવસમાં 2.48 લાખ કોરોના વાયરસના ચેપગ્રસ્તો નોંધાયા હતા.જ્યારે 24 કલાકમાં 2706 લોકોના મૃત્યુ થયા હતા.એ સમયે અમેરિકામાં કોરોનાના કુલ કેસ પણ 1 કરોડ 50 લાખની નિકટ હતા, તે પડાવ તરફ ભારત આજે આગળ વધતુ જોવા મળી રહ્યુ છે.ભારતમાં સપ્ટેમ્બરમાં કોરોનાની પ્રથમ લહેર પીક પર હતી, ત્યારે 4થી 15 સપ્ટેમ્બર દરમિયાન 11 દિવસોમાં દેશમાં 10 લાખ કેસ સામે આવ્યા હતા.તેની સામે 7થી 13મી એપ્રિલ દરમિયાન માત્ર એક સપ્તાહમાં જ 10 લાખથી વધુ કેસો મળ્યા હતા.આ સૌથી ઓછા દિવસોમાં 10 લાખ કેસ સામે આવવાનો રેકર્ડ છે.ભારતમાં મંગળવારે સતત 7મા દિવસે નવા કેસની સંખ્યા એક લાખને પારની રહી છે.આરોગ્ય મંત્રાલયના આંકડા મુજબ છેલ્લા 24 કલાકમાં 1,61,736 નવા દર્દીઓ નોંધાયા છે,તેમજ આ દરમિયાન 879 દર્દીઓના મૃત્યુ થયા છે.ચેપગ્રસ્તોની કુલ સંખ્યા 1,36,89,697 પર પહોંચ્યો છે.છેલ્લા 24 કલાકમાં 97,168 દર્દીઓને રજા અપાઈ છે.દેશભરમાં અત્યાર સુધીમાં 1,22,53,697 લોકો ખતરનાક વાયરસને મ્હાત આપી ચૂક્યા છે.હાલ 12,64,698 દર્દીઓ સારવાર હેઠળ છે.કોરોનાથી દેશમાં કુલ 1,71,058 દર્દીઓએ જીવ ગુમાવ્યો છે.અત્યાર સુધીમાં કુલ 10,85,33,085 વેક્સિનેશનના ડોઝ અપાઈ ચૂક્યા છે.
એક સપ્તાહમાં અમેરિકાથી બે ગણા નવા કેસ
જો છેલ્લા એક સપ્તાહની વાત કરીએ તો અમેરિકામાં કોરોનાના 4.73 લાખ કેસ નોંધાયા છે.જ્યારે ભારતમાં બેગણા દર્દીઓ સામે આવ્યા છે. 12મી એપ્રિલએ અમેરિકામાં માત્ર 49,409 કેસ જ મળ્યા છે.જ્યારે ભારતમાં નવા કેસ ત્રણ ગણા(1.61 લાખ)થી વધારે છે.અમેરિકા અને ભારતમાં રોજિંદા મૃત્યુની સંખ્યામાં સરેરાશ 800-900ની નિકટ છે.અમેરિકામાં છેલ્લા 24 કલાકમાં 328 દર્દીઓના મૃત્યુ થયા છે, જ્યારે ભારતમાં તેનાથી વધારે 879 મૃત્યુ થયા છે.ભારત મંગળવારે કોરોનાના કુલ કેસોના આધારે દુનિયાનો સૌથી વધુ પ્રભાવિત બીજા નંબરનો દેશ બની ગયો છે.ભારતમાં કુલ કેસનો આંકડો 1,36,89,453 સુધી પહોંચી ગયો છે,જ્યારે બ્રાઝીલમાં 1,35,21,409 દર્દીઓ અત્યાર સુધીમાં નોંધાયા છે.
ચંૂટણીની આડઅસર : બંગાળમાં નવા કેસોમાં 378 ટકાનો વધારો
દેશના 5 રાજ્યોમાં વિધાનસભા ચૂંટણીની સફર અડધાથી વધારે ખેડાઈ ચૂકી છે.છેલ્લા એક પખવાડિયામાં અહીંયા કોરોનાના પોઝીટીવ દર્દીઓમાં લગભગ બેગણો વધારો થયો છે.બંગાળ અને આસામમાં તો ચૂંટણીની તારીખો જાહેર થાય તે પૂર્વે જ પ્રચાર શરૂ થઈ ચૂક્યો હતો.તમામ રેલીઓમાં કોરોનાના પ્રોટોકોલની ઐસીતૈસી થતી જોવા મળી રહી છે.જેથી અહીં 14 દિવસોમાં કોરોનાના નવા દર્દીઓમાં 378 ટકા ઉછાળો આવ્યો છે.રાજ્યમાં નવા કેસોની સંખ્યા 30,230 પર પહોંચી ચૂકી છે.ચૂંટણીવાળા અન્ય રાજ્યોમાં પણ મહામારીનો ફૂંફાડો વધ્યો છે.આસામમાં નવા દર્દીઓમાં 331 ટકાનો અને તામિલનાડુમાં 173 ટકાનો વધારો થયો છે.પુડુંચેરીમાં 14 દિવસોમાં નવા કેસ 173 ટકા વધ્યાં છે.જ્યારે કેરળમાં એક પખવાડિયામાં નવા કેસોમાં 84 ટકાનો વધારો થયો છે.
