દિલ્હી : દેશમાં કોરોના વાયરસના તમામ રેકોર્ડ તૂટી ગયા છે. છેલ્લા ૨૪ કલાકમાં દેશમાં કોરોના વાયરસના જેટલા નવા કેસ સામે આવ્યા છે, તેટલા આજથી પહેલાં ક્યારેય આવ્યા નથી અને કોઇપણ દેશમાં આવ્યા નથી.કેન્દ્રીય સ્વાસ્થ્ય મંત્રાલય અનુસાર, છેલ્લા ૨૪ કલાકમાં દેશમાં કોરોના વાયરસના ૩૧૪૮૩૫ કેસ નોંધાયા છે.હવે દેશમાં કુલ કોરોના વાયરસના કેસનો આંકડો વધીને ૧૫૯૩૦૯૬૫ સુધી પહોંચી ગયો છે.દેશમાં એક્ટિવ કોરોના કેસોની સંખ્યા ૨૨૯૧૪૨૮ સુધી પહોંચી ગઇ છે.
કોરોનાના કેસોની સંખ્યા ઝડપથી વધવાની સાથે દેશમાં કોરોનાને લીધે મૃત્યુ પામનારા લોકોની સંખ્યા પણ ઝડપથી વધી રહી છે.સ્વાસ્થ્ય મંત્રાલય અનુસાર, છેલ્લા ૨૪ કલાકમાં દેશમાં કોરોના વાયરસને લીધે ૨૧૦૪ લોકોના મોત નિપજ્યાં છે. મહારાષ્ટ્રમાં જ ૫૧૯ લોકોનાં મોત થયા છે.ઉપરાંત દિલ્હીમાં ૨૭૭, છત્તીસગઢમાં ૧૯૧, ઉત્તર પ્રદેશમાં ૧૬૨, કર્ણાટકમાં ૧૪૯ અને ગુજરાતમાં ૧૨૧ લોકોનાં મોત થયા છે.
દેશમાં કોરોના વાયરસના એક્ટિવ કેસનો આંકડો ૨૨ લાખને પાર કરી ગયો છે.આમાંથી મહારાષ્ટ્રમાં ૬.૮૫ લાખથી વધુ કેસ છે. જ્યારે ઉત્તર પ્રદેશમાં ૨.૨૩ લાખથી વધુ,કેરળમાં ૧.૧૮ લાખથી વધુ,છત્તીસગઢમાં ૧.૨૫ લાખથી વધુ અને દિલ્હીમાં ૮૫ હજારથી વધુ એક્ટિવ કેસ છે.
કોરોનાના પ્રકોપ વચ્ચે ટેસ્ટિંગ વધારવામાં આવ્યું છે,પરંતુ ટેસ્ટિંગ બાદ પોઝિટિવ આવનારા લોકોની સંખ્યા ઝડપથી વધી રહી છે.દેશમાં કોરોનાનું પોઝિટિવિટી રેટ ઝડપથી વધી રહ્યું છે.છેલ્લા ૨૪ કલાકમાં ૧૬ લાખથી વધુ ટેસ્ટ થયા છે અને તેમાં ૩ લાખથી વધુ પોઝિટિવ મળ્યા છે.અત્યાર સુધી દેશમાં ૨૭ કરોડથી વધુ કોરોના ટેસ્ટ થયા છે.
