– લોકપ્રતિનિધિના હક છીનવી અત્યાચાર થતો હોવાનો આક્ષેપ
– દાનહ સાંસદ કલાબેને સંસદમાં પ્રથમ નિવેદન આપ્યું
દાદરા નગર હવેલી : દાદરા નગર હવેલીના પ્રથમ મહિલા સાંસદ કલાબેન ડેલકરે લોકસભામાં બન્ને પ્રદેશની તમામ સમસ્યાઓનુ એક જ સમાધાન એવા વિધાનસભાના મુદ્દો ઉઠાવ્યો હતો.પ્રદેશના લોકપ્રિય સાંસદ દિવંગત મોહન ડેલકરના અધૂરા સપનાને પૂરા કરવા અને તેઓની વિચારધારાને લઈને ચાલવાના ઉદ્દેશ્ય સાથે સાંસદ કલાબેન ડેલકરે સંસદમા પોતાના પ્રથમ જ વકતવ્યમાં વિધાનસભાની માંગ કરીને લોકોમાં એક મજબૂત સંદેશો પહોંચાડવાનો પ્રયાસ કર્યો છે.
સાંસદ કલાબેન ડેલકરે સંસદમા દાનહ અને દમણ-દીવમાં પૂર્ણ વિધાનસભાની માંગ કરતા જણાવ્યું હતું કે હું કેન્દ્રશાસિત પ્રદેશ દાનહમાંથી ખૂબજ કઠિન પરિસ્થિતિમાં પોતાની પહેલી ચૂંટણી જીતીને આવી છું મારા પહેલાં મારા પતિ મોહન ડેલકર આ સદનમા 7વાર સાંસદ બનીને પ્રદેશનુ પ્રતિનિધિત્વ કરી ચૂક્યા છે.અમારો પ્રદેશ જે વિકટ પરિસ્થિતિમાંથી ગુજરી રહ્યો હતો તેની લડાઈ લડતા લડતા અમારા પ્રદેશના લોકપ્રિય અને દેશના સૌથી વરિષ્ઠ સાંસદોમાના એક સાંસદે પોતાનુ બલિદાન આપવા પડ્યું છે.અમારો પ્રદેશ આજે પણ ખૂબજ કઠિન પરિસ્થિતિમાંથી પસાર થઈ રહ્યો છે.
ભારત વિશ્વનો સૌથી મોટો લોકતાંત્રિક દેશ હોવા છતાં અમારા પ્રદેશમાં જન પ્રતિનિધિઓ અને જનતાના હક્ક અધિકારો છીનવી ને અત્યાચાર કરવામાં આવી રહ્યા છે.આવી ગંભીર સમસ્યાઓ અને કઠિન પરિસ્થિતિને ધ્યાનમાં રાખીને સંઘપ્રદેશ દાનહ અને દમણ-દીવને દેશની મુખ્ય ધારા અને લોકતાંત્રિક પ્રક્રિયા સાથે જોડવા પૂર્ણ ઍસેમ્બ્લી આપવાની માગ કરી હતી,જેથી જનતાને ફરીથી પોતાના હક્ક અધિકાર મળી શકે.
વર્ષ 2014માં તત્કાલીન ઉપરાષ્ટ્રપતિની અધ્યક્ષતામાં હોમ મિનિષ્ટ્રીની સ્ટેન્ડિંગ કમિટીએ બન્ને પ્રદેશ માટે એક વિધાનસભા બની શકે તેવો પ્રસ્તાવ રજૂ કર્યો હતો.આ મુદ્દાને વર્ષ 2019 માં સાંસદ સ્વ.મોહન ડેલકરે પણ લોકસભામાં ઉઠાવ્યો હતો.આ તમામ પરિસ્થિતિને ધ્યાનમાં રાખીને તાત્કાલિક આ મામલામાં કાર્યવાહી હાથ ધરવા કેન્દ્ર સરકાર અને રાષ્ટ્રપતિને સાંસદ કલાબેને વિનંતી કરી હતી. ઉલ્લેખનીય છે કે, સંઘપ્રદેશ દાનહમાંથી સાંસદ તરીકે વિક્રમજનક મતોથી જીતનાર કલાબેન પ્રથમ સાંસદ છે.
