– કમલમમાં મોદીએ ગુજરાતી ભોજનનો સ્વાદ માણ્યો એરપોર્ટથી કમલમ્ સુધી કેસરિયા કલર છલકાયો,કેસરી ટોપી,ખેસ અને બલૂન્સ પણ કેસરી જોવા મળ્યા
ગાંધીનગર : ગુજરાતમાં આ પહેલાં ક્યારેય જોવા મળ્યો ન હોય તેવો નજારો વડાપ્રધાન નરેન્દ્ર મોદીના રોડ-શોમાં જોવામાં આવ્યો છે.એરપોર્ટથી કમલમ સુધી કેસરિયો કલર્સ છલકાયો હતો.માર્ગમાં ચારેબાજુ કેસરી ટોપી,કેસરી ખેસ સાથે કેસરી કલરના બલૂન્સ જોવા મળતા હતા.
* ઉત્તરપ્રદેશ સહિત ચાર રાજ્યોની ચૂંટણીમાં ભાજપની ભવ્ય જીતની ઉજવણી હોય તેવો માહોલ જોવા મળતો હતો. જાણે કે મોદી ખુદ જનતાની વચ્ચે નિકળી પડયાં હોય તેવું જણાઇ આવતું હતું.
* સલામતી રક્ષકોએ બનાવેલી સુરક્ષાની કમાનને કોઇ કાર્યકરો કે લોકોએ તોડી ન હતી,કેમ કે પ્રત્યેક વ્યક્તિને ખુલ્લી જીપમાં સવાર નરેન્દ્ર મોદી દેખાઇ આવતા હતા.
* સફેદ પહેરવેશમાં માથે કેસરી ટોપી પહેરેલા મોદી ઉનાળાની ગરમીમાં લોકોનું અભિવાદન ઝિલતા જોવા મળ્યા હતા.
* ખુલ્લી જીપને વિજયરથ બનાવી દેવામાં આવ્યો હતો.આ રથમાં મોદીની સાથે મુખ્યમંત્રી ભૂપેન્દ્ર પટેલ અને પ્રદેશ પ્રમુખ સીઆર પાટીલ સવાર હતા.
* જીપની સ્પીડ ઘણી ધીમી હોવાથી લોકોને મોદી દેખાઇ આવતા હતા.નવ કિલોમીટરનો માર્ગ કાપતા આ જીપને બે કલાક જેવો સમય લાગ્યો હતો.
* નરેન્દ્ર મોદી 10 મહિના પછી ગુજરાતમાં આવ્યા હોવાથી તેમજ ચાર રાજ્યોની ચૂંટણીના વિજયના કારણે કાર્યકરોમાં ઉત્સાહનું વાતાવરણ જોવા મળ્યું હતું.
* માર્ગની બન્ને સાઇડે વેલકમ નરેન્દ્ર મોદીના સાઇનબોર્ડ લગાવવામાં આવ્યા હતા.ગુજરાતની જનતા કોરોના સંક્રમણના સમય પછી બે વર્ષે ખુલીને બહાર આવી હતી.
* રોડ-શો દરમ્યાન માર્ગમાં મયૂર ડાન્સ,કુચીપુડી,ભારત નાટયમ જેવી પ્રસ્તૃતિથી વડાપ્રધાનનું સ્વાગત કરવાનો થનગનાટ જોવા મળ્યો હતો.
* રોડ-શોમાં દેશભક્તિનો રંગ પણ જોવા મળ્યો હતો.માર્ગમાં પાટીદાર સમાજ અને ઉંઝા ઉમિયાધામના આગેવાનો દ્વારા નરેન્દ્ર મોદીનું સ્વાગત કરવામાં આવ્યું હતું.
* ગુજરાતનું ગૌરવ,રાષ્ટ્રનું સ્વાભિમાન અને વૈશ્વિક નેતા એ પ્રકારના પોસ્ટર માર્ગમાં ઠેરઠેર જોવા મળ્યા હતા.
* રોડ-શોમાં અમદાવાદ અને ગાંધીનગરના કાર્યકર્તાઓ ઉપરાંત બન્ને જિલ્લા ઉપરાંત ઉત્તર ગુજરાતના જિલ્લાઓના ગામડાઓની જનતા મોટી સંખ્યામાં ઉમટી પડી હતી.
* રોડ-શો દરમ્યાન યુથ કોંગ્રેસના કાર્યકરો દ્વારા કાળા ઝંડા ફરકાવવાની કોંગ્રેસની દાનતને ગુજરાત પોલીસે વિફળ બનાવી હતી.દેખાવો પહેલાં આ કાર્યકરોની અટકાયત કરી લેવામાં આવી હતી.
* લોકોની ભીડ જોતાં એવું લાગતું હતું કે ઉત્તરપ્રદેશની જીતનો જશ્ન ગુજરાતમાં જોવા મળ્યો હતો.મોદીએ પણ વિક્ટરીની સાઇન કરીને લોકોને ઉત્સાહિત બનાવ્યા હતા.
* આઇબીના રિપોર્ટ પ્રમાણે રોડ-શોમાં ત્રણથી ચાર લાખની જનમેદની ઉમટી પડી હતી.
* ભાજપના પ્રદેશ કાર્યાલય કમલમમાં અંજીર-બદામના હલવા સાથે અવનવી ગુજરાતી વાનગીઓનું ભોજન પિરસવામાં આવ્યું હતું.વડાપ્રધાને પ્રદેશના સાથીઓ સાથે બપોરનું ભોજન કમલમમાં કર્યું હતું.
* વડાપ્રધાન આવવાના હોવાથી પ્રદેશ કાર્યલયને ફુલોથી શણગારવામાં આવ્યું હતું.અદ્દભૂત ડેકોરેશનથી સજ્જ અનેક જગ્યાએ લાઇટીંગની વ્યવસ્થા પણ જોવા મળતી હતી.
* કાર્યલયમાં ખુલ્લી જગ્યાએ મોદીની રંગોળી પણ બનાવવામાં આવી હતી,જે ધ્યાનાકર્ષક રહી હતી.
