મુંબઈ,તા.28 માર્ચ 2022,સોમવાર : કેન્દ્ર સરકારે ગુડ્સ એન્ડ સર્વિસ ટેક્સ (જીએસટી)ની ચોરી કરવાના વિવિધ કેસમાં કુલ 11 ક્રિપ્ટો એક્સચેન્જો પાસેથી વ્યાજ અને પેનલ્ટી સહિત કુલ રૂ. 96 કરોડની વસૂલાત કરી છે.કેન્દ્ર સરકારે સોમવારે સોમવારે આ અંગેના આંકડા જાહેર કર્યા છે.
GST ઈન્વેસ્ટિગેશન ડિપાર્ટમેન્ટે ક્રિપ્ટો એક્સચેન્જો દ્વારા કુલ રૂ. 81.54 કરોડની ચોરી શોધી કાઢવામાં આવી છે,જેમાં WazirX, Coin DCX અને CoinSwitch Kuberનો સમાવેશ થાય છે.નાણાં રાજ્ય મંત્રી પંકજ ચૌધરીએ એક લેખિત જવાબમાં જણાવ્યું હતું કે WazirX બ્રાન્ડની માલિકી ધરાવતી Zanmai લેબ્સે રૂ. 40.5 કરોડની કરચોરી કરી છે.વ્યાજ અને દંડ સહિત કુલ રૂ. 50 કરોડની વસૂલાત તેની પાસેથી કરવામાં આવી છે.
કોઈન ડીસીએક્સે રૂ. 15.70 કરોડની કરચોરી કરી છે અને ત્યારબાદ કોઈન સ્વિચ કુબેર અને જિયોટસ ટેક્નોલોજીસ(Giottus Technologies) આવે છે.આ એક્સચેન્જોએ વ્યાજ અને દંડ સહિત અનુક્રમે રૂ. 17.10 કરોડ અને રૂ. 3.50 કરોડ ચૂકવ્યા હતા.
સેન્ટ્રલ GST મુંબઈ ઝોનના અધિકારીઓ સંભવિત કરચોરીના માધ્યમોને ઓળખવા માટે ઈ-કોમર્સ,ઓનલાઈન ગેમિંગ,નોન-ફંજીબલ ટોકન્સ જેવા વિકસતા આર્થિક સ્પેસથી સંબંધિત બિઝનેસ ટ્રાન્ઝેક્શનોની તપાસ કરી રહ્યા છે.
