નવી દિલ્હી,તા.28 માર્ચ 2022,સોમવાર : ક્રૂડના ભાવ ભડકે બળતા ભારતે વિશ્વમાં સૌથી સસ્તા ભાવે મળતા ઓઈલ તરફ દોટ મુકી છે.જોકે ભારતે સ્પષ્ટ ના પાડી છે કે ભારત રશિયા કે અન્ય દેશો,જે ભારતને ડિસ્કાઉન્ટમાં ક્રૂડ ઓઈલ ઓફર કરી રહી છે,તેમની પાસે તેમના ચલણમાં ચૂકવણી નહિ કરે.
પશ્ચિમી દેશોએ યુક્રેન પર આક્રમણને કારણે રશિયા પર લાદેલ પ્રતિબંધો અંગે અનેક અટકળો પર પૂર્ણવિરામ મુકતા પેટ્રોલિયમ અને કુદરતી ગેસ રાજ્ય મંત્રી રામેશ્વર તેલીએ સોમવારે સંસદમાં જણાવ્યું હતું કે ભારત ભારતીય રૂપિયાનો ઉપયોગ કરીને રશિયા અથવા અન્ય કોઈ દેશ પાસેથી ક્રૂડ ઓઈલ ખરીદવાનું વિચારી રહ્યું નથી.
પશ્ચિમી પ્રતિબંધોને કારણે રશિયાના ડોલર આધારિત વેપારને અસર થઈ છે.ચીન અને ભારત સાથેના સોદામાં યુઆન અને રૂપિયાના સંભવિત ઉપયોગ સહિત અન્ય કરન્સી પર સ્વિચ કરવાના મોસ્કોના પ્રયાસો પર ધ્યાન કેન્દ્રિત કરવામાં આવી રહ્યું હોવાના અહેવાલો રજૂ થયા હતા.
જાહેર ક્ષેત્રની ઓઈલ કંપનીઓ પાસે ભારતીય રૂપિયામાં ક્રૂડ ઓઇલની ખરીદી માટે રશિયા અથવા અન્ય કોઈ દેશ તરફથી કોઈ કરાર નથી અને ન તો આવી કોઈ દરખાસ્ત વિચારણા હેઠળ છે,” તેમ તેલીએ જણાવ્યું હતું.
ક્રૂડના વિશ્વના ત્રીજા સૌથી મોટા આયાતકાર દેશની કંપનીઓ રશિયા તરફથી ઓફર થતા મોટા ડિસ્કાઉન્ટનો લાભ લઈને સ્પોટ ટેન્ડરો દ્વારા રશિયન ઓઈલની ખરીદી કરી રહી છે જ્યારે અન્ય ખરીદદારો યુક્રેન પર તેના આક્રમણ માટે મોસ્કો પર ખરીદી કરવાનું ટાળે છે.
ઓઈલ મિનિસ્ટર હરદીપ સિંહ પુરીએ મહિનાની શરૂઆતમાં કહ્યું હતું કે ભારત ક્રૂડ ખરીદવા માટે રશિયન સત્તાધીશો સાથે વાતચીત કરી રહ્યું છે અને ઈન્શ્યોરન્સ,ફ્રેઈટ અને ચૂકવણી સંબંધિત મુદ્દાઓ પર વાટાઘાટો કરી રહ્યું છે.
