નવી દિલ્હી, તા.૧૬ : દેશમાં પેટ્રોલ અને ડીઝલના ભાવમાં વિક્રમી વધારાથી તેની માગ પર નકારાત્મક અસર પડી છે.સરકારી ઓઈલ કંપનીઓએ ૨૨મી માર્ચથી ૬ઠ્ઠી એપ્રિલ સુધીમાં પેટ્રોલ અને ડીઝલના ભાવમાં પ્રતિ લીટર રૂ. ૧૦નો વિક્રમી વધારો કર્યો છે,જે ઈંધણની કિંમતો પરના નિયંત્રણો દૂર થયા પછી બે દાયકામાં ૧૬ દિવસમાં સૌથી મોટો વધારો છે.ઈંધણના ભાવમાં વધારાને પગલે એપ્રિલના પહેલા વખવાડિયામાં ઈંધણના વેચાણમાં નોંધપાત્ર ઘટાડો જોવા મળ્યો છે.એટલું જ નહીં રાંધણ ગેસ (એલપીજી) અને વિમાનોમાં વપરાતા પેટ્રોલ એટીએફના વેચાણમાં પણ ઘટાડો નોંધાયો છે.સરકારી ઓઇલ માર્કેટિંગ કંપનીઓનું એપ્રિલના પ્રથમ ૧૫ દિવસમાં પેટ્રોલનું વેચાણ ૧૧.૨ લાખ ટન નોંધાયુ છે, જે માર્ચના પ્રથમ પખવાડિયાના ૧૨.૪ લાખ ટનની તુલનાએ ૯.૭ ટકાનો ઘટાડો દર્શાવે છે.તે જ રીતે ડીઝલનું વેચાણ માર્ચના પખવાડિયાના ૩૫.૩ લાખ ટનની સરખામણીએ એપ્રિલના પ્રથમ ૧૫ દિવસમાં ૧૫.૬ ટકા ઘટીને ૩૦ લાખ ટન થયું છે.કોરોના મહામારી દરમિયાન રાંધણ ગેસ એલપીજીના વેચાણમાં તેજી જોવા મળી હતી, પરંતુ હાલ તેના ભાવમાં પણ અસાધારણ વધારો થયો હોવાથી માર્ચના પહેલા ૧૫ દિવસની તુલનાએ એપ્રિલના પહેલા પખવાડિયામાં તેનું વેચાણ પણ ૧.૭ ટકા ઘટયું છે.જાણકારોનું કહેવુ છે કે, ઉત્તર પ્રદેશ સહિત પાંચ રાજ્યોની વિધાનસભાની ચૂંટણીના કારણે આંતરરાષ્ટ્રીય સ્તરે ક્રૂડ ઓઈલના ભાવમાં ઊછાળા છતાં લગભગ સાડા ચાર મહિના સુધી દેશમાં પેટ્રોલ અને ડીઝલના ભાવ સ્થિર રહ્યા હતા.વધુમાં ચૂંટણીના પરિણામો પછી પેટ્રોલ અને ડીઝલના ભાવમાં વધારાની આશંકાએ માર્ચના પહેલા બે સપ્તાહમાં ડીલર્સ તેમજ લોકોએ તેમની ટેન્કો ફૂલ કરાવી નાંખી હતી અને ઈંધણનો સંગ્રહ કર્યો હતો.અંતે ૧૩૭ દિવસ પછી સરકારી ઓઈલ કંપનીઓએ ૨૨મી માર્ચથી પેટ્રોલ અને ડીઝલના ભાવમાં વધારો શરૂ કર્યો હતો.તેમણે સાડા ચાર મહિનામાં ક્રૂડના ભાવમાં પ્રતિ બેરલ ૩૦ ડોલરના વધારાનો બોજ ગ્રાહકો પર નાંખવાનું શરૂ કર્યું.પરિણામે ૨૨ માર્ચથી ૬ એપ્રિલ વચ્ચે પેટ્રોલ અને ડીઝલની કિંમતમાં પ્રતિ લિટર દીઠ રૂ. ૧૦નો વધારો થયો છે,જે ઇંધણની કિંમતો પરના નિયંત્રણો દૂર કર્યા પછી બે દાયકાના સમયગાળા દરમિયાન ૧૬ દિવસમાં અત્યાર સુધીની સૌથી ઝડપી ભાવ વૃદ્ધિ છે.વધુમાં ૨૨મી માર્ચે એલપીજીના ભાવમાં પણ પ્રતિ સિલિન્ડર રૂ.૫૦નો વધારો કરાયો હતો. જેથી એલપીજીના ભાવ પ્રતિ સિલિન્ડર રૂ. ૯૪૯.૫૦ના સ્તરે પહોંચી ગયા હતા, જે સબસીડાઈઝ્ડ એલપીજી સિલિન્ડર માટેનો અત્યાર સુધીનો સૌથી વધુ ભાવવધારો હતો.એપ્રિલના પ્રથમ પખવાડિયામાં પેટ્રોલ-ડીઝલની માંગ ભલે ઘટી હોય જો કે રાંધણગેસનો વપરાશ માર્ચના સમીક્ષાધીન સમયગાળાની તુલનામાં ૧.૭ ટકા વધ્યો છે.જો કે વિમાન ઇંધણની કિંમત સતત વધીને રેકોર્ડ ઉંચા સ્તરે પહોંચી જતા માસિક ધોરણે એપ્રિલના પ્રથમ ૧૫ દિવસમાં તેનું વેચાણ ૨૦.૫ ટકા ઘટયુ છે.જેટ ફ્યુઅલના ભાવ પ્રતિ કિલોલીટર રૂ. ૧,૧૩,૨૦૨.૩૩ છે.એપ્રિલ ૨૦૨૨માં માસિક ધોરણે ઈંધણનો વપરાશ ઘટયો છે,પરંતુ વાર્ષિક આધારે જોઈએ તો પેટ્રોલનો વપરાશ વર્ષ ૨૦૨૧ના સમાન સમયની સરખામણીએ તેમાં ૧૨.૧ ટકા અને ૨૦૨૦ના સમાન સમયની તુલનાએ ૧૯.૬ ટકા વધ્યો છે.દેશમાં સૌથી વધુ વેચાતા ઈંધણ ડીઝલના વેચાણ પર નજર કરીએ તો એપ્રિલ ૨૦૨૧માં સમાન સમયની સરખામણીએ તેનું વેચાણ ૭.૪ ટકા વધ્યું છે.
ભાવ આસમાને જતાં એપ્રિલમાં પેટ્રોલ, ડીઝલ, એલપીજીના વેચાણમાં ઘટાડો
