પાલનપુર : પાલનપુર તાલુકાના જગાણા હાઇવે પર આવેલ ઇસેદુ મીલની બહારના ભાગે એક ટ્રક ચાલકે પોતાની ટ્રક ચાલુ મુકી મીલમાં બીલ નોંધાવવા ગયો હતો.તે સમયે કોઇ અજાણ્યો શખ્સ ટ્રકની ચોરી કરી ફરાર થઇ જતા ચાલકે તાલુકા પોલીસ સ્ટેશન ખાતે અજાણ્યા શખ્સ સામે ફરિયાદ નોંધાવતા પોલીસે વધુ તપાસ હાથ ધરી હતી.આ દરમિયાન ટ્રક પાલનપુરના એરોમા સર્કલે બિનવારસી મળી આવી હતી.
સાબરકાંઠાના ઇડર તાલુકાના દાવડ ગામે રહેતા અને ડ્રાઇવિંગનો ધંધો કરતા રાજેન્દ્રસિંહ જગતસિંહ વીયોલ ( રાજપુત ) પોતાની ટ્રક નં. GJ-09-Y-6845 છેલ્લા પાંચેક વર્ષથી હિંમતનગર ગંજ બજારમાં આવેલ પ્રગતિ એગ્રો પેઢીમાંથી અવાર નવાર એરંડા ભરી જગાણા ઇસેદુ મીલમાં આવતા હતા.જેમાં બુધવારે સાંજના આશરે પાંચેક વાગ્યાના સુમારે પ્રગતિ એગ્રોની પેઢીમાંથી ટ્રકમાં 160 બોરી એરંડા ભરી જેમાં એક બોરીમાં 74 કિલો લેખે કુલ 11,840 કિલો એરંડા કુલ 592 મણ એક મણની કિંમત રૂ.1400 લેખે કુલ 592 મણની કિં રૂ.8,28,800 ભરી પેઢી ઉપરથી બીલ તથા ઇવેબીલ પેઢીના મેનેજર વિપુલભાઇ ભોગીલાલ શાહ (રહે. મહાવીરનગર સોસાયટી, હિંમતનગર)એ આપ્યા હતા.જેથી રાજેન્દ્રસિંહ વીયોલ હિંમતનગરથી નિકળી રાત્રિના આશરે ૧૦.૪૫ વાગ્યાના સુમારે જગાણા ઇસેદુ મીલ આગળ આવ્યા હતા. રાજેન્દ્રસિંહ પોતાની ટ્રક મીલ બહાર ચાલુ મુકી ઇસુદે મીલમાં ગેટ ઉપર બીલ લઇ નોંધાવવા સારૂ ગયા હતા.રાજેન્દ્રસિંહ ઇસેદુ મીલના ગેટ ઉપર પાંચેક મિનિટમાં બીલ નોંધાવી પરત ટ્રક પાર્ક કરી હતી.તે જગ્યા ઉપર આવતાં તેમની એરંડા ભરેલ ટ્રક જણાયી નહોતી.પોતાની ટ્રક કોઇ ચોરી કરી લઇ ગયેલાની શંકા જણાઇ હતી.તેમણે ટ્રકમાં પડેલા મોબાઈલ પર રિંગ કરી હતી પણ કોઇએ ફોન ઉપાડ્યો નહોતો અને તે પછી ફોન બંધ થઇ ગયો હતો.ત્યારપછી પાલનપુર પોલીસ કંટ્રોલ અને શેઠ બ્રીજેશભાઇને આ બાબતની જાણ કરી હતી.જેથી પોલીસ ઘટના સ્થળ પર આવી ચાલકને સાથે રાખી આજુબાજુ તપાસ કરી હતી.પરંતુ ટ્રકનો કોઇ પત્તો ન લાગતા શેઠ બ્રીજેશભાઇ અને મેનેજર વિપુલભાઇ જગાણા ઇસેદુ મીલ પાસે આવ્યા હતા.અને તેમની સાથે રાખી ટ્રક કિં. રૂ. 3,00,000, તેમજ ગાડીમાં ભરેલા એરંડા બોરી નંગ 74 કુલ ફિ.રૂ. 8,28,800 અને મોબાઇલ કિ.રૂ.10000 મળી કુલ રૂ.11,29,800ના મુદ્દામાલની ચોરીની ફરિયાદ નોંધાવી હતી.જેના આધારે પોલીસે તપાસ હાથ ધરી હતી.આ દરમિયાન ગુરુવારે પાલનપુર એરોમા સર્કલ પાસેથી આ ટ્રક એરંડા ભરેલી હાલતમાં બિનવારસી મળી આવી હતી.જેથી પોલીસે આરોપીને ઝડપી લેવા ચક્રોગતિમાન કર્યા છે.
