પૂણે, તા.૫ : બેંગ્લોર રોયલ ચેલેન્જર્સ અને ચેન્નાઈ સુપર કિંગ્સ વચ્ચેના આઇપીએલના મુકાબલામાં ધોનીની વિકેટ પડતાં જ કોહલીએ ભારે આક્રમક અંદાજમાં ઉજવણી કરી હતી.ધોનીની વિકેટની ઉજવણી અંગેનો કોહલીનો વિડિયો વાઈરલ થઈ રહ્યો છે, જેમાં તે અપશબ્દ બોલી રહ્યો હોવાનું પણ કેટલાક ચાહકોને લાગી રહ્યું છે.જોકે કેટલાક ક્રિકેટ ચાહકોએ કોહલીનો બચાવ કર્યો હતો અને કહ્યું હતુ કે, ધોનીની વિકેટ ટર્નિંગ પોઈન્ટ સમાન હતી અને કોહલી તેની ઉજવણી કરે તેમાં કશું જ ખોટું નથી.ચેન્નાઈનો કેપ્ટન ધોની લાંબી ઈનિંગ રમી શક્યો નહતો અને હેઝલવૂડની બોલિંગમાં બે રને રજત પાટિદારના હાથે કેચઆઉટ થયો હતો.આ દરમિયાન કોહલી બાઉન્ડ્રી પર ઉભો હતો અને ત્યાં તે જોશભેર ઉછળી પડયો હતો.વિડિયો જોતા કેટલાક ચાહકોને લાગ્યું કે, કોહલી અપશબ્દ બોલ્યો હતો.
સોશિયલ મીડિયામાં ધોનીના કેટલાક ચાહકોએ કોહલીની ઝાટકણી કાઢી હતી.એક યૂઝરે લખ્યું કે, ક્રિકેટનો જોકર ધોનીનું અપમાન કરી રહ્યો છે અને તેના સાથીઓ તેને સપોર્ટ કરી રહ્યા છે.અન્ય યૂઝરે લખ્યું કે, કોહલી ભારતીય સૈન્યના જવાનનું અપમાન કરી રહ્યો છે.આવું ચલાવી જ ન લેવાય.કેટલાક યૂઝરે લખ્યું કે, કોહલીનું અસલી સ્વરુપ સામે આવી ગયું છે.જોકે કોહલીના ચાહકોએ તેનો બચાવ કર્યો હતો. એક યૂઝરે લખ્યું કે, કોહલીનું આ સેલિબ્રેશન સાવ સામાન્ય છે.તેમાં કોઈએ ખરાબ લગાડવું ન જોઈએ. અન્ય ચાહકે એવો મત વ્યક્ત કર્યો કે, ધોનીની વિકેટ નિર્ણાયક હતી.તે એકલા હાથે બાજી પલ્ટી નાંખી શકે તેમ છે.આવી સ્થિતિમાં કોહલીએ જોશભેર ઉજવણી કરી તેમાં કશું ખોટું નથી.ક્રિકટેની મજા ખેલાડીઓના અંદાજમાં છે અને કોહલીનો આ અંદાજ જાણીતો છે.
