પલસાણામાં ફાયરિંગ કરી લૂટ ચલાવનાર આરોપીઓ ઝડપાયા

પલસાણા : સુરત જિલ્લાના પલસાણા ખાતે એક યુવાન અને તેના મિત્રોને કેટલાક શખ્સોએ મારમારી હવામાં ફાયરિંગ કરી રોકડા રૂ. 12,000 ની લૂટ ચલાવી ભાગી છૂટ્યા હતા.આ ઘટનામાં પલસાણા પોલીસે 11 વ્યક્તિઓ વિરુદ્ધ ગુનો નોંધ્યો હતો.જે પૈકી 7 આરોપીઓને સુરત ગ્રામ્ય એલસીબી પોલીસની ટીમે માંખીંગા ગામની સીમમાં મીઢોળા નદી કિનારે આવેલ ખેતરમાંથી ઝડપી પાડ્યા છે.જ્યારે બાકીના 4 આરોપીઓને પલસાણા પોલીસે ઝડપી પાડ્યા હોવાનું જાણવા મળે છે.પકડાયેલ આરોપીઓ પાસેથી પોલીસે બે મોપેડ તેમજ મોબાઈલ ફોન અને રોકડ રકમ મળી કુલ રૂ. 98 હજારનો મુદ્દામાલ કબ્જે કર્યો છે.

મળતી માહિતી અનુસાર પલસાણા ખાતે કાલાઘોડામાં સચિતાંનંદ મિલમાં ડ્રોમ ખાતામાં છેલ્લા 7 વર્ષીથી નોકરી કરતા સોનુ રામઅવધ શર્મા (ઉ.વ.23 હાલ રહે.108 સત્યમ કોમ્પ્લેક્ષ સી.એન.જી.પંપની બાજુમાં પલસાણા મૂળ રહે.ગંગાનગર ગલી.નંબર 13 થાના ગંગાઘાટ તાં.ઉન્નઆવ જી.કાનપુર) નાઓ રવિવારે મોડી રાતે મિત્ર રાજુ વર્માની દીકરી લાડલીના જન્મ દિવસમાં હાજરી આપવા મિત્ર તૈકિર ઇસરાર ખાન સાથે પોતાની મોટરસાયકલ GJ 19 BF 3637 લઈ ગયા હતા મળસ્કે 2 વાગ્યા દરમિયાન સોનું મોટરસાયકલ પર મિત્ર તૌકિર ખાનને તેના ઘરે પ્રવેશ પાર્કમાં નાગરાજ ભાઈની બિલ્ડિંગમાં મુકવા ગયો ત્યારે કેટલાક શખ્સોએ આ યુવાનો સાથે ઝગડો કરી મારમારી હવામાં ફાયરિંગ કરી રોકડા રૂ. 12 હજારની લૂટ ચલાવી ભાગી છૂટ્યા હતા.જે ઘટનામાં પલસાણા પોલીસે 11 વ્યક્તિ વિરુદ્ધ ગુનો નોંધી આગળની કાર્યવાહી હાથ ધરી હતી.તે દરમ્યાન આજરોજ સુરત જિલ્લા એલસીબી પોલીસની અલગ અલગ ટીમોએ સીસીટીવી ફૂટેજ ચકાસી આ વ્યક્તિઓની શોધખોળ શરૂ કરી હતી. ત્યારે એલસીબી પોલીસની ટીમને ખાનગી રાહે બાતમી મળતા તેઓ માંખીંગા ગામની સીમમાં મીઢોળા નદીના કિનારે આવેલ એક ખેતરમાં પહોંચ્યા હતા.અને ખેતરમાં સંતાયેલ 7 આરોપીઓને ઝડપી પાડ્યા હતા અને તેમની પાસેથી સુઝુકી એક્સેસ નંબર જીજે-26-એસ-2274, એક્ટિવા નંબર જીજે-19-બીબી-7839, ચાર મોબાઈલ ફોન તેમજ રોકડા 3 હજાર મળી કુલ રૂ, 98 હજારનો મુદ્દામાલ કબ્જે કરી પકડાયેલ આરોપીઓનો કબ્જો પલસાણા પોલીસને સોંપ્યો છે. જ્યારે બીજી તરફ આ ગુનામાં સંડોવાયેલ અન્ય ચાર આરોપીઓને પલસાણા પોલીસે ઝડપી પાડ્યા હોવાનું જાણવા મળે છે.

પકડાયેલ આરોપીઓ

– રોહિત દિનેશ વાંસફોડીયા (રહેવાસી – અંત્રોલી ગામ, ભૂરીફળિયુ, પલસાણા જીલ્લો – સુરત)

– અબ્દુલ્લા આશીફ છોટેલાલ અંસારી (રહેવાસી – પલસાણા,પ્રવેશપાર્ક, મૂળ રહે, મીરપુર છોની ગામ, યુ.પી)

– ગોપાલ પ્રવીણભાઈ વાંસફોડીયા (રહે, દુર્ગા કોલોની, પલસાણા, તથા પલસાણા સાઈદર્શન એપાર્ટમેંટ)

– શંતુ ઉર્ફે કાતીયા રામ પ્રકાશ પાસવાન (હાલ, પલસાણા, શિવસાઈ રેસિડન્સી, મૂળ રહે, તરીયા ગામ, ઝારખંડ)

– આકાશ ઉર્ફે લાલીયો ઉકકડભાઈ રાઠોડ (રહે, દુર્ગાકોલોની પલસાણા)

– ચંદન રામુ યાદવ (રહે, પ્રથમપાર્ક, મોદી શેઠની બિલ્ડીંગ, પલસાણા)

– રોનીત ઉર્ફે રોની ઉપેન્દ્રસિંગ રાજપૂત (રહે, પલસાણા, આશીર્વાદ વિલા,)