નવી દિલ્હી : દર્દી કે તેના સંબંધીઓ ડોક્ટર સાથે અપમાનજનક કે હિંસક વર્તન કરે તો તેવા કિસ્સામાં ડોક્ટર્સને સારવારનો ઇનકાર કરવાનો હક મળે તેવી શક્યતા છે.નેશનલ મેડિકલ કમિશને ડોક્ટર્સ માટેના પ્રોફેશનલ વર્તણુક અંગેના નિયમોના મુસદ્દામાં આ દરખાસ્ત કરી છે.નેશનલ મેડિકલ કમિશનમાં રજિસ્ટ્રર્ડ મેડિકલ પ્રેક્ટિશનર(પ્રોફેશનલ કન્ડક્ટ)ના નિયમો,2022ના મુસદ્દા મુજબ દર્દી કે તેના સત્તાવાર સંબંધીઓએ મેડિકલ રેકોર્ડ માટે કરેલી વિનંતીની યોગ્ય પહોંચ આપવાની રહેશે અને આ મેડિકલ ડોક્યુમેન્ટ હાલના 72 કલાકની જગ્યાએ પાંચ વર્કિંગ દિવસમાં આપવાના રહેશે.જોકે ઇમર્જન્સીના કિસ્સામાં સમાન દિવસે મેડિકલ રેકોર્ડ ઉપલબ્ધ કરવાનો રહેશે.દર્દીની સારવાર કરતાં ડોક્ટર્સ તેમના પગલાં માટે સંપૂર્ણ જવાબદાર રહેશે.
જો દર્દી કે સંબંધોએ અયોગ્ય કે હિંસક વર્તન કરે તો ડોક્ટર્સ સારવારનો ઇનકાર કરી શકશે.આવા દર્દીને સારવાર માટે બીજી જગ્યાએ મોકલી શકાશે.ડોક્ટર ફરજ દરમિયાન આલ્કોહોલ કે બીજા કેફી પદાર્થોનું સેવન કરશે તો તેને ગેરવર્તણુંક માનવામાં આવશે.જો દર્દી તેને આપવામાં આવેલા અંદાજ મુજબ ફી નહીં ચુકવે તો ડોક્ટર્સ વધુ સારવારનો ઇનકાર કરી શકશે.જોકે સરકારી ડોક્ટર્સ કે ઇમર્જન્સીના કિસ્સામાં આ નિયમ લાગુ નહીં પડે.
નેશનલ મેડિકલ કમિશને પ્રથમ વખત‘મોડર્ન મેડિસિન’ની વ્યાખ્યા કરી છે અને મોડર્ન મેડિસિનની પ્રેક્ટિસ કરતા ડોક્ટર્સને તેમના નામ આગળ ‘મેડ ડો.’લખવાની મંજૂરી આપવાની દરખાસ્ત કરી છે.મેડિકલ પ્રેક્ટિશનર માટેની આચારસંહિતાના મુસદ્દામાં જણાવ્યા અનુસાર રજિસ્ટ્રર્ડ મેડિકલ પ્રેક્ટિશનર્સ(આરએમપી)એ કોઇ ફાર્મા કંપની કે સંબંધિત હેલ્થ સેક્ટર પાસેથી છેલ્લાં પાંચ વર્ષમાં થયેલી નાણાકીય કમાણી કે લાભો અંગેની એફિડેવિટ રજૂ કરવાની રહેશે.એનએમસી એક્ટ 2019 હેઠળ રજિસ્ટર્ડ થયેલા હોય તેવા જ ડોક્ટર્સે તેમના નામની આગળ મેડિકલ ડોક્ટર લખી શકશે
