અમદાવાદ : સિમેન્ટ ક્ષેત્રે અદાણી ગ્રુપની એન્ટ્રીથી અનેક નવા સમીકરણો રચાઈ રહ્યા છે.અદાણી ગ્રુપે હોલ્સિમનો ભારત ખાતેનો સિમેન્ટ બિઝનેસ 10.5 અબજ ડોલરમાં ખરીદી લેતા અન્ય પ્રસ્થાપિત કંપનીઓમાં ભારે સળવળાટ શરૂ થઈ ગયો છે.અદાણી ગ્રુપની એન્ટ્રીથી સ્પર્ધા વધશે તે નિશ્ચિત છે અને તે સાથે જ પ્રસ્થાપિત કંપનીઓએ તેમની વિસ્તરણ યોજના પણ ધડાધડ જાહેર કરવા માંડી છે.ગત સપ્તાહે દાલમિયા ભારત લિમિટેડે જાહેરાત કરી છે કે તે રૂ.9000 કરોડની વિસ્તરણ યોજના આગળ ધપાવવા મક્કમ છે.તેણે કહ્યું કે ઈન્ફ્રાસ્ટ્રક્ચર અને હાઉસિંગ સેક્ટર પર સરકારનું ફોકસ સિમેન્ટ સેક્ટર માટે આશાવાદ ઊભો કરે છે.અને એટલે જ તે તેની વિસ્તરણ યોજના આગળ ધપાવવા કટિબદ્ધ છે.તેના મતે પ્રોડક્શન લિન્ક્ડ ઈન્સેન્ટિવ(PLI)ને કારણે આ સેક્ટરને ઉત્પાદન ક્ષમતા વધારવા બળ મળ્યું છે. દાલમિયા હાલમાં 3.59 કરોડ ટનની ઉત્પાદન ક્ષમતા ધરાવે છે અને 2023-24 સુધીમાં તે વધારીને 4.85 કરોડ ટન કરવાની તેની યોજના છે.2030 સુધીમાં આ ક્ષમતા વધારીને 11-13 કરોડ ટન કરવાનો ટારગેટ તેણે રાખ્યો છે.
આદિત્ય બિરલા ગ્રુપનો સિમેન્ટ ક્ષેત્રે દબદબો છે.આ ગ્રુપની અલ્ટ્રાટેક સિમેન્ટ માર્કેટ લીડર છે.અલ્ટ્રાટેકે તેની વર્તમાન 12 કરોડ ટનની ઉત્પાદન ક્ષમતા વધારીને 15.92 કરોડ ટન કરવાની જાહેરાત કરી દીધી છે.તેણે જાહેરાત કરી છે કે તે આગામી 2-3 વર્ષમાં તેની ઉત્પાદન ક્ષમતા વાર્ષિક 2.26 કરોડ ટન વધારવા માટે રૂ.12,886 કરોડનું રોકાણ કરશે.નવી ક્ષમતા સાથેનું ઉત્પાદન 2024-25થી તબક્કાવાર રીતે શરૂ થઈ જશે.હાલનું વિસ્તરણ માર્ચ-2023 સુધીમાં પૂરું થઈ જશે.અદાણી ગ્રુપે હોલ્સિમનો વર્તમાન બિઝનેસ(અંબુજા અને એસીસી)હસ્તગત કરી લેતા તેની ઉત્પાદન ક્ષમતા 7 કરોડ ટન છે,જેને 3-4 વર્ષમાં વધારીને 10 કરોડ ટન અને 5-6 વર્ષમાં વધારીને 13 કરોડ ટન કરવાની યોજના તેણે જાહેર કરી દીધી છે.સિમેન્ટ ક્ષેત્રે આ ઉપરાંત સજ્જન જિંદાલનું જેએસડબ્લ્યૂ ગ્રુપ પણ હરીફાઈમાં છે.તેણે હોલ્સિમ માટે 7 અબજ ડોલરની બિડ કરી હતી.પરંતુ અદાણી ગ્રુપ સામે તેનો પનો ટૂંકો પડ્યો.જેએસડબ્લ્યુની સિમેન્ટ ઉત્પાદન ક્ષમતા 1.4 કરોડ ટન છે અને તે વધારીને 2.5 કરોડ ટન કરવાની તેની યોજના છે.
એનલિસ્ટ્સના મતે સિમેન્ટ ક્ષેત્રે સ્પર્ધા વધી રહી છે અને ઉત્પાદન ક્ષમતા પણ વધી રહી છે.સરકારે ઈન્ફ્રાસ્ટ્રક્ચર પર ખાસ્સું ફોકસ વધાર્યું છે અને બીજી તરફ ખાનગી ક્ષેત્રે પણ હવે કેપેક્સ વધી રહ્યું છે તે જોતા સિમેન્ટની માંગ વધશે.બીજી તરફ આ ક્ષેત્રે જેપી,આંધ્ર સિમેન્ટ,સિમેન્ટ કોર્પોરેશન ઓફ ઈન્ડિયા,ભીમા સિમેન્ટ,વગેરે કંપનીઓની 2.5-3.0 કરોડ ટનની સિમેન્ટ ઉત્પાદન ક્ષમતા સાથેની સ્ટ્રેસ્ડ એસેટ્સ પણ તૈયાર છે.આ ઉપરાંત નવી 15-16 કરોડ ટનની ક્ષમતા આગામી પાંચ વર્ષમાં ઊભી થશે.
