અમદાવાદ : રવિવાર,12 જુન,2022 : અમદાવાદ મ્યુનિસિપલ કોર્પોરેશનના વહીવટીતંત્રમાં એક સમયે બહુચર્ચિત બનેલા રસીદકાંડની તપાસ અભેરાઈ ઉપર ચઢાવી દેવામાં આવી છે.હોસ્પિટલમાં કોમ્પ્યુટર સિસ્ટમ હોવાછતાં કોમ્પ્યુટર રસીદ દર્દી કે તેમના સ્વજનને આપવાના બદલે હાથથી લખેલી રસીદો આપી વીસ લાખની રકમની ઉચાપત કરવામાં આવી હોવાનું વિજિલન્સ તપાસમાં બહાર આવવા પામ્યુ હતું.
મ્યુનિ.સંચાલિત વી.એસ.હોસ્પિટલમાં રાજદીપ એન્ટર પ્રાઈઝને હોસ્પિટલની સેવાઓ માટે આઉટ સોર્સિંગ કોન્ટ્રાકટ એજન્સી તરીકે વર્ષ-૨૦૧૩-૧૪માં કેશ કલેકશનની કામગીરી સોંપાઈ હતી.આ અગાઉ મે.ઓરીઓન કોમ્યુટેક પ્રા.લી.ને કોન્ટ્રાકટ મળેલો હતો.એ સમયે હોસ્પિટલ તરફથી ગરીબ દર્દીઓને બલ્ડ ટેસ્ટ,એકસ-રે ઉપરાંત દવાઓ ઉપરાંત કન્સલ્ટન્ટ ચાર્જ સહિતની સેવાઓમાં રાહત અપાતી હતી.
હોસ્પિટલના કમ્પ્યુટરાઈઝેશન બાદ બિલીંગ સિસ્ટમ પ્રાઈવેટ એજન્સીને સોંપવામાં આવ્યા બાદ દરેક રસીદના ત્રણ સેટ બનતા હતા.એજન્સીના માણસો દર્દી કે તેના સ્વજનને કોમ્પ્યુટર સિસ્ટમ ચાલુ હોવા છતાં સિસ્ટમ બંધ છે એવુ કારણ આગળ ધરી હાથે લખેલી રસીદ આપી રકમ સાથે ચેડાં કરતા હતા.દર્દી કે તેના સ્વજનને રસીદ આપતી વખતે કાર્બન પેપર મુકાતો નહોતો.બાદમાં બાકીની બે કોપીમાં ભરવામાં આવેલી રકમથી ઓછી રકમ દર્શાવી એટલી રકમ જમા કરાવાતી હતી.૩૬ હજારથી વધુની રકમ દર્દીના સ્વજન દ્વારા ભરવામાં આવ્યા બાદ આ રકમ હોસ્પિટલમાં જમા થઈ કે કેમ? એ બાબતમાં જોહરવોરા દ્વારા માંગવામાં આવેલી માહિતી બાદ વિજિલન્સ તપાસમાં આ કૌભાંડ ખુલવા પામ્યુ હતું.
વિજિલન્સ તપાસ બાદ હોસ્પિટલ સત્તાવાળાઓ ઉપર દબાણ આવતા આ મામલે એલિસબ્રીજ પોલીસ સ્ટેશનમાં ફરિયાદ હોસ્પિટલ તરફથી કરાઈ હતી.જેમાં કોન્ટ્રાકટરના કર્મચારીઓ દ્વારા દર્દી કે તેના સ્વજનને મુળ પહોંચ આપીને ઓફિસ કોપીમાં કાર્બન મુકી એમાં દર્દીનું નામ,નંબર,તારીખ વગેરે વિગત લખી ભરેલી રકમથી ઓછી રકમ લખી નાણાંકીય ઉચાપત કરવામાં આવતી હતી.આ કૌભાંડની તપાસ મ્યુનિ.એ અભેરાઈ ઉપર ચઢાવી દેતા હાલમાં આ મામલે કોર્ટમાં કાર્યવાહી ચાલતી હોવાનું આધારભૂત સૂત્રોમાંથી જાણવા મળ્યુ છે.
