અમદાવાદ : ડાર્કવેબ મારફતે ઇન્ટરનેશનલ ડ્રગ ડિલરોનો સંપર્ક કરીને કરોડો રૂપિયાના ડ્રગનો વેપલો કરનાર વિપલ સંજયગીરી ગોસ્વામી અને ગીત મહેશ મહેતાની જામીન અરજી ગ્રામ્ય કોર્ટે ફગાવી દીધી છે. કોર્ટના સ્પેશિયલ એનડીપીએસ જજ ડી.કે.દવેએ નોંધ્યુ હતું કે,આરોપીઓને મહત્ત્વનો રોલ છે.મુખ્ય સૂત્રધાર વંદિત ભરતભાઈ પટેલે વિદેશથી મોટાપાયે ડ્રગ્સ મંગાવીને ગુજરાત સહિત અન્યો રાજયોમાં મોકલી આપ્યું હોવાનું તપાસમાં ખૂલ્યુ હતુ.આરોપીઓ સાથે અન્ય શખ્સોની પણ સંડોવણી બહાર આવી છે.જેની હાલમાં તપાસ ચાલી રહી છે.ત્યારે બન્ને આરોપીને જામીન પર મુક્ત કરવા ન્યાયોચિત જણાતુ નથી.
ડાર્કવેબ મારફતે ઇન્ટરનેશનલ ડ્રગ ડિલરોનો સંપર્ક કરીને કરોડો રૂપિયાના ડ્રગનો વેપલો કરનાર વિપલ ગોસ્વામી અને ગીત મહેશ મહેતાએ ગ્રામ્ય કોર્ટમાં જામીન મેળવવા અરજી કરી એવી રજૂઆત કરી હતી કે,ખોટી રીતે સંડોવી દેવામાં આવ્યા છે,આ મામલે ચાર્જશીટ પણ થઇ ચુકી છે,પોલીસ તપાસમાં સહકાર આપ્યો છે,ચાર્જશીટ જોતા કોઇ જ રોલ નથી,કોર્ટ પાસે જામીન આપવાની સત્તા છે અને કોર્ટ જામીન આપે તો તમામ શરતોનું પાલન કરવા તૈયાર છીએ તેથી જામીન પર મુક્ત કરવા જોઇએ.
જો કે,પોલીસ દ્વારા કરવામાં આવેલ એફિડેવિટ મુખ્ય સરકારી વકીલ પ્રવીણ ત્રિવેદીએ કોર્ટમાં રજૂ કરી એવી રજૂઆત કરી હતી કે, આરોપી પોતે ડ્રગ્સનો એડિક્ટ છે અને પોતાને આર્થિક લાભ મળે તે માટે વંદિત પટેલ પાસેથી ડ્રગ્સ મેળવીને પેડલરોને વેચાણ કરતા હતા.કસ્ટમ ક્લીયરન્સ સમયે છેલ્લા ત્રણ વર્ષમાં 186 જેટલા ડ્રગ્સના પાર્સલો જપ્ત કરવામાં આવ્યા હતા.32 કિલોથી વધુ પ્રતિબંધિત ડ્રગ્સ હતું. આરોપી વિપલ ગોસ્વામી તથા સહ આરોપીઓ સાથે વોટસએપ,વીકર મી તથા સ્નેપચેટ જેવી એપ્લિકેશન મારફતે સપર્ક ધરાવતો હોવાનું ઈલેક્ટ્રીક સર્વેલન્સમાં બહાર આવ્યું છે.
