-સમજાવવા ગયેલા પી.આઈ. ગિલાતર અને શુગર ફેક્ટરીના ઉપપ્રમુખ ભાવેશ પટેલ સહિતના હોદ્દેદારો પર પથ્થરમારો
વાલિયા અને નિઝર – ઉચ્છલ તરફથી શેરડી લઈને આવતી બારડોલી શુગર ફેક્ટરીની ટ્રકના ડ્રાઇવર અને ક્લીનરોને પોલીસે માર મારતા ગુરુવારે મોડીરાત્રે તેઓએ શેરડી ભરેલા વાહનો શુગર ફેક્ટરીમાં જતાં અટકાવી દીધા હતા. અને કાંટા વિભાગમાં આવેલ વજન કાંટો, કમ્પ્યુટર તેમજ પાર્ક કરેલ વાહનોને નુકસાન પહોંચાડવાની શરૂઆત કરી હતી. તેઓને સમજાવવા ગયેલા શુગર મિલના ઉપપ્રમુખ ભાવેશ પટેલ, બારડોલી પીઆઇ ગિલાતર અને તેમના સ્ટાફના માણસો પર ડ્રાઇવર અને ક્લીનરોએ પથ્થર મારો કરતાં મામલો બીચક્યો હતો. બાદમાં પોલીસે બળપ્રયોગ કરી હુમલો કરનાર 48 જેટલા ટ્રક ચાલકો અને ક્લીનરોની ધરપકડ કરી આગળની કાર્યવાહી હાથ ધરી છે.
આ અંગે મળતી માહિતી અનુસાર ખેડૂત સહકારી ખાંડ ઉદ્યોગ મંડળી લિમિટેડ (બારડોલી શુગર ફેક્ટરી)ના કાંટા વિભાગમાં આશરે 170થી વધુ ટ્રક ડ્રાઇવર અને ક્લીનરોએ ભેગા મળી ગુરુવારે રાત્રે શેરડી ભરેલી ટ્રકો, ટ્રેક્ટર અને બળદ ગાડાઓને શુગર ફેક્ટરીમાં જતાં અટકાવી દીધા હતા. આથી બારડોલી શુગર ફેક્ટરીના ઉપપ્રમુખ ભાવેશ પટેલ આ બાબતે પૂછવા જતાં ટ્રક ચાલકોએ જણાવ્યુ હતું કે તેઓ વાલિયા, ઉચ્છલ અને નિઝર વિસ્તારમાં શેરડી લેવા માટે ગયા હતા ત્યાંથી આવતી વખતે પોલીસે રોકી તેઓને માર માર્યો છે. આથી અમે સુગર ફેક્ટરી ચાલવા દઇશું નહીં અને ટ્રકો પણ ખાલી કરીશું નહિ એમ કહી હલ્લાબોલ મચાવી દીધો હતો. ચાલક અને ક્લીનરોએ કાંટા વિભાગમાં તોફાન શરૂ કરતાં બારડોલી પોલીસના પી.આઈ. એમ.એમ. ગિલાતર, હે.કો. રાજેશ છગન, પો.કો. સોહિલ મહેશ, હોમગાર્ડ શુભમ જીવન ઉજગરે અને મયુર રાકેશ મૈસૂરિયા તેમજ શૈલેષ ભરત પટેલ સાથે સ્થળ પર પહોંચ્યા હતા. જ્યાં શુગર ફેક્ટરીના કેન યાર્ડમાં ડ્રાઇવર અને ક્લીનરોનું મોટું ટોળું ઊભું હતું. તેઓને સમજાવવા માટે બારડોલી પીઆઈ ગિલાતર સુગર ફેક્ટરીના ઉપપ્રમુખ ભાવેશ પટેલ, વાહન ઓપરેટર સમિતિના પ્રમુખ હરેશ ડાહ્યા પટેલ તેમજ સરજુ કાંતિ પટેલ, રાજુ નગીન પટેલ તથા અન્ય સભ્યો સાથે કેનયાર્ડમાં તેઓને સમજાવવા ગયા હતા. પોલીસે ચાલક અને ક્લીનરોને સમજાવતા 150 પૈકી 100 જેટલા ડ્રાઇવર સમજીને બહાર નીકળવા લાગ્યા હતા. ત્યારે બીજા આશરે 50 જેટલા ઇસમો પોલીસ અને શુગર ફેક્ટરીના સંચાલકો પર હુમલો કરવા ધસી આવ્યા હતા. કેટલાક કોયતા અને શેરડીના સપાટા અને પથ્થરોથી હુમલો કરવા લાગ્યા હતા. જેમાં બે ત્રણ ઇસમોએ પી.આઈ. ગિલાતરને પગમાં લાકડાના સપાટા મારી દીધા હતા. જ્યારે તેની સાથેના પોલીસ સ્ટાફ અને હોમગાર્ડ, ઉપપ્રમુખ ભાવેશ પટેલ, કાંટા વિભાગમાં કામ કરતાં કર્મચારીઓ રાજીવ પટેલ, નીરજ પટેલને ટોળાએ માર મારવાનું શરૂ કર્યું હતું. આ ઉપરાંત કાંટા વિભાગમાં આવેલ કમ્પ્યુટર ઓફિસ અનેલાઇટો તેમજ પાર્ક કરેલ ટ્રકો અને અન્ય વાહનોમાં તોડફોડ કરી હતી. ત્યારબાદ જિલ્લા ભરમાંથી પોલીસની કાફલો આવી જતાં પોલીસે હુમલો કરનાર 48 જેટલા ચાલક અને ક્લીનરોને પકડી લઈ જેલના સળિયા પાછળ ધકેલી દીધા હતા. જ્યારે આઠથી દસ જેટલા લોકો નાસી છૂટવામાં સફળ રહ્યા હતા. પોલીસે 48 જણાની ધરપકડ કરી આગળની તપાસ હાથ ધરી છે.
ટોળાએ પોલીસ પર હુમલો કર્યો
આ સમગ્ર ઘટનામાં બારડોલી પીઆઇ ગિલાતરને ટોળાંમાંથી કેટલાક ઇસમોએ લાકડાના સપાટાથી બંને પગમાં માર માર્યો હતો. આ ઉપરાંત હેડકોન્સ્ટેબલ રાકેશ છગનને બરડાના પથ્થર વાગતા મૂઢ માર વાગ્યો હતો. પો.કો. સોહિલને પણ જમણા હાથે લ્ક્દાનો સપાટો મારતા તે ઇજાગ્રસ્ત થઈ ગયા હતા. આ ઉપરાંત હોમગાર્ડ શુભમ જીવન ઉજગરેને કોયતાથી ગંભીર ઇજા પહોંચી હતી. કાંટા વિભાગમાં ફરજ બજાવતા રાજીવભાઈ તેમજ નીરજભાઈ પટેલને તેમજ ઉપપ્રમુખ ભાવેશ પટેલને પણ ઇજા થતાં તેઓને સારવાર અર્થે સરદાર સ્મારક હોસ્પિટલમાં ખસેડવામાં આવ્યા હતા.
