– શિવસેનાના સત્તાસંઘર્ષમાં આજે સુપ્રીમમાં સુનાવણી : આવતી કાલે શિવસેના પક્ષ અને ચિહ્ન કોને મળશે એ માટે ચૂંટણી પંચમાં બંને જૂથ હાજર રહેશે
– જોકે આજે સુનાવણી થાય છે કે મોટી બેન્ચને સોંપવામાં આવે છે એના પર છે આખા રાજ્યની નજર
એકનાથ શિંદેએ શિવસેનામાં બળવો કર્યા બાદ શિવસેના પોતાને હસ્તક કરવા માટે એકનાથ શિંદે અને ઉદ્ધવ ઠાકરે વચ્ચે લડત ચાલી રહી છે.બંને પક્ષે સુપ્રીમ કોર્ટમાં અરજીઓ કરી છે,જેની આજે સુનાવણી હાથ ધરાવાની શક્યતા છે.સુપ્રીમ કોર્ટના ચીફ જસ્ટિસ રમન્ના ૨૬ ઑગસ્ટે નિવૃત્ત થઈ રહ્યા છે એટલે તેમની અધ્યક્ષતાની ત્રણ જજની ખંડપીઠ આ મામલાની સુનાવણી પાંચ અથવા એનાથી વધુ જસ્ટિસની બેન્ચ સમક્ષ કરવાની ભલામણ કરી શકે છે.શિવસેનામાં સત્તાસંઘર્ષ માટે સુપ્રીમ કોર્ટમાં બંને જૂથ વચ્ચે ઘમસાણ ચાલી રહ્યું છે.પહેલાં ૮ ઑગસ્ટ, બાદમાં ૧૨ ઑગસ્ટ અને પછી ૨૨ ઑગસ્ટ એટલે કે આજે આ મામલાની સુનાવણી રાખવામાં આવી છે.
એકનાથ શિંદે અને ઉદ્ધવ ઠાકરે જૂથે સુપ્રીમ કોર્ટમાં વિધાનસભામાં બંને તરફના વિધાનસભ્યોએ વ્હીપનું પાલન ન કરવાના મામલે સામસામી અરજીઓ દાખલ કરી છે.એટલું જ નહીં, શિવસેના પક્ષ અને પક્ષના ચિહ્ન બાબતે પણ બંને પક્ષે રજૂઆત કરી છે.હવે આજે સુનાવણી હાથ ધરાય છે કે મોટી બેન્ચને આ મામલો સોંપવામાં આવે છે એના પર સૌની નજર રહેશે.
બીજી તરફ શિવસેના પક્ષ અને પક્ષનું ચૂંટણીચિહ્ન ધનુષબાણ મેળવવા માટે બંને જૂથે મુખ્ય ચૂંટણી પંચમાં રજૂઆત કરી છે.સુપ્રીમ કોર્ટના નિર્દેશ મુજબ બંને જૂથે આ સંબંધિત પુરાવા ચૂંટણી પંચમાં રજૂ કરી દીધા છે.બહુમતી કોની પાસે છે એના ડૉક્યુમેન્ટ્સ તપાસ્યા બાદ ચૂંટણી પંચ કોઈ નિર્ણય સંભળાવે એવી શક્યતા છે.આજે બંને તરફના નેતાઓ વકીલો સાથે ચૂંટણી પંચમાં હાજર રહે એવી શક્યતા છે.એકનાથ શિંદેએ શિવસેનાના પંચાવનમાંથી ૪૦ વિધાનસભ્યોને પોતાના પક્ષે કરી લઈને બળવો કરવાથી શિવસેના-પ્રમુખ ઉદ્ધવ ઠાકરે પાસે વિધાનસભ્યો અને સંસદસભ્યોની સંખ્યા ઓછી છે.જોકે રાજ્યભરની ગ્રામપંચાયતથી લઈને શાખાપ્રમુખ અને નગરસેવકો કેટલી સંખ્યામાં કોની સાથે છે એના આધારે પક્ષ અને ચૂંટણીચિહ્નનો નિર્ણય લેવાતો હોય છે.આ ચૂંટણી સંબંધિત મામલો છે એટલે વિધાનસભા અને લોકસભામાં એકનાથ શિંદે જૂથે પોતાના પ્રતિનિધિઓની નિયુક્તિ કરીને વ્હીપ જારી કર્યો છે,જે મહત્ત્વનું ગણાય છે.મુખ્ય ચૂંટણી પંચ આ મામલે પુરાવાના આધારે નિર્ણય લશે.
