– GPSCની પરીક્ષામાં ગરબા, ઘુમ્મર સંદર્ભના પ્રશ્નના જવાબ અસ્પષ્ટતા-અરજદાર
– માતાજીના પરંપરાગત ગરબા મહિલાઓ કરે છે પુરૂષો જે કરે છે તે એક ફેશનના ભાગરૂપે: હાઈકોર્ટ
ગુજરાત હાઈકોર્ટે આદેશ કર્યો છે કે, ગુજરાત જાહેર સેવા આયોગ (GPSC) દ્વારા ગુજરાત એડમિનિસ્ટ્રેટિવ સર્વિસના વર્ગ 1 અને વર્ગ 2 તથા નગરપાલિકાના ચીફ ઓફિસર વર્ગ -2ની પોસ્ટ માટે આવતીકાલે લેવાનાર મુખ્ય પરીક્ષામાં અરજદાર ભાગ લઈ શકે છે.જો કે, હાઈકોર્ટે તેના આદેશમાં સ્પષ્ટપણે કહ્યું છે કે, આ આદેશથી અરજદારે એ ન સમજવુ કે કોર્ટ તેમની તરફેણમાં છે.આ કેસની વધુ સુનાવણી 8 નવેમ્બરે હાથ ધરાશે.હાઈકોર્ટે તેના આદેશમાં નોંધ્યું છે કે, આ પ્રકારની સ્પર્ધાત્મક પરીક્ષામાં પરીક્ષાર્થી પાસે દરેક પ્રશ્નનો ઉત્તર આપવા માટે સરેરાશ 48 સેકન્ડ હોય છે.પરીક્ષાર્થી દરેક પ્રશ્નનો જવાબ આપે તે તેના લાભમાં હોય છે.પરીક્ષાર્થીઓની ક્ષમતા નક્કી કરવા માટે જે પ્રશ્નો પુછાય છે તેના જવાબના જે વિકલ્પો હોય છે તેમાંથી એક જ સાચો હોવો જોઈએ, તેમાં કોઈ ગેરસમજણ ના હોવી જોઈએ.
સુનાવણી દરમિયાન હાઈકોર્ટની માર્મિક ટકોર
હાઈકોર્ટે માર્મિક ટકોર કરેલી કે, પરીક્ષાના પેપર સેટ કરનારે પરીક્ષા રૂમમાં બેસેલા પરીક્ષાર્થીની સ્થિતિનો વિચાર કરવો જોઈએ. તેમને મર્યાદિત સેકન્ડમાં જવાબ નક્કી કરવાનો હોય છે,જો વિકલ્પમાં બે સાચા હોય તેવુ જણાતુ હોય ત્યારે જે સ્થિતિ સર્જાય છે, તે દર્દ આપે છે.
સામાન્ય રીતે પરંપરાગત ગરબાઓ મહિલાઓ જ કરે છે
હાઈકોર્ટમાં આ પરીક્ષા દરમિયાન ગરબા અને ઘુંમર સંદર્ભના પ્રશ્નના જવાબ સાચા ન હોવાનો મુદ્દો આવેલો.જે સંદર્ભે હાઈકોર્ટે GPSCને ટકોર કરેલી કે પરંપરાગત ગરબા મહિલાઓ અને પુરૂષો બંને કરતા નથી.હાલ પુરૂષો જે ગરબા ગાય છે,તે એક ફેશનના સ્વરૂપે છે.નવરાત્રિના માતાજીના પરંપરાગત ગરબા એ તો મહિલાઓ કરે છે.હવે તેમાં દરેક લોકો ભાગ લે છે.હાઈકોર્ટ આ મુદ્દે કોઈ આધ્યાત્મિક કે ધાર્મિક બાબતમાં જતી નથી.
ક્યારેક કોઈ અરજીમાં આ બાબતને નક્કી કરીશું – હાઈકોર્ટ
હાઈકોર્ટે એ પણ ટકોર કરી છે કે, ક્યારેક કોઈ આ પ્રકારની અરજી આવશે ત્યારે આ મુદ્દો નક્કી કરીશુ. સત્તાધીશોએ જે પ્રશ્નો પૂછ્યા છે, તેમાં જો બે જવાબ હોય તો ઘણી મુશ્કેલી સર્જાય છે.આ સ્થિતિમાં આ પ્રકારની બાબતમાં ક્યારેક તો યોગ્ય સ્પષ્ટતા નક્કી કરવી પડશે.જે અમે કરીશું.આ સમયે પરીક્ષાના પેપર કાઢનારને સવાલ કરીશું કે આ પ્રકારના સવાલ પુછવાનુ કારણ શું ?
ચીફ ઓફિસર માટે ગરબા કે ઘુમ્મર વચ્ચેના ફરકની વાત શું કામની ?
હાઈકોર્ટે એ પણ ટકોર કરેલી કે ઘણીવાર લાગે છે કે ચીફ ઓફિસર માટે ગરબા કે ઘુમ્મર વચ્ચેના ફરકની વાત શું કામની છે ? આ અન્ય માટે પણ હોય શકે ?
એલઆરઆડીની પરીક્ષામાં આપેલા આદેશને યાદ કર્યો
હાઈકોર્ટે એ પણ ટકોર કરેલી કે 17-08-2022ના એલઆરડી પરીક્ષા સંદર્ભની આ પ્રકારની મેટરમાં પાર્ટી ઈન પર્સન દ્વારા બહુ સરસ રજૂઆત કરાયેલી.જો કે, ઈચ્છવા છતા તેમને મદદ કરી શક્યા ન હતા અને તેમની અરજી ફગાવવી પડેલી.આ બાબતે ન્યાયિક રીતે હાથ બંધાયેલા છે, નહીંતર આ પ્રકારના પ્રશ્નો ચલાવીએ નહીં.
અરજદારના વકીલની રજૂઆત
સુનાવણી દરમિયાન, અરજદારના વકીલ સુધાંશુ ઝાની રજૂઆત હતી કે અરજદારે પ્રિલિમ પરીક્ષા આપેલી છે.આ માટેની જે માસ્ટર આન્સર કી જાહેર થઈ છે, તેમાં ગરબા,ઘુમ્મર અને કુકમા-ગોળ ઘોડી સંદર્ભના જે પ્રશ્ન છે તેના જવાબમાં અસ્પષ્ટતા છે.જેના લીધે,અરજદારને નુકસાન થયું છે અને તેમને મુખ્ય પરીક્ષા આપવાની મંજૂરી આપો.
GPSCની રજૂઆત
આ પ્રશ્નો અને તેના જવાબ નિષ્ણાતોએ તૈયાર કરેલા છે. આ પછી જ માસ્ટર આન્સર કી બહાર પાડવામાં આવેલી છે.આ પ્રકારની સ્પર્ધાત્મક પરીક્ષામાં પ્રશ્નોથી પરીક્ષાર્થીઓના માનસની ક્ષમતા ચકાસાય છે.જેથી, તેમને સરળ પ્રશ્નોના બદલે માનસિક કસરત થાય તેવા પ્રશ્ન પુછાય છે.સુપ્રીમ કોર્ટનો ચુકાદો છે કે, આન્સર કી સંદર્ભમાં કોર્ટે કોઈ દખલ કરવી ન જોઈએ, કારણ કે આ બાબત એ વિષયના નિષ્ણાતો અંગેનો છે.
