– હાલમાં પોલીસ દ્વારા કોઈની પણ અટકાયત કરવામાં નથી આવી
ગાંધીનગર તા. 13 સપ્ટેમ્બર 2022, સોમવાર : ગુજરાત વિધાનસભાની ચૂંટણીના પડઘમ શરુ થઈ ગયા છે. રાજકીય પાર્ટીઓ જીત મેળવવા એડીચોટીનું જોર લગાવી રહી છે ત્યારે વિવિધ શાખાના કર્મચારીઓ પણ પોતાની માંગોને લઈને રસ્તા પર ઉતરી આવ્યા છે.ત્યારે રાજ્ય સરકાર સામે 14 પડતર માંગણીઓને લઈને આંદોલનના માર્ગે ચાલેલા માજી સૈનિકોએ આજે ગાંધીનગર વિધાનસભા તરફ કૂચ કરી હતી.પોલીસે શહેરમાં પ્રવેશવાનાં માર્ગો પર ચુસ્ત પોલીસ બંદોબસ્ત ગોઠવી દઈ વિધાનસભાને પોલીસ છાવણીમાં ફેર દીધું છે.આજે ચીલોડા આર્મી કેમ્પ ખાતે માજી સૈનિકોની ફોજ ઉતરી આવી હતી અને રેલી કાઢી ગાંધીનગર તરફ કૂચ કરે એ પહેલાં જ પોલીસે તેઓને આગળ વધતા અટકાવ્યા હતા.આ આંદોલનમાં શહીદ જવાનના પરિવારો પણ જોડાયા હતા.છેલ્લા ઘણા સમયથી માજી સૈનિકોએ પડતર માંગણીઓને લઈને અનેક વખત રજૂઆતો કરી હતી.ગાંધીનગર ચીલોડા ખાતે હાથમાં તિરંગો લઈને મોટી સંખ્યામાં માજી સૈનિકો એકઠા થયા છે.અગાઉ રાજ્ય સરકારે માજી સૈનિકોની 5 માંગણીઓ સ્વીકારી હતી.જોકે, હજુ પણ બાકીની પડતર માંગણીઓ બાબતે કોઈ હકારાત્મક નિરાકરણ નહીં આવતાં ફરીવાર માજી સૈનિકોએ સરકાર સામે જંગ છેડી છે.વાતાવરણ વધુ તંગ ન બને તે માટે ઘટનાસ્થળ પર પોલીસ તૈનાત છે. માજી સૈનિક તેમજ તેમના પરિવારો દ્વારા ‘ભારત માતા કી જય’ અને ‘વંદે માતરમ’ના સૂત્રોચ્ચાર કરવામાં આવી રહ્યા છે.પડતર તમામ માંગનો સરકાર દ્વારા સ્વીકાર કરવામાં આવે અને અને તેનો GR કરવા માજી સૈનિકો દ્વારા માંગણી કરવામાં આવી છે.જોકે, હાલમાં પોલીસ દ્વારા કોઈની પણ અટકાયત કરવામાં નથી આવી.ગાંધીનગરમાં ચાર માણસો ભેગા થવા પર પ્રતિબંધ હોવાથી માજી સૈનિકોને આગળ જતાં અટકાવવામાં આવ્યા છે.
માજી સૈનિકોની પડતર માંગણીઓ
– શહીદ સૈનિકના પરિવારને રાજ્ય સરકાર દ્વારા 1 કરોડની સહાય
– માજી સૈનિકને વ્યવસાય વેરામાંથી મુક્તિ આપવામાં આવે
– ઉચ્ચ અભ્યાસમાં માજી સૈનિકના બાળકોને અનામત
– ગુજરાત સરકારી સેવામાં 5 વર્ષ ફિક્સ પગાર પ્રથા નાબૂદી
– માજી સૈનિકના બાળકોના અભ્યાસનો સંપૂર્ણ ખર્ચ રાજ્ય સરકારે ઉઠાવવો
– શહીદ સૈનિકના દીકરા અથવા પરિવારના સભ્યને સરકારી નોકરી
– વર્ગ-1 અને વર્ગ-4 સુધીની નિમણૂક વખતે માજી સૈનિકોને અપાતા અનામતનો ચુસ્ત અમલ
– ગાંધીનગર ખાતે રાજ્ય લેવલનું શહીદ સ્માકર
– રહેણાક માટે પ્લોટની ફાળવણીના નિયમનો ચુસ્ત અમલ
– કોન્ટ્રાક્ટ પદ્ધતિ રદ્દ કરીને સરકાર દ્વારા સીધી માજી સૈનિકની નિમણૂકની જોગવાઈ
– દારૂ માટે ભારતીય સેનાએ આપેલી પરમિટ માન્ય રાખવાની જોગવાઈ
– સેનાની નોકરીનો સમય ગાળો પુનઃ નોકરીમાં સળંગ ગણી પગાર રક્ષણ
– ગુજરાત સરકારી સેવામાં 5 વર્ષ ફિક્સ પગાર પ્રથા નાબૂદી
રાજ્ય સરકારે આ માંગણીઓ સ્વીકારી હતી
– શહીદ જવાનાના બાળકોને રૂ.5 હજાર શિક્ષણ સહાય
– અપરણિત શહીદ જવાનના કિસ્સામાં માતા-પિતાને રૂ.5 લાખની સહાય
– શહીદ જવાનના પરિવારને 1 કરોડની સહાય
– શહીદ જવાનના માતા-પિતાને માસિક રૂ.5 હજારની સહાય
– અપંગ જવાનના કિસ્સામાં 2.5 લાખની આર્થિક સહાય અથવા મહિને 5 હજારની સહાય
