– ચીની વ્યકિતઓના અંકુશ હેઠળની લોન એપમાં દરોડા પછી ઇડીની કાર્યવાહી
– ઇડીએ મની લોન્ડરિંગના કેસમાં ચાર કંપનીઓના પેમેન્ટ ગેટવે એકાઉન્ટમાં જમા રકમની લેવડદેવડ પર પ્રતિબંધ મૂક્યો
– ઇઝબઝ,રેઝરપે,કેશફ્રી અને પેટીમના વર્ચ્યુઅલ એકાઉન્ટમાં અનુક્રમે રૂ. 33.36 કરોડ, રૂ. 8.21 કરોડ, રૂ. 1.28 કરોડ અને રૂ. 1.11 કરોડ મળ્યા
નવી દિલ્હી : એન્ફોર્સમેન્ટ ડિરેક્ટોરેટે એસબઝ, રેઝરપે, કેશફ્રી અને પેટેીએમના પેમેન્ટ ગેટવે એકાઉન્ટમાં જમા ૪૬.૬૭ કરોડ રૂપિયા ફ્રીઝ કરી લીધા છે.આ કાર્યવાહી ચીની વ્યકિતઓના નિયંત્રણવાળી લોન એપ દ્વારા તાત્કાલિક લોન આપતી કંપનીઓ દ્વારા કથિત અનિયમિતતા સાથે જોડાયેલા મની લોન્ડરિંગના કેસમાં કરવામાં આવી છે.ભારતમાં ચાઈનીઝ લોન એપનો વ્યાપ દિવસે ને દિવસે વધી રહ્યો હતો.છેતરપિંડીના આ કૌભાંડને ડામવા માટે સેન્ટ્રલ એજન્સીઓ ટોચની નાણાંકીય સંસ્થાઓ સાથે મળીને સપાટો બોલાવી રહી છે.બે મહિનામાં બે વખત દરોડાની કાર્યવાહી બાદ ભારતની અગ્રણી પેમેન્ટ ગેટવેના ફંડ ઈડીએ ફ્રીઝ કરી દીધા છે.
એન્ફોર્સમેન્ટ ડિરેક્ટોરેટે જણાવ્યું હતું કે પેમેન્ટ ગેટવે કંપની ઇઝબઝ,રેઝરપે,પેટીએમ,કેશફ્રી પાસે રહેલા રૂ. ૪૬.૬૭ કરોડના ફંડને ફ્રીઝ કર્યું છે.આ સપ્તાહે જ ઈડીએ ચીનમાંથી સંચાલિત થતી લોન એપ્લિકેશન અને ઈન્વેસ્ટમેન્ટ ટોકન્સ પર દરોડા પાડયા હતા. ઈડીએ મની લોન્ડરિંગ વિરોધી કાયદા હેઠળ આ ફંડ ફ્રીઝ કર્યું છે.
૧૪સપ્ટેમ્બરના રોજ દિલ્હી,મુંબઈ,ગાઝિયાબાદ,લખનૌ અને ગયામાં કથિત કૌભાંડના સંદર્ભમાં અનેક સ્થળોએ કેન્દ્રિય તપાસ એજન્સીએ સર્ચ ઓપરેશન હાથ ધર્યું હતું.ઈડીએ આજે એક નિવેદનમાં કહ્યું કે એપ આધારિત ટોકન એચપીઝેડ અને તેના સંલગ્ન એકમો સબંધિત કેસમાં બેંકો અને પેમેન્ટ ગેટવેના દિલ્હી,ગુરુગ્રામ,મુંબઈ,પુણે,ચેન્નાઈ,હૈદરાબાદ,જયપુર,જોધપુર અને બેંગલુરુ સહિતના કુલ ૧૬ ઠેકાણાં પર દરોડા પાડયા હતા.ઓક્ટોબર, ૨૦૨૧માં નાગાલેન્ડના કોહિમા પોલીસના સાયબર ક્રાઈમ યુનિટ દ્વારા દાખલ કરવામાં આવેલી મની લોન્ડરિંગ કેસ સંદર્ભે થયેલ એફઆઈઆરથી આ સમગ્ર કેસ ઉદભવ્યો છે.તપાસ એજન્સીના સર્ચ દરમિયાન વિવિધ ગુનાહિત દસ્તાવેજો મળી આવ્યા છે અને જપ્ત કરવામાં આવ્યા છે.
‘પેમેન્ટ એગ્રીગેટર્સ સાથે સંકળાયેલી સંસ્થાઓના વર્ચ્યુઅલ એકાઉન્ટ્સમાં જંગી બેલેન્સ જાળવવામાં આવ્યું હતુ જેમ કે પુણેમાં રૂ. ૩૩.૩૬ કરોડ ઇઝબઝ પ્રાઇવેટ લિમિટેડ સાથે, રૂ. ૮.૨૧ કરોડ રેઝરપે સોફ્ટવેર પ્રાઇવેટ લિમિટેડ,બેંગ્લોર સાથે અને રૂ. ૧.૨૮ કરોડ કેશફ્રી પેમેન્ટ્સ ઇન્ડિયામાંથી મળી આવ્યા હતા.આ સિવાય પેટીએમ પેમેન્ટ સર્વિસ લિમિટેડ પાસેથી રૂ. ૧.૧૧ કરોડ મળી આવ્યા હતા.ઇડીએ જણાવ્યું કે વિવિધ બેંક ખાતાઓ અને વર્ચ્યુઅલ એકાઉન્ટમાં રૂ. ૪૬.૬૭ કરોડની રકમ શોધી કાઢવામાં આવી હતી અને ફ્રીઝ કરવામાં આવી છે તેમ ફેડરલ એજન્સીએ જણાવ્યું હતુ.
