રાજકોટ, તા. 18 જાન્યુઆરી 2023, બુધવાર : રાજકોટથી અમરેલી જઇ રહેલી જાનની બસને ધારી પાસે અકસ્માત નડ્યો છે.વરરાજાની ગાડીને ઓવરટેક કરવા જતાં બસ પુલ પરથી પલટી મારી જતાં 25 જેટલા જાનૈયાઓ ઇજાગ્રસ્ત થતાં તેમને સારવાર અર્થે નજીકની હોસ્પિટલ ખસેડવામાં આવ્યા છે.
બનાવની પ્રાપ્ત વિગત અનુસાર રાજકોટથી સોલંકી પરિવારની જાન અમરેલી આવી રહી હતી.સવારે 10 વાગ્યાની આસપાસ ધારીના આંબરડી પાસે જાન પહોંચી હતી.એ સમયે જાનૈયા ભરેલી બસે વરરાજાની કારની ઓવરટેક કરવાનો પ્રયાસ કર્યો હતો. જે સમયે બસ ચાલકે કાબુ ગુમાવતા બસ પુલ પરથી પલટી મારી ગઇ હતી.પુલ પર અકસ્માત થયાની જાણ થતાં મોટી સંખ્યામાં આસપાસના લોકો પહોંચી ગયા હતા અને બસમાં સવાર જાનૈયાઓને બહાર કાઢીને સારવાર અર્થે હોસ્પિટલ ખસેડ્યા હતા. ધારીની હોસ્પિટલમાં પ્રાથમિક સારવાર આપ્યા બાદ 18ની હાલત ગંભીર જણાતા અમરેલી રિફર કરવામાં આવ્યા હતા.બનાવની જાણ થતાં પોલીસ પહોંચી હતી અને આગળની કાર્યવાહી હાથ ધરી હતી.
