વડોદરા : ડભોઈના ભાજપ ધારાસભ્ય શૈલેષ સોટ્ટા અને એક લિસ્ટેડ બુટલેગર વચ્ચેની નજીકની સાંઠગાંઠના આક્ષેપોથી વડોદરાનું રાજકારણ ગરમાયું છે.કોર્ટમાં રજૂ થયેલા એક ફોટોગ્રાફ બાદ સમગ્ર મામલો ચર્ચાના કેન્દ્રમાં આવી ગયો છે.
ડભોઈ નગરપાલિકાની ચૂંટણી દરમિયાન ભાજપ અને કોંગ્રેસના કાર્યકરો વચ્ચે થયેલી અથડામણ બાદ સાઠોદ ગામમાં ધારાસભ્ય શૈલેષ સોટ્ટાએ પોલીસ કાફલા સાથે શક્તિ પ્રદર્શન કર્યું હતું.આ દરમિયાન તેઓ ઘોડા પર સવાર હતા અને તેમના ઘોડાની લગામ પકડીને ચાલતો વ્યક્તિ બીજો કોઈ નહીં પરંતુ બુટલેગર પ્રમોદ પાંડે હોવાનું સામે આવ્યું છે.આ જ પ્રમોદ પાંડે કોંગ્રેસના કોર્પોરેટર આશિષ જોશી સામે નોંધાયેલા દારૂ કેસમાં મહત્વનો આરોપી હોવાનું કહેવાય છે.ફોટો કોર્ટમાં રજૂ થતા રાજકીય અને ગુનાખોર ગઠબંધનની ચર્ચાઓ શરૂ થઇ છે.
વડોદરા મહાનગરપાલિકાની ચૂંટણી દરમિયાન વોર્ડ નંબર 15ના કોંગ્રેસ કોર્પોરેટર આશિષ જોશી સામે સંખેડા પોલીસ મથકે દારૂ મંગાવવાનો ગુનો નોંધ્યો હતો.આ કેસમાં બચાવ પક્ષના વકીલ હિતેશ ગુપ્તાએ કોર્ટ સમક્ષ કેટલાક ફોટોગ્રાફ રજૂ કર્યા હતા.આ ફોટોમાં ધારાસભ્ય શૈલેષ સોટ્ટા શાહી અંદાજમાં ઘોડા પર બેઠેલા જોવા મળે છે,જ્યારે બુટલેગર પ્રમોદ પાંડે તેમની ઘોડાની લગામ પકડીને આગળ ચાલતો દેખાય છે.બચાવ પક્ષે દાવો કર્યો છે કે કોંગ્રેસના નેતાને ખોટા કેસમાં ફસાવવા માટે સમગ્ર ષડયંત્ર રચાયું હતું.આ સમગ્ર પ્રકરણમાં પોલીસ અને બુટલેગરોની સાંઠગાંઠ અંગે પણ ગંભીર સવાલો ઉભા થયા છે.રાજ્ય મોનીટરીંગ દળ દ્વારા નોંધાયેલા દારૂ કેસમાં વિરાજ જયસ્વાલ અને ધવલ જયસ્વાલ નામના બુટલેગરો મુખ્ય આરોપી તરીકે સામે આવ્યા છે.
ચોંકાવનારી બાબત એ પણ સામે આવી છે કે સંખેડા પોલીસ દ્વારા પ્રમોદ પાંડેની ધરપકડ કર્યા બાદ તેની જાણ ડભોઈના લિસ્ટેડ બુટલેગર વિરાજ જયસ્વાલને ફોન કરીને કરવામાં આવી હતી.મૂળ ઉત્તર પ્રદેશનો રહેવાસી પ્રમોદ પાંડે લાંબા સમયથી ડભોઈમાં રહેતો હોવા છતાં ડભોઈ પોલીસ મથકના રેકોર્ડમાં તેની કોઈ સત્તાવાર નોંધ ન હોવાનું પણ ચર્ચામાં આવ્યું છે.પોલીસનો દાવો છે કે બુટલેગર અને કોંગ્રેસ નેતા આશિષ જોશી વચ્ચે માત્ર 16 સેકન્ડની વાતચીત થઈ હતી,જેના આધારે આખો કેસ ઉભો કરવામાં આવ્યો હતો.જોકે બચાવ પક્ષે સવાલ ઉઠાવ્યો છે કે ક્વાંટ વિસ્તાર સાથે જોડાયેલા આ મામલામાં સંખેડા પોલીસ શા માટે વચ્ચે આવી અને કેવી રીતે કોંગ્રેસ નેતાનું નામ કેસમાં ઉમેરાયું.કોર્ટમાં રજૂ થયેલા ફોટા બાદ હવે સમગ્ર મામલે રાજકીય તાપમાન વધુ ચઢ્યું છે અને ભાજપ-કોંગ્રેસ વચ્ચે આક્ષેપોની રાજનીતિ શરૂ થઇ છે.
