અમદાવાદ,
ક્રૂડના ભાવમાં કડાકાની અસર ઓઇલ એન્ડ ગેસ કંપનીઓ પર થવા લાગી છે.ડાયમંડ ઓફશોર નામી કંપનીએ 2.6 અબજ ડોલરની નાદારી નોંધાવતા અમેરિકન ક્રૂડ વેસ્ટર્ન ટેક્સાસ ઇન્ટરમિડિયેટ્સ (WTI) 24 ટકા તૂટીને 12.76 ડોલરની સપાટીએ તો બ્રેન્ટ ક્રૂડ 6.25 ટકા ઘટીને 23.25 ડોલર ટ્રેડ થતાં હતા. ડાયમંડ ઓફશોર કંપની દ્રારા નાદારી નોંધાવવામાં આવતા વૈશ્વિક સ્તરે એનર્જી અને ગેસ સંબધિત શેરોમાં વેચવાલી ફરી વળી હતી. WTI જે ત્રણ દિવસ પહેલાં ક્રાઇસિસમાંથી બહાર આવીને 31 ટકા સુધર્યું હતું તેમાં ફરીથી નરમાઈ પ્રસરી ગઈ હતી. WTI એપ્રિલ કોન્ટ્રાક્ટમાં કડાકા પાછળ જુન 17 ટકા, જુલાઈ 21 ટકા, ઓગસ્ટ 24 ટકા અને સપ્ટેમ્બર 25 ટકા નીચા ટ્રેડ થતાં હતા.એનો અર્થ એ થયો કે આગામી પાંચથી છ મહિના દરમિયાન ઓઇલ માર્કેટની સ્થિતિ ખરાબ રહેવાની સંભાવના મૂકી શકાય.
ઓપેક દેશો માગમાં થયેલા જબરજસ્ત ઘટાડાને રોકવા માટે વધુ ઉત્પાદન કાપની તરફેણમાં રહ્યા હોવાના અહેવાલો પણ ક્રૂડના તૂટતા ભાવને અટકાવી શક્યા નથી.વિશ્વના દેશો લોકડાઉન લંબાવી રહ્યા હોવાથી તેની અસર આગામી મહિનાઓમાં જોવાશે તેવી ધારણાએ ભાવમાં ઘટાડો જોવાયો છે.વધુમાં ડાયમંડ ઓફશોરે જંગી 62.7 મિલિયન ડોલરની ખોટ નોંધાવ્યા બાદ વૈશ્વિક સ્તરે અન્ય મોટી એનર્જી કંપનીઓના નફામાં મોટા ગાબડાં પડવાની અને જંગી નુકશાનીના આંકડા જાહેર કરવામા આવે તેવી ભીતિ પણ વ્યકત કરવામાં આવે છે.આને કારણે ક્રૂડ માર્કેટમાં ગભરાટ યથાવત રહ્યો છે અને ભાવ વધુ તૂટ્યા હતા.
