નવી દિલ્હી : ગત સપ્તાહે સેન્સેક્સમાં 1466 પોઈન્ટનો ચૂનો લાગ્યો અને નિફ્ટીમાં 383નો કરંટ લાગ્યો.સેન્સેક્સમાં 1017 પોઈન્ટનો ચૂનો તો શુક્રવારે જ લાગી ગયો.આરબીઆઈએ ફરી વ્યાજના દરમાં વધારો કરતા તેનો ઝટકો અપેક્ષિત જ હતો.નવા સપ્તાહમાં સ્થાનિક કરતાં વૈશ્વિક પરિબળો વધુ હાવિ રહેશે તેમ જણાય છે.કોરોનાના કેસ મહારાષ્ટ્ર સહિત દેશના અનેક રાજ્યોમાં વધ્યા છે જેને કારણે પણ ફરી નિયંત્રણોની ભીતિ સેવાઈ રહી છે.આગામી દિવસોમાં કોરોના પણ બજાર માટે વિલન બની શકે છે.
માર્કેટ સોમવારે સૌપ્રથમ અમેરિકાના ફુગાવાના આંકડાને રિએક્ટ કરશે.અમેરિકામાં ફુગાવો સતત ત્રણ મહિનાથી 40 વર્ષની ટોચે જોવા મળી રહ્યો છે.ફેડરલ ઓપન માર્કેટ કમિટી(એફઓએમસી)ની 14-15 જૂને મીટિંગ મળશે જેમાં વ્યાજના દરમાં 50 બેસીસ પોઈન્ટનો વધારો થાય છે કે 75 બેસીસ પોઈન્ટનો તે જોવાનું રહેશે.ફુગાવાની સ્થિતિ વધુ વણસી હોવાથી ફેડ વધુ આક્રમક બને તો નવાઈ નહીં.અમેરિકાના માર્કેટે હાલ તો 0.50 ટકા વ્યાજદર વૃદ્ધિને ડિસ્કાઉન્ટ કરી દીધું છે.તેમ છતાં ડાઉ જોન્સ અને સેન્સેક્સ બન્નેમાં વધુ ધોવાણ થાય તો નવાઈ નહીં.ઘરઆંગણે પણ ફુગાવાની સમસ્યા વણસી રહી છે.
આગામી સપ્તાહે મે મહિનાના રિટેલ ફુગાવાના આંકડા 13 જૂને એટલે કે સોમવારે જ જાહેર થવાના છે.હોલસેલ ભાવ આધારીત ફુગાવાનો દર 14 જૂને જાહેર થશે.આથી બજાર માટે પ્રથમ ત્રણ દિવસ ભારે રહેશે તેમ જણાય છે.આઈઆઈપીના ડેટા પણ શુક્રવારે માર્કેટ બંધ રહ્યું પછી આવ્યા છે જેને પણ બજાર રિએક્ટ કરશે.ભારતીય માર્કેટ માટે હાલ પોઝિટિવ કરતાં નેગેટિવ ફેક્ટર વધુ જોવા મળી રહ્યા છે.ક્રૂડ ઓઈલ સૌથી મોટું નેગેટિવ ફેક્ટર છે.ઓપેક પ્લસ દેશોએ ઉત્પાદન થોડું વધારવાની જાહેરાત કરી તેમ છતાં રશિયા પરના પ્રતિબંધોની અવળી અસરને કારણે ક્રૂડ ઓઈલ બેરલદીઠ 120 ડોલર આસપાસ જ રહ્યું.રિઝર્વ બેન્કે તાજેતરમાં તેની પોલિસી બેઠક દરમિયાન ફુગાવાનો અંદાજ વધાર્યો છે તેમાં ક્રૂડ ઓઈલ બેરલદીઠ 105 ડોલરના ભાવે ગણતરીમાં લીધું છે.આમ,વર્તમાન ભાવ જોતા ફુગાવાનું ગણિત ક્રૂડ ઓઈલ બગાડશે તેમ જણાય છે.
એફઆઈઆઈ સતત આઠ મહિન નેટ વેચવાલ રહ્યા પછી જૂનમાં પણ તેમણે વેચવાલી આગળ ધપાવી છે.ગત સપ્તાહે તેમણે રૂ.12,662 કરોડની નેટ વેચવાલી કરી છે,જ્યારે ડીઆઈઆઈએ રૂ.9611 કરોડની નેટ ખરીદી કરી છે.એફઆઈઆઈ હજી ઈન્ડેક્સ બેઝ્ડ શેરોમાં 20 ટકા આસપાસ હોલ્ડિંગ ધરાવે છે તે જોતા હજી તેઓ બજારને ખાસ્સું નીચે લાવી શકે છે.આથી તેમની ચાલ પર ખાસ નજર રાખવી પડશે. તેમની વેચવાલીને કારણે ડોલર સામે રૂપિયો પણ ખાસ્સો નબળો પડીને ગત સપ્તાહે 77.87ની ઐતિહાસિક નીચી સપાટીએ સરકી ગયો હતો.આવા સંજોગોમાં જે કંપનીઓ આયાત પર નિર્ભર છે તેમને વિપરીત અસર થશે અને નિકાસ પર નિર્ભર છે તેમને ફાયદો થશે
