અમદાવાદ : શહેરમાં ચોમાસાની મોસમ આવતાં જ મચ્છર ભગાડવા માટે ઘરે ઘરે દવા છંટકાવ અને ફોગિંગનાં કુલ છ કરોડનો ખર્ચ કરવાની દરખાસ્ત હેલ્થ કમિટીએ મંજૂર કરી દેતાં મ્યુનિ.હેલ્થ-મેલેરિયા ખાતામાં દિવાળીનો માહોલ સર્જાયો છે.મ્યુનિ.હેલ્થ કમિટીની બેઠક બાદ ચેરમેન ભરતભાઇ પટેલે જણાવ્યું હતું કેવરસાદની મોસમમાં મચ્છરની ઉત્પત્તિ તથા ઉપદ્રવ વધતો રોકવા માટે ઘરે ઘરે દવા છંટકાવ અને ફોગિંગ કરવામાં આવે છે.આ કામગીરી માટે ટેન્ડર બહાર પાડવામાં હતા અને તેમાં એચપીસી કોર્પોરેશનને પૂર્વ,દક્ષિણ,પશ્ચિમ ઝોન અને પેસ્ટકેર ઇન્ડિયા પ્રા.લિ.ને ઉત્તર,દક્ષિણ તેમજ પેસ્ટ કંટ્રોલ એન્ટરપ્રાઇઝને મધ્ય અને ઉત્તર પશ્ચિમ ઝોનમાં અંદાજે સાડા સાત લાખ મકાનોમાં દવા છંટકાવનો કોન્ટ્રાક્ટ આપવામાં આવ્યો છે.આ કામગીરી પાછળ અઢી કરોડ જેટલો ખર્ચ થશે.
તદઉપરાંત સાત ઝોનમાં ૧૦૦ પોર્ટેબલ ફોગિંગ મશીન અને મેનપાવર સાથે ઘરે ઘરે ફોગિંગ કરવા માટે ટેન્ડર બહાર પાડવામાં આવતાં એચપીસી કોર્પોરેશનને દક્ષિણ,પશ્ચિમ,ઉત્તર પશ્ચિમ અને દક્ષિણ પશ્ચિમ ઝોન,પેસ્ટકેર ઇન્ડિયા પ્રા.લિ.ને મધ્ય ઝોન તથા પૂર્વ ઝોનનાં ચાર વોર્ડ તેમજ એચપીસીને પૂર્વનાં ચાર વોર્ડના કોન્ટ્રાક્ટ આપવામાં આવ્યા છે.આ કામગીરી પાછળ સાડા ત્રણ કરોડનો ખર્ચ કરવામાં આવનાર છે.જોકે આ બન્ને દરખાસ્ત મંજૂર કરનારા હેલ્થ કમિટી ચેરમેન ભરતભાઇ પટેલને જ દવા છંટકાવ અને ફોગિંગનાં કોન્ટ્રાકટરો કેટલા મકાનમાં કામગીરી કરશે વગેરે સવાલો કરવામાં આવતાં તેમની પાસે ચોક્કસ માહિતીનો અભાવ હતો તે પૂરવાર કરે છે કે,ભાજપનાં ચેરમેનો પૈકી મોટાભાગનાં વર્તમાન પ્રભારી ધર્મેન્દ્રભાઇ શાહ કહે તેમ અથવા તો અધિકારી સમજાવે તેમ દરખાસ્તો મંજૂર કરી નાખે છે.
આશ્ચર્યજનક રીતે મચ્છર ભગાડવા માટે મ્યુનિ.હેલ્થ-મેલેરિયા ખાતા દ્વારા છ કરોડનો ધુમાડો કરવામાં આવનાર છે,પરંતુ તેમાં ૨૧ લાખ ૪૦ હજાર ઓરડાઓનો અંદાજ મુકાયો છે તેમાં દવા છંટકાવ કે ફોગિંગ થાય છે કે નહિ તેનુ ચોક્કસ ચેકિંગ કરવામાં આવતુ નથી અને કોન્ટ્રાકટર દ્વારા આટલા મકાનમાં દવા છંટકાવ કે ફોગિંગ કરાયુ તેવા રિપોર્ટ ઉપર વોર્ડ સ્તરેથી ઝોન સ્તર સુધીનાં અધિકારીઓ આંખો મીંચીને સહીઓ કરી નાખે છે તેવો આક્ષેપ કરતાં મેલેરિયા ખાતાનાં જ પ્રમાણિક કર્મચારીઓએ દવા છંટકાવ અને ફોગિંગની કામગીરીની વિજિલન્સ તપાસ યોજવામાં આવે તો કોન્ટ્રાકટર અને વોર્ડથી લઇ ઝોન સુધીનાંની સાંઠગાંઠનો પર્દાફાશ થશે તેમ જણાવ્યું હતું.દરમિયાનમાં મ્યુનિ.કોંગ્રેસપક્ષ નેતા શેહઝાદ ખાન પઠાણે પણ ઘરે ઘરે ફોગિંગ-દવા છંટકાવનાં કોન્ટ્રાક્ટમાં કૌભાંડનો આક્ષેપ કરતાં ટેન્ડરની શરતોનુ પાલન કરાવવાની માંગણી કરી છે.
